\"Bu gün dövlətçiliyimizə, istiqlalımıza təhdidlər var\"

Qanunsuz toplantı, mitinq və yürüşlərə görə cəzalar ağırlaşdırılıb.

Azərbaycanda qanunsuz toplantıların, mitinqlərin, yürüşlərin təşkili ilə bağlı məsuliyyət nəzərdə tutan maddənin adı və şərtləri dəyişdirilib, cəzalar ağırlaşdırılıb.

Bu dəyişiklik birmənalı qarşılanmayıb. Uzun müddətdir ki, ölkədə qanunsuz mitinq və yürüşlərin keçirilməməsini nəzərə alaraq qanundakı bu dəyişikliyin nəyə hesablandığını dəqiqləşdirmək qərarına gəldik.

Bu məsələ ilə bağlı millət vəkili Fəzail Ağamalı Ölkə.Az-a danışıb:

"Dünyada gedən prosesləri nəzərə almaq lazımdır. Bu gün dövlətçiliyimizə, istiqlalımıza təhdidlər var. Xaricdən maliyyələşən, hazırlanan layihələrdə iştirak edən insanlar var. Onlar müxtəlif təşkilatların çətiri altında özlərini sığortalamağa çalışırlar. Onlar siyasi partiyalarda, QHT-lərdə, mediada, dini icmalarda var. Ona görə də, dövlət özünün və vətəndaşlarının təhlükəsizliyini təmin etmək üçün reallığa söykənərək qanunvericilik aktlarına dəyişiklik edir. Bu da növbəti dəyişikliklərdən biridir. Söhbət Azərbaycan vətəndaşlarının təhlükəsizliyindən, ölkənin konstitusiya quruluşunun qorunub saxlanmasından gedir.

Bütün bunlar o demək deyil ki, böyük təhlükə gözlənilir. Sadəcə olaraq bu cür qanunlar qəbul edilir ki, hər kəs bundan nəticə çıxarsın, qanunsuz aksiyalara qatılmasın, qanunsuz aksiyalar keçirməsin. Keçirərsə, qanunvericilik qarşısında məsuliyyətini dərk etsin".

Səxavət Məmməd
Ölkə.Az