Qəza baş verən özülün rəisi Qəhrəman Məmmədov: \"Rəhbərlik bizə ümid verirdi\"

Hazırda Mərkəzi Neftçilər Xəstəxanasında olan “Günəşli” yatağındakı 10 saylı dərin dəniz özülünün rəisi Qəhrəman Məmmədov jurnalistlərin suallarını cavablandırıb.

Ölkə.az Q.Məmmədovun müsahibəsini təqdim edir.

- Qəhrəman müəllim, hadisənin ilk anlarını necə xatırlayırsınız?

- Hadisə özülün Şimal hissəsindən qalxan boru kəmərində qırılma baş verdi. Eyni anda partlayış və yanğın da oldu. Şimal-qərb küləyi olduğuna görə alov bütün platformanı bürüdü. Mən müəyyən təhlükəsizlik tədbirləri üçün müəyyən addımlar atmağa çalışsam da, alınmadı. Çünki suçiləmə sisteminə yaxınlaşa bilmirdim. Alov da getdikcə bizim yaşayış blokuna yaxınlaşırdı. Məcbur oldum ki, insanları təxliyə edim. Rəhbərliyə məlumat verdim ki, mən artıq heç nə edə bilmirəm. Bundan sonra camaatı şərq istimaqətindəki xilasedici qayıqlara yönəltdim. Qayıqlara da minmək mümkün olmadı. Çünki qara tüstü insanları boğurdu. Bir balaca təhlükəsiz yer şimal tərəf olduğuna görə 63 nəfəri ora yığmağa nail oldum. Bir müddət tərəddüd elədik, gözlədik ki, bəlkə külək istiqamətini dəyişər. Ancaq gördük ki, yanğın tədricən yaşayış blokuna yaxınlaşır, insanlar da təşvişə düşürlər, kimsə özünü atmaq, xilas olmaq istəyir. Buna şərait yaratmadım və hamısını saxladım. Məcburən xilasedici qayıqları müəyyən səviyyəyə saldıq ki, bu vəziyyətdən aralanaq. Ondan sonra bizi xilas edəcəklər. Həmin gün olan fırtınalar isə...

- Neçə ildir dənizdə işləyirsiniz?

- 1997-ci ildən neft sənayesindəyəm, 2004-cü ildən isə dənizdə çalışıram. Bu dərəcədə fırtına, fəlakət olmamışdı.

- Hamı xilasedici qayıqlara mindi?

- Bəli. Bir nəfər qayığın endirilməsinə kömək etdiyi üçün qalmışdı. O da sonra düşmüşdü aşağıya.

- 65 nəfərin hamısının xilas olmamağının səbəbi təkcə hava şəraiti idi, yoxsa qorxu, həyəcan da rol oynadı?

- Təbii ki, orada həyəcan və qorxu var idi. Sadəcə, istəyirdik ki, insanları sakitləşdirək. Mobil əlaqə vasitəsilə rəhbərlik bizə ümid verirdi, daha doğrusu konkret işlər görürdü. Mən danışanda xilasedici gəmilər ətrafımıza çatmışdılar. Gəmilər bir neçə dəfə yaxınlaşmaq istədi, alınmadı. Mən xahiş etdim ki, gəmi heç olmasa küləyin, dalğanın qarşısını alsın. Onlar da bir müddət elə etdilər. Buna baxmayaraq, külək biz olduğumuz qayığı kənara atdı. Fövqəladə Hallar Nazirliyinin xilasetmə briqadaları vertalyotla gəldilər. Görürdük ki, bizi xilas etmək istəyirlər.

- Bütün bu danışdıqlarınız nə qədər davam elədi?

- Axşamdan ora düşmüşdük. Ümumilikdə vəziyyət 18 saat davam elədi. Xilasedicilər bizi quraranda həyatlarına risk elədilər. O formada gəlib eniş elədilər... Bu, böyük şücaətdir.

- Özüldə neçə qayıq var idi?

- Özüldə dörd qayıq var idi və hər biri 42 yerlikdir. Sadəcə, biz ikisindən istifadə etdik.

- Rəhbərliklə necə əlaqə saxlayırdınız?

- Mobil şəbəkə də yaxşı işləmirdi, telefonların enerjisi bitirdi. Çox çətinliklə əlaqə saxlayırdıq.

- Sizin xəsarətiniz nə ilə bağlıdır?

- Qolumda sınıqlar var. Həmin vaxt qolumun ağrısını hiss etmirdim. Sonra hiss elədim ki, qolum qalxmır, sallanır.

- Xilas olacağınıza ümid var idi?

- Ümidlərini itirənlər var idi. Onlara təsəlli verirdik. Mən də deyirdimsə, həmin şey olurdu. Telefon əlaqəsinə çıxanda Rövnəq müəllim də danışdıqlarımı eşidirdi. Məsələn, deyirdim ki, filan gəmir burda olsun. Bir az keçəndən sonra həmin gəmi özünü çatdırırdı.

- Ailənizlə əlaqə saxlayırdınız?

- Bunu dünən də qeyd elədim. Həmin anda evlə əlaqə saxlamadım. Ayın yarısını dənizdə oluruq. Bir ailəm ordadırsa, bir ailəm də dənizdədir. Çünki ilin altı ayını bir yerdə səhər-axşam çörək yeyirik, danışırıq. Məndə bir telefon var, kontur da az, telefonun enerjisi də bitir. Ona görə ancaq rəhbərliklə danışırdım. Həm də evə zəng vurub nə deyəcəkdim ki? Hətta işçilərdən də xahiş elədim ki, evə məlumat verəndən sonra telefonlarınızı söndürün. Mənim konturum bitəndən sonra kimdə kontur və "zaryadka" var idisə, istifadə elədik. O bir möcüzə idi. Çalışdım ki, yanımda olanları sağ çıxarda bilim.

- Bəlkə digər qayıqda da sizin kimi bir istiqamətləndirici olsaydı, daha az itki ola bilərdi.

- Təhlükəsizlik mühəndisi Mahal müəllimlə bölüşmüşdük. O digər qayığa rəhbərlik etməliydi. Mən də bilirdim ki, işçilər onu eşidəcəklər.

İntiqam VALEHOĞLU
Fotolar: Nurlan Gülməmmədov