Komitə: İstifadəsiz torpaqları müəyyən etmək asanlaşacaq
Azərbaycanda Torpaqların Elektron Kadastr Uçotu Sistemi yaradılır.
Bu barədə Əmlak Məsələləri Dövlət Komitəsindən (ƏMDK) Ölkə.Az-a bildirilib.
“Bakı və Sumqayıt şəhərlərinin müfəssəl elektron kadastr məlumat bazası yaradılıb, onların rəqəmsal kadastr xəritələri tərtib edilib. Bu bazada hər bir torpaq parseli, onların üzərindəki tikili barədə müfəssəl məlumatlar toplanıb. Burada hər iki şəhər üzrə bütün daşınmaz əmlak obyektləri barədə məlumatlar, torpağın sahəsi və ölçüləri, kommunikasiya xətləri, mühafizə zonaları, torpağın yerləşmə vəziyyətini göstərən koordinatları, təyinatı, üzərindəki tikilini xarakterizə edən göstəricilər əks olunur”, - deyə komitədən qeyd edilib.
Komitədən bildirilib ki, ortofotomaterialların rəqəmsallaşdırılması işləri yaxın 4 ay ərzində başa çatacaq:
“Hal-hazırda Gəncə şəhərində və Şəki rayonunda da bu işlər görülür və 2016-cı ilin birinci yarımilliyində bu ərazilər üçün də mükəmməl kadastr işi hazır olacaqdır. Ölkənin 53 rayon mərkəzinin ərazilərinin də torpaq uçotu işinə başlanılıb.
Bu layihə çərçivəsində yaxın 2 il ərzində daha 130.000 ha ərazidəki torpaqlar və onlar üzərindəki daşınmaz əmlaklar barəsində müfəssəl kadastr işi yekunlaşacaq. Ölkənin 4 milyon hektar ərazisini əhatə edən ortofotomaterialların rəqəmsallaşdırılması işi yaxın 4 ay ərzində başa çatacaq”.
“Torpaq bazarının bu sistemlə tənzimlənməsi icarəyə götürülən, lakin istifadə olunmayan hektarlarla torpaqların aşkarlanmasına və istifadəyə verilməsinə şərait yaradacaq”, - deyə komitədən bildirilib.
Komitədən qeyd edilib ki, bütün bu işlərlər yanaşı hazırda Bakı, Sumqayıt, Gəncə şəhərlərinin bələdiyyə xəritələrinin tərtibi işinə hazırlıq gedir.
