Ali məktəblər necə qorunur?

Fransada baş vermiş terror hadisəsi bütün avropanı qorxuya saldı desək yəqin yalan olmaz. Fransada baş verən bu hadisə heç bir ölkənin terrordan sığortalanmadığını bir daha göstərdi. Məhz bu hadisələrdən sonra digər ölkələr hər bir sahədə nəzarəti gücləndirmək məqsədi ilə xüsusi addımlar atıb. Konsertlərdə, futbol yarışlarında, hava limanlarında, ticarət mərkəzlərində nəzarət gücləndirilərək baş verə biləcək hər hansı bədbəxt hadisənin qarşısı alınmağa çalışılır.

Həmçinin Azərbaycanda da son zamanlar bəzi yerlərdə nəzarət və yoxlanışların artdığının şahidi oluruq. Azərbaycan dəfələrlə bu cür bədbəxt hadisələrə məruz qalmış və əziyyətini çəkmişdir. Bildiyiniz kimi ölkəmizdə son dəfə belə hadisə 30 aprel 2009-cu il Azərbaycan Dövlət Neft və Sənaye (o vaxtki adıyla Azərbaycan Dövlər Neft Akademiyası) Universitetində də baş vermişdir. Bəs indi universitetlərin mühafizəsi necədir? Son olaylardan sonra mühafizəni gücləndirməklə bağlı tapşırıqlar olubmu?

Ölkə.az məsələylə bağlı Azərbaycanın bir neçə universitetiylə əlaqə saxlayaraq son vəziyyəti öyrəndi.

Bakı Dövlət Universiteti mətbuat xidmətinin rəhbəri İbrahimova Pərvanə: Nəzarəti gücləndirməklə bağlı hər hansı tapşırığın verilib verilmədiyini dəqiq deyə bilmərəm, amma universitetimizin mühafizəsi həmişə yaxşı təşkil olunub. Bildiyiniz kimi universitetimizin bir neçə yerdən giriş qapıları var və hər bir girişdə tələbədən tutmuş əməkdaşa qədər vəsiqəsini və ya tələbə biletini göstərərək universitete daxil olur. Əgər kənar adam olarsa içəriyə buraxılmır və mühafizə tərəfindən universitetlə əlaqə saxlanılır. Hər bir mühafizəçi isə təbii ki öz işinə ciddi yanaşır.

Azərbaycan Dillər Universitetinin mətbuat xidmətinin rəhbəri Kazımova Şəfa: Azərbaycan Dillər Universitetində (ADU) gücləndirilmiş rejimdə daxili təhlükəsizlik xidməti fəaliyyət göstərir. Universitetin bütün giriş və çıxış qapılarına quraşdırılan kameralar 24 saat ərzində izlənilərək təhlükəsizliyə xidmət edir.

Azərbaycan Texniki Universitetin saytının əməkdaşının rəhbərlikdən aldığı məlumata əsasən, universitetdə həmişə mühafizə çox güclü olub. Son günlər isə mühafizə daha da gücləndirilib.

Azərbaycan Pedoqoji Universitetinin mətbuat və informasiya şöbəsinin müdiri Mansur İbrahimov: Universitetimizin binası "Qartal" mühafizə xidmətinin əməkdaşları tərəfindən qorunur. Bu mühafizə xidməti Daxili İşlər Nazirliyinin müvafiq lisenziyası əsasında fəaliyyət göstərir. Son dövrlər yox, bütün dövrlərdə universitetimizin mühafizəsinə xüsusi diqqət yetirilir. Tələbələr, universitetin müəllimləri və ya hər hansı bir əməkdaşı iş vəsiqələrini göstərməklə universitetə daxil olurlar. Əlavə olaraq hər hansı bir tapşırıq olmayıb.

Azərbaycan Memarlıq və İnşaat Universitetinin mətbuat xidmətinin əməkdaşından verilən məlumata, onlara belə bir xəbərdarlıq olmayıb. Həmçinin, mətbuat işçisi bildirir ki, universitetin mühafizəsi əvvəldən yaxşı qurulub.

Azərbaycan Universiteti İctimai əlaqələr şöbəsinin müdiri: Hər 3 binamızın mühafizə xidməti var. Gücləndirilməsi ilə bağlı tapşırıqlar verilməyib. Universitet və tələbələr yüksək səviyyədə qorunur. Mühafizə xidmətinin əməkdaşları öz işlərini peşəkarcasına aparır və təcrübəli insanlardır. Xüsusi biletler vasitəsi ilə universitetə daxil olunur. Hətta yanvar ayında kart sisteminə keçəcəyik və sistem özü tanıyacaq.

Azərbaycan Tibb Universitetindən verilən məlumatda isə bildirilir ki, mühafizə işləri "Riyad" mühafizə xidməti tərəfindən aparılır. Həmçinin Tibb Universtetinə məxsus bütün korpuslar və 4 klinika bu xidmət tərəfindən yüksək səviyyədə qorunur.

Taleh Rəcəbli
Ölkə.az