Çarəsiz bir ailənin acı fəryadı

Ev yox, iş yox, pul yox, hər şey yox oğlu yox, ancaq uşaq bol!

Uşaq dünyaya gətirmək asandır, ancaq onu saxlamaq əziyyət və maddiyat tələb edir. Uşaq bezi, yeməyi, paltarı, ümumiyyətlə hər şeyi çox bahadır. Vay o gündən ki, pul-para olmaya. Böyüklərimiz demiş, "uşaqdır, qanmır, qandırmır, ver yeyim, ört yatım deyir". Bunun üçün isə pul lazımdır.

"Pulun yox idi uşaq əkməyəydin"

Ölkə.Az-ın çəkiliş qrupu aztəminatlı, daha dəqiq desək tam təminatsız ailələrdən birində olub. Həmin ailə ilə bağlı hazırladığımız reportajı sizə təqdim edirik.

"Azerenerji"nin yataqxanasına yola düşürük. Övladlarına görə fəryad edən atanın evindəyik. Məhərrəmov Namiq Nazim oğlu Şəki rayonundandır. Həyat yoldaşının adı Elnarə Məhərrəmovadır. Ailədə 6 nəfərdilər. Uşaqlarının adı Ceyhun, Emil, 1 aylıqları dünən tamam olan əkizlərin adı isə Zəhra və Əsmadır. Ailə kirayədə yaşayır. Ev bir otaqdan ibarətdir. Çarpayı, köhnə televizor və stol. Ailə qonaqları və yuxunu bu otaqda qarşılayırlar.

Ata Məhərrəmov Namiq danışır: "Heç cürə uşaqlarıma baxa bilmirəm. Heç bir yerdə iş yoxdur. Tikintidə fəhlə işləyirdim, o da bağlandı. Qalmışam ortalıqda. Heç yerdə işləmirəm. Sosial yardım almaq istəyirəm, onu da vermirlər. Adıma 70 sot torpaq var. Adımda torpaq olduğu üçün ünvanlı sosial yardım vermirlər. 70 sot torpağı əkib-becərmirəm axı. 70 sot hökumət tərəfindən verilən pay torpaqdır. Bəhanə edirlər ki, torpağın var, deməli sizə yardım düşmür. Şəki Sosial Müdafiə Fondundan bildiriblər ki, sənin evin olmalıdır, evində sayğac olmalıdır. Dedim heç nəyim yoxdur. 4 uşağım var. Dedilər, pulun yox idi, ağlın var idi uşaq əkib-becərməyəydin. Qardaş, indi mənim evim yoxdur, neynəyim? Şəkidə ata yurdum var. O da 1 otaqlı evdir, orada da atam yaşayır".

Uşaqlar bir aylıqdır. Doğulanda ikisi də qüsurlu doğulub. Uşaqların əlləri açılmır və qulaqlarında problem var. Həkim uşaqlar doğulduqdan sonra müayinəyə aparılmasını desə də, imkansızlıqdan apara bilməyiblər. Əkizlər ikisi də qızdır. Ailənin dediyinə görə, bir həftədir dayanmadan ağlayırlar. Pulsuzluqdan nə həkim çağıra bilirlər, nə də həkimə gedə bilirlər.

Hər ay kirəyə 150 manat verməli olan ailə 4 aydır o pulu ödəyə bilmir.

- Nə ilə dolanırsınız? Nə yeyib, nə içirsiniz?

- Bu gün fəhləlik edib 8 manat pul qazanmışam. Arada qonşular da kömək edir. Uşaqlara görə əl tuturlar. Uşaqların yeməyini ala bilmirəm. Uşaq yeməkləri bahadır, uşaq bezini belə ala bilmirəm. Neçə gün uşaq bezi almağa pulum olmadı deyə adi parçadan istifadə etdik. Özümə bir şey istəmirəm, balalarıma yardım etsinlər.

- Şəkidə eviniz olsa yaşayarsınız?

- Yaşayaram. Fərqi yoxdur. Əsas odur dolana bilim, uşaqlarımı saxlayım. Özüm də əməliyyat olunmuş adamam. Daş qaldırmaqdan əməliyyatın yeri açılıb. Özüm 3-cü qrup əliləm, pensiya da vermirlər. Şəkidə Sosial Müdafiə Fonduna getdim, 2 min dollar pul istədilər ki, pensiyaya çıxarsınlar məni.

- Uşaqların doğumu üçün nə qədər pul verdiniz?

- Bakıxanov qəsəbəsindəki xəstaxanada uşaqların doğuşuna 600 manat pul verdim.

- Pulu haradan aldınız?

- Borc almışam, hələ də qaytara bilmirəm.

"Əri döymüş arvadı it də tutdu bir yandan"

Məhərrəmov Namiq danışır: "Bir maşınım var idi. Onu satdım. Pulunu aydan-aya verməli idilər. Maşın da getdi, pulu da. Maşını alan adam pulu vermir. Polisə, prokurorluğa vermişəm. O, bunun üstünə göndərir, bu da onun. Dedilər get məhkəməyə ver, məhkəməyə də getdim, dedilər polisə ver. Ortalıqda qalmışam, hərə birinin üstünə atır. Həyatda bir tək özümə məxsus maşınım olub, onu da mənə atdılar...".

Elnarə Məhərrəmova danışa bilmir. Sonradan deyir, yalnız körpələrim üçün yardım istəyirəm. Uşaqlar həkim nəzarətində olmalıdır. Ancaq imkansızlıqdan apara bilmirik. Evə də həkim çağıra bilmirik. Evə gələn həkimə pul vermək lazımdır. Bir dəfə evə gəlib pul verilməyən həkim ikinci dəfə gəlmir".

Çarpayının üstündə ağlayan uşaqları qardaşları sakitləşdirmək istəyir, ancaq qızlar ağlamağa davam edirlər. Oğlanlar gedib bacılarını öpür, gəlib atalarının ağzına baxırlar.

Söhbətə ailə başçısı qoşulur: "Böyük uşaqlar ikisi də məktəbə gedir. Məktəbə ötən ilki paltarları, çantaları ilə gedirlər. Yaşca böyük uşağın ötən ilki paltarını yaşca kiçiyə geyindirib məktəbə yola salırıq. Prezidentimiz İlham Əliyevə, onun xanımı Mehriban Əliyevaya müraciət edirəm. Mənə bir yardım etsinlər. Ailədə 6 nəfərik, işləmirik, evim də yoxdur. Uşaqlarımı saxlamağım üçün yardım etsinlər. Özümə heç nə istəmirəm...".

Evə girəndən çıxana kimi əkizlər ancaq ağladı, sanki ağrıdan, xəstəlikdən yox, valideynlərinin çarəsizliyinə ağlayırdılar.

Qeyd edək ki, bu reportajın hazırlanmasında 33 saylı dairədən namizəd olan D18 Hərəkatının sədri Ruslan İzzətlinin xüsusi rolu olmuşdur. O, seçicilərinə söz vermişdi ki, o, deputat seçilməsə belə 5 il onların yanında olacaq.