DİN: German Sterliqovun ifadəsi bizim müraciətimiz əsasında alınıb

Azərbaycan Daxili İşlər Nazirliyi rusiyalı iş adamı German Sterliqovun Rusiya mətbuatına açıqlamasına münasibət bildirib.

Ölkə.Az-ın xəbərinə görə, Nazirliyinin mətbuat xidmətinin rəis müavini Ehsan Zahidov APA-nın sorğusuna cavabında qeyd edib ki, Azərbaycanın Dağlıq Qarabağ bölgəsinə qeyri-qanuni səfər etmiş rusiyalı biznesmen German Sterliqovun istintaqa çağırılması və Bakıya təhvil verilməsi barədə verdiyi müsahibədə səsləndirdiyi fikirlər həqiqəti əks etdirmir.

“Belə ki, iki ölkənin Daxili İşlər nazirlikləri arasında əməkdaşlığa dair sazişin tələblərinə uyğun olaraq Rusiya Federasiyasının müvafiq qurumundan German Sterliqovun ifadəsinin alınması xahiş olunub və müraciət təmin edilib”, - E.Zahidov bildirib.

Qeyd edək ki, Dağlıq Qarabağa qeyri-qanuni səfər etmiş biznesmen German Sterliqov istintaqa ifadə verdiyini bildirib. O deyib ki, müstəntiqlərin verdiyi suallar əsasən Azərbaycan tərəfinin irəli sürdüyü ittihamlar və onun Bakıya təhvil verilməsi ilə bağlı olub.

“Müstəntiqlər mənə dedilər ki, Rusiya öz vətəndaşlarını heç bir ölkəyə təhvil vermir və ekstradisiyam barədə söhbət gedə bilməz”, - deyə o vurğulayıb.

Ölkə.Az