İntellekt Marafonu Festivalı keçirildi

Azərbaycan Respublikası Prezidenti yanında Gənclər Fondunun maliyyə dəstəyi, Xəzər İntellektual Gənclər Klubu və Azərbaycan Müəllimlər İnstitutu təşkilatçılığı və Bakcell şirkətinin dəstəyi ilə “Nə? Harada? Nə zaman?” oyunu üzrə İntellekt Marafonu Festivalı keçirildi.

İntellekt Marafonu Festivalında seçim turlarında ölkənin 18 regionundan 1000-lə gəncin iştirak etdi. Onlardan ən güclü 60 komanda finala vəsiqə qazandı. Festivalın final mərhələsi Bakıda Kempinski Hotel Badamdarda baş tutdu.

Tədbirdə açılış nitqi ilə çıxış edən turnirin təşkilat komitəsinin rəhbəri Seymur Teymurov Festivalın keçirilməsində məqsəd gənclərin asudə vaxtlarının səmərəli təşkili, onların intellektual inkişafının təmin olunması və intellektual oyunlar hərəkatının bütün ölkəni əhatə etməsi olduğunu bildirdi və iştirakçılara uğurlar arzu etdi. Daha sonra Azərbaycan Respublikası Prezidenti yanında Gənclər Fondunun sektor müdiri Orxan Ərəbov çıxış edərək Fondun intellektual oyunlar hərəkatına göstərdiyi dəstəkdən danışdı. Bu əməkdşalığın gələcəkdə də davam etdiriləcəyini vurğuladı. Azərbaycan Müəllimlər İnstitutunun prorektoru Rəşad Sadıqov çıxışında İnstitutun bütün filialların intellektual oyunların populyar olduğunu, tələbələrin böyük həvəslə yarışlarda iştirak etdiyini dedi. Azərbaycan Müəllimlər İnstitutunun turnirdə ən çox komanda ilə iştirakını vurğuladı.

İntellekt Marafonu Festivalının finalı 4 turdan ibarət olan 60 sualın səslənməsi ilə davam etdi. Rəqiblərini xeyli qabaqlayan “Vendetta” komandası turnirdə birinci yerə sahib oldu. “Prestij” və “Diplomat” komandaları isə müvafiq olaraq ikinci və üçüncü yerlərə sahib oldular. Regionlar arasında ən güclü komanda isə Beyləqanın “Mil” komandası oldu.

Qaliblər kubok, medallar və diplomlar, Akademiya Kitab Mərkəzindən kitablar, eləcə də Azərbaycan Qolf Federasiyasından qolf dərslərinə 3 aylıq pulsuz kupon əldə etdilər. Sonda qaliblərlə xatirə şəkli çəkildi.

Ölkə.Az