Nardaranda daha bir radikal həbs edildi

Nardaran qəsəbəsində daha bir dini radikal həbs edilib. O, 2015-ci ilin dekabr ayının 4-dən axtarışda idi.

Azərbaycan Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsi və Sabunçu rayon 13-cü Polis Bölməsinin əməkdaşlarının apardıqları birgə tədbirlər nəticəsində “Müsəlman birliyi hərəkatı”nın üzvü Seyfəddin Nurulla oğlu Şirvanov (1982-ci il təvəllüdlü) həbs edilib.

Ölkə.Az xəbər verir ki, bu barədə haqqin.az-a Sabunçu rayon Polis İdarəsindən bildiriblər.

S.Şirvanov noyabrın 26-da teoloq Taleh Bağırzadənin və onun 14 tərəfdaşının həbsindən sonra Nardaranda kütləvi iğtişaşlar yaratmaqda ittiham edilir. Dini radikal qəsəbə sakinlərini zorla hakimiyyəti ələ keçirməyə və ölkəni hakimiyyətə qarşı çıxmağa çağırırdı.

Sabunçu RPİ-dən bildiriblər ki, S.Şirvanova qarşı Cinayət Məcəlləsinin 214 (terrorizm), 220 (kütləvi iğtişaşlar), 228 (odlu silahın qanunsuz saxlanması, daşınması), 223 (ictimai asayişi pozan fəaliyyətin təşkili və bu işlərdə fəal iştirak etmə), 278 (hakimiyyəti zorla ələ keçirmə), 281 (hakimiyyətə qarşı açıq çağırış) və 283 (düşmənçilik və dini nifrətin yaradılması) maddələri ilə ittiham irəli sürülüb.

Qeyd edək ki, bu günə kimi Nardaran hadisələrinə görə, ümumilikdə 20 şübhəli şəxs saxlanılıb.

Ölkə.Az