Ağdaş Rayon İcra Hakimiyyəti: Fəhlə könüllü "lafet"ə qoşula bilər

Ağdaş rayonunda fəhlələrin traktor qoşqusuna qoşulması videosu qısa müddətdə böyük narazılığa səbəb olub.

Ancaq Ağdaş Rayon icra Hakimiyyətində belə hesab edirlər ki, fəhlənin "lafet"ə qoşulmasında qəribə heç nə yoxdur. İcra Hakimiyyətinin şöbə müdiri Qalib Həsənov Ölkə.az-a açıqlamasında bildirib ki, bu işlərə başqa bir qurum cavabdehdir:

"O video haqda məlumtsızam və əlimdə əsas yoxdur. İnsan könüllü "lafet"ə də qoşula bilər, dartıb apara da. Burda nə var ki? Bu işlərə biz baxmırıq. Onlar özəl qurumdur, özü-özünü maliyyələşdirir, icra hakimiyyəti ilə əlaqəsi yoxdur".

Xatırladaq ki, əməkdaşımızın çəkdiyi görüntülərdə rayon mərkəzinin təmizliyinə məsul işçilərin traktor qoşqusunu dartdığı açıq-aşkar görünür. Fəhlələr isə durumu belə izah ediblər:

"Rəhbərlik deyib ki, yanacağa qənaət edin. Ona görə qoşqunu özümüz dartırıq".


İntiqam VALEHOĞLU
Ölkə.az