Təyyarə dənizə ensəydi necə olacaqdı? - AZAL-dan cavab

Fikrimcə Bakı-Qrozni reyisinin həyata keçirən "Embraer190"  pilotları bütün mümkün vasitələrdən istifadə edərək təyyarəni sağ-salamat yerə endirməyə çalışıblar.

Ölkə.Az xəbər verir ki, bunu açıqlamasında AZAL-ın uçuşların təhlükəsizlik idarəsinin rəis müavini Fərhad Nəsirov qəzanın baş verməsi ilə bağlı səslənən bir sıra iddialara, xüsusən də təyyarənin dənizə deyil quruya endirməsi ilə bağlı məsələyə aydınlıq gətirərkən deyib.

"Onlar Aktau hava limanının eniş zolağını gördüklərindən təyyarəni təhlükəsiz hava limanının zolağına eniş etmək istəyiblər. Dənizə düşsəydi, o zaman itki daha çox ola bilərdi. Onlar bütün mümkün vasitələrdən istifadə ediblər", - o qeyd edib.

Qəzanın baş verməsinə səbəb ola biləcək ehtimalları barədə danışan Nəsirov bildirib ki, pilotlar idarəetməni itiriblər: "Buna səbəb isə təyyarədəki hidravlik maye ola bilər. Bir də təyyarədə radar və elevator deyilən idarəetmə qurğuları var. Yəqin ki, onlarda da problem yaranıb və bu səbəbdən qəzaya uğraya bilər".

Təyyarənin uçuşa yararlı və texniki sazlıq vəziyyəti barədə danışan Nəsirov bildirib ki, AZAL-ın parkında olan bütün təyyarələrin uçuşdan öncə uçuşa yararlılığı və texniki vəziyyəti yoxlanılır: "Uçuşdan öncə təyyarədə heç bir problem qeydə alınmayıb. Ümumiyyətlə, parkda olan bütün təyyarələr davamlı olaraq texniki baxışdan keçirilir".

Mürtəza
Ölkə.Az