Rusiya ilə birgə iş gedir, təqsirkarlar tapılacaq - RƏSMİ

"AZAL-ın təyyarəsinin qəzaya uğramasının səbəbləri üç ölkənin istintaq orqanları tərəfindən araşdırılır".

Ölkə.Az xəbər verir ki, bunu jurnalistlərə açıqlamasında baş prokuror Kamran Əliyev deyib.

O bildirib ki, hər üç dövlətin aidiyyəti qurumları tərəfindən sübutları toplanması, hadisənin səbəblərinin təyin edilməsi istiqamətində intensiv iş aparır:

"Hadisə baş verən andan etibarən Baş Prokurorluğun əməkdaşları qəza ilə bağlı səfərbər oldular. Ölkənin siyasi rəhbərliyinin tapşırığı ilə Baş Prokurorluq tərəfindən cinayət işi başlanıb. Rusiyanın aidiyyəti qurumları, hüquq-mühafizə orqanları ilə hadisənin səbəbləri ilə bağlı birgə araşdırmalar davam etdirilir. Bu faktla bağlı üç ölkədə: Rusiya, Azərbaycan və Qazaxıstanda cinayət işi başlanıb".

Baş prokuror deyib ki, hər dövlətin aidiyyəti qurumları tərəfindən sübutları toplanması, hadisənin səbəblərinin təyin edilməsi və təqsirkar şəxslərin müəyyən edilərək məsuliyyətə cəlb edilməsi istiqamətində tədbirlər görüləcək:
"İstər Rusiyanın Baş Prokurorluğu, istərsə də İstintaq Komitəsi tərəfindən bu istiqamətdə müvafiq tədbirlər həyata keçirilir".

Billurə Yunus