Nəqliyyat naziri İsrail səfiri ilə görüşdü

Nazirlik məlumat yaydı.

Bu gün Nəqliyyat Nazirliyində İsrail Dövlətinin Azərbaycandakı Fövqəladə və Səlahiyyətli Səfiri Dan Stavın rəhbərlik etdiyi nümayəndə heyəti ilə görüş keçirilib.

Bu barədə Nəqliyyat Nazirliyindən Ölkə.Az-a bildirilib.

Qonaqları salamlayan Nəqliyyat naziri Ziya Məmmədov nəqliyyat sektorunu əhatə edən bütün sahələr, o cümlədən avtomobil yolları, bu sahədə həyata keçirilən tədbirlər, əldə edilmiş nailiyyətlər barəsində ətraflı məlumat verərək, bu istiqamətdə İsrail Dövləti ilə əməkdaşlığın daha da inkişaf etdirilməsinin zəruri olduğunu və bu əməkdaşlığın həm Azərbaycanın, həm də İsrailin nəqliyyat infrastrukturunun inkişafına xidmət etdiyini vurğulayıb.

Öz növbəsində Azərbaycanda nəqliyyat sektorunda əldə edilən uğurlardan, reallaşdırılan iri layihələrdən xəbərdar olduqlarını vurğulayan Dan Stav ölkəsinin Azərbaycanla iqtisadi əlaqələrin, o cümlədən nəqliyyat sahəsində əməkdaşlığın genişləndirilməsində maraqlı olduğunu vurğulayıb.

Görüşdə, iki ölkə arasında nəqliyyat sahəsində əməkdaşlıq imkanları, perspektiv layihələr və görülən işlər ətrafında fikir mübadiləsi aparılıb.

Ölkə.Az