Analar uşaqlarını niyə kanalizasiya quyularına atırlar?
Son illər övladlarından imtina edən valideynlərin sayı artmaqdadır. Onların bir qismi çıxış yolunu dünyaya gətirdiyi övladı elə xəstəxanadaca atıb qaçmaqda görür, başqa bir hissəsi dövlətin himayəsinə bel bağlayır. Bəziləri isə dünyaya gətirdiklərini kanalizasiya quyularına atmaqla bəlkə də dünyanın ən böyük cinayətinə əl atırlar.
Bu günlərdə telekanallardan birinə müsahibə verən 77 yaşlı Alı Aşırovun açıqlamaları isə sözün əsl mənasında həyəcan siqnalıdır. Aşırov 54 ildir kanalizasiya quyularının təmirində çalışır. Dediyinə görə, indiyə kimi kanalizasiya quyularından 45-ə yaxın uşaq cəsədi çıxarıb. Elə son vaxtlarda eyni quyudan iki uşağın cansız bədənini üfunətdən "xilas edib".
Bəs görəsən valideynləri övladlarına qarşı belə amansız olmağa nə vadar edir? Öncə məsələnin psixoloji tərəflərinə nəzər salaq.
Ölkə.az-ın həmsöhbəti psixoloq Könül Cəfərova deyir ki, bəzən qadınlar əks cinslə münasibətləri daimiləşdirmək üçün ondan uşaq dünyaya gətirir. Amma bu heç də həmişə effektiv olmur:
"Bu, ilk növbədə cinayət faktıdır. Əgər həqiqətdirsə, deməli, hüquq-mühafizə orqanlarının qarışacağı məsələdir. Övladından imtina edən, uşağı özündən uzaq tutan valideynlərlə çox rastlaşırıq. Bəzi qadınlar uşaq dünyaya gətirməyi bir ailə modeli kimi nəzərdə tuturlar. Düşünürlər ki, münasibət qurduğum əks cinsdən uşağım olarsa, deməli, mənə bağlanacaq, yanımda qalacaq. Sonradan başa düşürlər ki, yanlış addım atıblar və nəticə uşağın məhvinə gətirib çıxarır. Uşaq evlərindəki atılmış uşaqlar da buna bariz nümunədir".
Psixoloq bildirir ki, son zamanlar insanlarda pataloji problemlər, həmçinin nikahdankənar uşaqların dünyaya gəlməsi halları daha çox yayılıb. Cəfərovanın sözlərinə görə, bunun da səbəbi ailədə düzgün tərbiyə olunmamaqdadır:
"Avtoritet, liberal və sair ailələr var. İnsan ailədə sevgi nəvaziş görmürsə, eynisini də öz övladına yaşadır. Bu yaxınlarda uşaq evində böyümüş bir xanım iki ayrı kişidən uşaqlar dünyaya gətirmişdi. Birinci uşağı aparıb uşaq evinə qoymuşdu və əsası da bu idi ki, uşağı saxlaya bilmirəm. İkinci insanla münasibətdən də bir oğlan uşağı dünyaya gətirmişdi. Həmin uşağı da uşaq evinə yerləşdirmək istəyirdi. Ondan soruşanda bildirdi ki, mən özüm nə görmüşəm ki? Sağlam uşaq yetişdirmək üçün uşağa sağlam iqlim vermək lazımdır. Bu gün övladını atan ananın da atanın da sağlam iqlimi olmayıb və o cəmiyyətə sağlam şəxsiyyət kimi təqdim edilməyib. Ona görə natamamlığını hiss elətdirəcək".
Ancaq məsələ təkcə bununla bitmir. Burada insan orqanlarının alveri ilə məşğul olan cinayətkar şəbəkənin olması da istisna deyil. Hər halda dəfələrlə bu kimi cinayət faktlarının üstünün hüquq-mühafizə orqanları tərəfindən açıldığını görmüşük. Mümkündür ki, cinayətkar şəbəkə həmin körpələrin müəyyən daxili orqanlarını əldə etdikdən sonra cəsədin qalan hissəsini cinayətin izini itirmək məqsədilə məhz kanalizasiya quyularına atırlar.
Səbəblərdən növbətisi ailəlin maddi durumu ola bilər. Ancaq bu övladı küçəyə atmağa, kanalizasiya quyusuna tullamağa əsas deyil.
İntiqam VALEHOĞLU
Ölkə.az
