Polkovnik vəfat etdi

Uzun müddət hüquq mühafizə orqanı işçisi olmuş polkovnik Firqət Qəniyev vəfat edib.

Ölkə.az xəbər verir ki, Qəniyev Firqət Ələddin oğlu vəfat edib.

Xatırladaq ki, Qəniyev Firqət Ələddin oğlu 3 yanvar 1958 ci ildə Şamaxı rayonunun Göylər kəndində fəhlə ailəsində anadan olub.

1965 ci ildə Göylər kənd orta məktəbinin I sinifinə qədəm qoymuş, 1973 cü ildə həmin məktəbin VIII sinifini fərqlənmə ilə bitirərək, Bakı şəhərində yerləşən 5 saylı Respublika kimya-biologiya təmayüllü internat məktəbinə daxil olmuş, 1975 ci ildə həmin məktəbdən məzun olub.

1975 ci ildə Azərbaycan Neft-Kimya İnstitutunun mühəndis-iqtisadiyyat fakultəsinə daxil olmuş, 1980 ci ildə həmin institutu bitirərək mühəndis-iqtisadçı ixtisası, eləcə də leytenant hərbi rütbəsi alıb.

1982-1984 cü illərdə Azərbaycan KP Mərkəzi Komitəsinin Marksizim-Leninizim Universitetinin iqtisadiyyat fakultəsində siyasi təhsil almışdır.

1984-1986 cı illərdə Qazaxıstan SSR də yerləşən Baykanur kosmodromunda baş leytenant rütbəsi ilə siyasi işlər üzrə müavin vəzifəsində xidmət keçmişdir.

Firqət Qəniyev əmək fəaliyyətinə 1980 ci ildə Sumqayıt kimya-sənaye birliyində baş iqtisadçı olaraq başlamış, 1984 cü ildə Xüsusi Tikinti Quraşdırma nazirliyində mühasib-təftişçi kimi çalışmışdır.

1987-1988 ci illərdə Dövlət Qiymət Komitəsində, 1988-1991 ci illərdə Dövlət Plan Komitəsində, 1992-1994 cü illərdə Azərittifaqın qiymətlərə nəzarət idarəsində müxtəlif vəzifələrdə işləmişdir.

1994 cü ildə İqtisadiyyat Nazirliyinin Baş Qiymətlər İdarəsinin rəis müavini vəzifəsinə irəli çəkilib və 1998 ci ilə kimi burada çalışmışdır.

1998 ci ildən, 2017 ilin iyun ayına kimi Dölət Gömrük Komitəsinin (DGK) Gömrük Dəyəri şöbəsinin baş inspektoru və şöbə rəisi vəzifələrində xidmət edib.

2017 ci ilin iyun ayında gömrük xidməti polkovniki rütbəsində təqaüdə çıxıb.

Polkovnik Firqət Qəniyev respublikamızda Gömrük dəyəri üzrə Ümumdünya Gömrük təşkilatının beynəlxalq sertifikatına sahib olan az saylı mütəxəssislərdən biridir.

2012 ci ildə Respublika Prezidentinin müvafiq sərəncamı ilə "Dövlət qulluğunda fərqlənmə", DGK in sədrinin müvafiq əmrləri ilə DGK nin 20 illiyi və DGK nin 25 illiyi yubiley medallari ilə təltif olunub. Həmçinin Gömrük orqanlarında 10 il qüsursuz fəaliyyətinə görə III dərəcəli, 15 il qüsursuz fəaliyyətinə görə II dərəcəli döş nişanı və müxtəlif fəxri fərmanlarla təltif olunub.

1998 ci ildən Komitənin Tədris Mərkəzində və Gömrük Akademiyasında Gömrük dəyəri və qiymətləndirilməsi fənni üzrə müəllim kimi də fəaliyyət göstərmişdir.