Həftənin icmalı

“Günəşli”də xəsarət alanlardan 22 nəfər evə buraxılıb

07.12.2015

“Günəşli” yatağındakı 10-cu dərin dəniz özülündə baş verən güclü yanğın nəticəsində xəsarət alan vətəndaşlardan həmin gün ümumilikdə Səhiyyə Nazirliyinin Neftçilər Xəstəxanasına 31 müraciət daxil olub.

Bu barədə Ölkə.Az-a Səhiyyə Nazirliyinin mətbuat xidmətindən məlumat verilib.

Bildirilib ki, vəziyyəti yaxşı olan 22 nəfər, təkrar müayinələrə cəlb olunması şərti ilə, ambulator yardım göstərilərək evə buraxılıb:

“Bu gün həmin 22 nəfər yenidən müayinələrə cəlb olunublar. Onlardan 1 nəfəri ürək bulanma diaqnozu ilə xəstəxanada saxlamaq məsləhət görülüb. Həmin şəxsin heç bir həyati təhlükəsi yoxdur. Müxtəlif bədən xəsarətləri alan 8 nəfərə xəstəxanada lazımi səviyyədə tibbi yardım göstərilir.

 

Matəmi pozan televiziya və radiolara xəbərdarlıq edildi — ADLAR

07.12.2015

“Space” və “Xəzər” televiziyalarının, ANS ÇM, Jazz FM, Anten FM, Araz FM radiolarının proqram üzrə məsul şəxsləri dekabrın 7-də Milli Televiziya və Radio Şurasına (MTRŞ) çağırılıb.

MTRŞ-dan Ölkə.Az-a verilən məlumata görə, televiziya və radioların nümayəndələrinə dekabrın 6-da Azərbaycanda matəm günü olmasına baxmayaraq efirə reklam verdiklərinə görə irad tutulub, müvafiq tövsiyələr verilib.

Qurumdan bildirilib ki, “Günəşli” yatağının 10 saylı dərin dəniz özülündə baş verən qəza nəticəsində həlak olanların xatirəsini yad etmək məqsədi ilə Azərbaycan Prezidentinin sərəncamı ilə dekabrın 6-sı ölkə ərazisində matəm günü elan edilib:

“Matəm günündə “Space” TV, “Xəzər” TV, ANS ÇM, Jazz FM, Anten FM, Araz FM tərəfindən “Reklam haqqında” qanunun 20.8-ci maddəsinin tələbləri pozulub, yayımçılar tərəfindən reklam blokları yayımlanıb”.

 

Azərbaycanda böyük əfv gözlənilir

07.12.2015

Prezident yanında Əfv Məsələləri Komissiyası iclasa toplaşıb.

Bu barədə Ölkə.Az Modern.az-a istinadən xəbər verir.

Sayt qeyd edir ki, iclasda əfvlə bağlı müraciətlər və bununla əlaqədar digərə məsələlər müzakirə olunur.

Komissiyanın adının çəkilməməsini istəyən üzvü bildirib ki, 31 dekabr Dünya Azərbaycanlılarının Həmrəyliyi günü münasibətilə Azərbaycan Prezidenti tərəfindən əfv sərəncamı imzalanacaq.

Budəfəki sərəncamın daha çox məhkuma şamil olunacağı gözlənilir.

 

Azərbaycanda yaşayış minimumu artırıldı

07.12.2015

Azərbaycan Prezidenti İlham Əliyev Azərbaycan Respublikasında 2016-cı il üçün yaşayış minimumu haqqında qanununu təsdiq edib.

Qanunda deyilir:

“Maddə 1. Əhalinin əsas sosial-demoqrafik qrupları üzrə yaşayış minimumunun məbləği

2016-cı il üçün yaşayış minimumu ölkə üzrə 136 manat, əmək qabiliyyətli əhali üçün 146 manat, pensiyaçılar üçün 115 manat, uşaqlar üçün 117 manat məbləğində müəyyən edilsin.

Maddə 2. Qanunun qüvvəyə minməsi

Bu Qanun 2016-cı il yanvarın 1-dən qüvvəyə minir”.

Qeyd edək ki, bundan əvvəl yaşayış minimumu ölkə üzrə 131 manat, əmək qabiliyyətli əhali üçün 140 manat, pensiyaçılar üçün 108 manat, uşaqlar üçün isə 108 manat idi.

 

Leyla Əliyeva Fransa prezidenti ilə görüşdü

08.12.2015

Heydər Əliyev Fondunun vitse-prezidenti, IDEA İctimai Birliyinin rəhbəri Leyla Əliyeva Parisdə BMT-nin İqlim Dəyişikliyi üzrə 21-ci Konfransı (COP21) çərçivəsində təşkil olunan rəsmi qəbulda iştirak edib.

Rəsmi qəbul bu ölkənin Ekologiya, Davamlı İnkişaf və Enerji Nazirliyi tərəfindən təşkil olunub. Tədbirdə Fransa Respublikasının Prezidenti Fransua Olland iştirak edib.

 

Azərbaycan Ordusu düşmənin sığınacağını məhv etdi

08.12.2015

Azərbaycan Ordusu düşmənin sığınacağını məhv edib.

Müdafiə Nazirliyinin mətbuat xidmətindən Ölkə.Az-a verilən məlumata görə, Silahlı Qüvvələrimizin bölmələri tərəfindən qoşunların təmas xəttində Ermənistan silahlı qüvvələrinə məxsus sığınacaqda olan hərbi texnika sərrast atəşlə məhv edilib.

 

Daxili Qoşunlar Nardarana nəzarət edir

08.12.2015

Hüquq-mühafizə orqanlarının Nardaran qəsəbəsində əməliyyatı davam edir.

Ölkə.Az xəbər verir ki, APA-nın məlumatına görə, qəsəbənin giriş və çıxışlarında qoyulmuş polis postları hələ götürülməyib.

Qəsəbəyə daxil olan və çıxan hər kəs yoxlanılır. Nardaran sakinlərinin qəsəbəyə daxil olmasına heç bir məhdudiyyət yoxdur. Nardaranın mərkəzi meydanlarına Daxili Qoşunların qüvvələri nəzarət edir.

 

Xəsarət alan neftçilərə ödəniləcək sığortanın məbləği açıqlandı

08.12.2015

"PASHA Life" tərəfindən "Günəşli" yatağındakı platformada xəsarət alanların hər birinin ailəsinə sığorta ödənişlərinin məbləği təqribən 140 min manata çata bilər.

Bunu əmək və əhalinin sosial müdafiəsi naziri Səlim Müslümov jurnalistlərə deyib.

 

MTN generalı quldurluqda ittiham olundu

08.12.2015

MTN generalı quldurluqda, adam oğurluğunda və daha 7 cinayətdə ittiham olundu.

Milli Təhlükəsizlik Nazirliyinin (MTN) Transmilli İqtisadi Cinayətkarlığa Qarşı Mübarizə Baş İdarəsinin (TİCQMBİ) sabiq rəisi, general-mayor Sübahir Qurbanova qarşı irəli sürülən ittihamlar məlum olub.

“Report”un əldə etdiyi məlumata görə, rəsmi ittihama əsasən S.Qurbanov MTN-in TİCQMBİ-nə rəis təyin edildikdən sonra cinayətkar dəstə yaradıb.

 

Jurnalist adından sui-istifadəyə görə cəza ağırlaşdırılır

08.12.2015

Jurnalist adından sui-istifadə edilməsi ilə bağlı cəzalar ağırlaşdırılır

Azərbaycanda jurnalist adından sui-istifadə edilməsi halları ilə bağlı cəzalar ağırlaşdırılır.

APA-nın məlumatına görə, bu məsələ Milli Məclisin Hüquq siyasəti və dövlət quruculuğu komitəsinin bu gün keçirilən iclasında müzakirəyə çıxarılan yeni İnzibati Xətalar Məcəlləsində əksini tapıb.

Yeni Məcəllənin 387-ci maddəsində kütləvi informasiya azadlığından və jurnalist hüququndan sui-istifadə etməyə görə fiziki şəxslər 200 manatdan 300 manata qədər, vəzifəli şəxslər 500 manatdan 700 manata qədər, hüquqi şəxslər isə 2 min manatdan 3 min manata qədər cərimə olunacaq.

 

Ev telefonu çəkdirmək istəyənlər üçün yenilik

08.12.2015

Rabitə və Yüksək Texnologiyalar Nazirliyinin elektron xidməti telefon xətti çəkdirmək istəyən vətəndaşlar üçün yenilik edib.

Ölkə.Az nazirliyin məlumatına əsasən bildirir ki, indiyədək “Elektron hökumət” portalı (e-gov.az) üzərindən “Yeni telefon çəkilişi” xidmətindən 7294 dəfə istifadə olunub.

Bu xidmət hazırda Bakı şəhəri (BTRİB-in əhatə dairəsi) üçün aktivdir. Məlumatda bildirilib ki, vətəndaşlar “Elektron hökumət” portalında onlayn müraciət formasını doldurmaqla və onlayn ödəniş etməklə bir neçə dəqiqə ərzində telefon çəkilişi xidmətini sifariş edə, hətta istədiyi nömrəni ekrandan seçə bilərlər. Sifariş qəbul olunduqdan sonra 2-3 gün ərzində mənzilə telefon çəkilir. Telefon çəkilişi tarifi 30 manatdır. Nömrə seçildiyi təqdirdə əlavə haqq ödəmək lazım gəlir. Xatırladaq ki, “Rabitə xidmətlərinin keyfiyyətinin yüksəldilməsi aylığı” çərçivəsində dekabrın 20-dək mənzilə eyni zamanda 2 ədəd yeni telefon çəkilişinin 1 ədədi, təşkilata eyni zamanda 3 ədəd telefon çəkilişinin 1 ədədi ödənişsiz sənədləşdirilir.

 

Nardarana işıq verildi

08.12.2015

Bakının Nardaran qəsəbəsində elektrik enerjisinin verilişi bərpa edilib.

Bu barədə APA-ya qəsəbə sakini Natiq Kərimov məlumat verib. Onun sözlərinə görə, bu gün axşamdan qəsəbənin küçə və meydanlarına elektrik enerjisi verilib:

“Əhaliyə isə hələlik elektrik enerjisi verilmir. Deyilənə görə, yaxın günlərdə əhaliyə də elektrik enerjisinin verilişi bərpa ediləcək”.

 

Bazarlarda qiymətlər "od tutub yanır"

09.12.2015

Bakıda bazarlarda meyvə və tərəvəzlərin qiymətlərində artım müşahidə olunur.

“Yaşıl bazar” və Keşlə bazarında aparılan müşahidələr bunu deməyə əsas verir. Qiymətlərin artımını satıcılar da təsdiqləyirlər. Satıcılar bildiriblər ki, qiymət artımı dekabrın əvvəlindən başlayıb. Belə ki, əvvəllər kq-ı 60 qəpiyə satılan kartof hazırda alıcılara 70 və 80 qəpiyə təklif edilir. Soğanın da qiymətində artım var. Bu ayın əvvəlinə kimi kq-ı 50 qəpik olan soğan indi 10 qəpik baha satılır. Tərəvəzlə yanaşı, meyvələrin qiymətində də artım müşahidə olunur. Məsələn, narın kq-ı ötən ay 1 manat 20 qəpiyə təklif olunurdusa, hazırda 1 manat 50 qəpiyə satılır. Analoji vəziyyət naringi, üzüm və almanın qiymətlərinə dı aiddir.

Alıcılar isə deyirlər ki, qiymətlər süni şəkildə artırılır: “Hər il bayram ərəfəsində belə hallarla üzləşirik. Süni olaraq qiymətləri artırırlar. Kartofun vedrəsini rayonlarda 50 qəpiyə verirlər, Bakıda isə 3 ədəd kartofu 70 qəpiyə satırlar. Bilirlər ki, insanların tələbatı var, bayramda insanlar gəlib alış-veriş edəcəklər, ona görə də qəsdən qiymətləri artırırlar”.

 

Qanunsuz balıq ovu ilə bağlı reydlər keçirilir

09.12.2015

Ekologiya və Təbii Sərvətlər Nazirliyi tərəfindən qanunsuz balıq ovu ilə bağlı reydlər davam etdirilir.

Ekologiya və Təbii Sərvətlər Nazirliyinin mətbuat xidmətindən verilən məlumata görə, keçirilən genişmiqyaslı reydlər zamanı tərkibində qeyri-hökumət təşkilatlarının (QHT), ictimaiyyət nümayəndələrinin və nazirliyin mütəxəssislərinin təmsil olunduğu qruplar Xəzər dənizinin Azərbaycana mənsub olan bölməsində və daxili su obyektlərində, o cümlədən çaylar, kanallar və kollektorlarda rast gəlinən bir sıra neqativ halları aradan qaldırıb.

 

Ermənistanın növbəti pilotsuz uçan aparatı məhv edilib

09.12.2015

Dekabrın 9-da Ermənistan Silahlı Qüvvələrinin növbəti pilotsuz uçan aparatı məhv edilib.

Müdafiə Nazirliyindən verilən məlumata görə, dekabrın 9-da saat 9.00 radələrində Tərtər rayonu istiqamətində Silahlı Qüvvələrimizin mövqeləri üzərində uçuşlar həyata keçirməyə cəhd göstərən Ermənistan Silahlı Qüvvələrinə məxsus növbəti DJI Inspire 1 (Quadcopter) tipli pilotsuz uçan aparat (PUA) bölmələrimizin sayıqlığı nəticəsində vaxtında aşkar olunaraq açılan atəş nəticəsində məhv edilib.

 

Nardaranda Natiq Kərimov saxlanıldı

09.12.2015

Bu gün Nardaran kənd sakini Natiq Kərimov qəsəbədə saxlanılıb.

H.Kərimovun yaxını və kənd sakinlərinin Trend-ə bildirdiyinə görə, onun hara aparıldığı məlum deyil. N.Kərimov Nardaranda Ağsaqqallar Şurasının sədri sayılır.

 

Baş Prokurorluq Fuad Qəhrəmanlı ilə bağlı açıqlama yaydı

09.12.2015

Baş Prokurorluq Fuad Qəhrəmanlının saxlanılması ilə bağlı məlumat yayıb.

Baş Prokurorluğun Mətbuat Xidmətindən Ölkə.Az-a verilən məlumata görə, 2015-ci il noyabrın 26-da silahlı cinayətkar dəstə tərəfindən Nardaran qəsəbəsində dini ekstremist fəaliyyətin həyata keçirilməsi, ictimai qaydanın pozulması, terror aktları və ölümlə nəticələnən digər cinayətlər törədilməsi faktları ilə bağlı Baş Prokurorluqda istintaq edilən cinayət işi üzrə Abşeron rayon sakini, hüquqi qeydiyyatdan keçməyən AXCP-nin sədr müavini Fuad Qəhrəmanlı şahid qismində dindirilməsi üçün dekabrın 8-də telefon vasitəsi ilə Baş Prokurorluğun Ağır cinayətlərə dair işlər üzrə istintaq idarəsinə dəvət edilmiş, lakin rəsmi çağırış vərəqi tələb etdiyindən, idarənin əməkdaşları tərəfindən həmin tarixdə ona yaşadığı ünvanda rəsmi qaydada çağırış vərəqi təqdim olunmaqla idarəyə dəvət edilmiş və şahid qismində dindirilmişdir.

 

Azərbaycanda qadınlar hərbi xidmətə çağırılır

09.12.2015

Daxili İşlər Nazirliyinin Daxili Qoşunlarının Baş İdarəsi qadınların hərbi xidmətə qəbulunu elan edib.

Daxili Qoşunların mətbuat xidmətindən Ölkə.Az-a verilən məlumata görə, Baş İdarə Azərbaycan Respublikasının qadın vətəndaşlarını könüllülük əsasında müddətdən artıq həqiqi hərbi xidmətə qəbul edir.

Xidmətə qəbulun şərtləri: hərbi xidmətə yararlı, fiziki hazırlıqlı, idman cüssəli; boy ölçüsü 170 sm-dən yuxarı; yaşı 19-dan aşağı və 25-dən yuxarı olmayan; ən azı orta təhsilli.

 

Leyla Yunus azadlığa buraxıldı

09.12.2015

Bakı Apellyasiya Məhkəməsində Sülh və Demokratiya İnstitutunun (SDİ) həbsdə olan direktoru Leyla Yunus və həyat yoldaşı Arif Yunusun barəsində olan hökmdən verilən apellyasiya şikayəti üzrə məhkəmə iclası davam etdirilib.

Hakim Vüqar Məmmədovun sədrlik etdiyi məhkəmə iclasda Leyla Yunusun şərti olaraq azadlığa buraxılması barədə qərar qəbul olunub. Leyla Yunus məhkəmə zalından azadlığa buraxılıb.

Qeyd edək ki, Leyla Yunus Cinayət Məcəlləsinin 274-cü (Dövlətə xəyanət), 178.3.2-ci (Dələduzluq (külli miqdarda ziyan vurmaqla törədildikdə)), 192.2.2-ci (Qanunsuz sahibkarlıq (külli miqdarda gəlir əldə etməklə törədildikdə)), 213.2.2-ci ((Vergi ödəməkdən yayınma) külli miqdarda törədildikdə), 320.1-ci (Hüquq verən və ya vəzifədən azad edən vəsiqəni və ya digər rəsmi sənədi istifadə etmək məqsədi ilə saxtalaşdırma və ya qanunsuz hazırlama, yaxud bu cür sənədi satma, habelə eyni məqsədlə Azərbaycan Respublikasının saxta dövlət təltifini, ştampı, möhürü, blankı hazırlama və ya satma) və 320.2-ci (Bu Məcəllənin 320.1-ci maddəsində göstərilmiş bilə-bilə saxta sənədlərdən istifadə etmə) maddələri, Arif Yunus isə 178.3.2-ci (dələduzluq) və 274-cü (Dövlətə xəyanət) maddələri ilə təqsirləndirilir. Hər iki şəxsin barəsində olan Cinayət Məcəlləsinin 274-cü (Dövlətə xəyanət) maddəsi üzrə cinayət işi ayrı icraata verilib.

 

Azərbaycanda fahişəliyə görə cərimə artırılır

09.12.2015

Azərbaycanda əxlaqsızlıqla məşğul olanlara tətbiq edilən cərimənin miqdarının artırılması planlaşdırılır.

Ölkə prezidenti tərəfindən Milli Məclisə təqdim edilmiş yeni İnzibati Xətalar Məcəlləsinin 523-cü maddəsində əxlaqsızlıqla məşğul olan şəxslərin 100 manat məbləğində cərimələnməsi nəzərdə tutulur.

Qüvvədə olan İnzibati Xətalar Məcəlləsində bu əmələ görə cərimənin miqdarı 35-40 manat təşkil edir.

 

Nardaranda polis bölməsi yaradılır

09.12.2015

Bakının Nardaran qəsəbəsində yeni polis bölməsi üçün inzibati bina tikilir.

Ölkə.Az "Report"-a istinadən xəbər verir ki, bu, Bakının 42-ci polis bölməsi olacaq.

Polis bölməsi Nardaran və qonşu qəsəbələrdə təhlükəsizliyi təmin etmək məqsədilə yaradılır.

İndiyədək qəsəbədə polis bölməsi olmayıb. Nardarana ən yaxın polis bölməsi Maştağa qəsəbəsindəki Sabunçu Rayonu Polis İdarəsinin 14-cü Polis Bölməsidir.

 

Sabiq icra başçısı məhkəmə zalında həbs edildi

09.12.2015

Bakı Ağır Cinayətlər Məhkəməsində Rafiq Alışovun cinayət işi üzrə məhkəmə prosesi başlayıb.

Ölkə.Az xəbər verir ki, APA-nın məlumatına görə, hazırlıq iclasında təqsirləndirilən şəxsin anket məlumatları dəqiqləşdirilib.

Daha sonra zamində olan R. Alışovun barəsində həbs qətimkan tədbiri seçilib.

O, məhkəmə zalında həbs edilib. Məhkəmənin baxış iclası dekabrın 18-ə təyin edilib.

 

Azərbaycanın Milli Qəhrəmanı nişanı qızıldan olacaq — FOTO

09.12.2015

Azərbaycanın Milli Qəhrəmanı xüsusi nişanı ("Qızıl Ulduz" medalı) və “Şah İsmayıl” ordenin təsviri və tərkibi dəyişdirilir.

Milli Məclisdən Ölkə.Az-a verilən məlumata görə, bununla bağlı “Azərbaycan Milli Qəhrəmanının xüsusi fərqlənmə nişanını təsis etmək haqqında” və “Azərbaycan Respublikasının “Şah İsmayıl” ordeninin statutunun və təsvirinin təsdiq edilməsi haqqında” qanunlara dəyişikliklər edilir.

“Azərbaycan Milli Qəhrəmanının xüsusi fərqlənmə nişanını təsis etmək haqqında” qanuna təklif edilən dəyişikliyə əsasən, nişanın ilgək və halqa vasitəsi ilə 27 mm x 20 mm olan ölçüsü dəyişdirilərək ilgək, halqa və 40 mm enində üçkünc element vasitəsilə 37 mm x 50 mm ölçüdə edilir. Qanunun 1.2.2-ci maddəsində isə “qızıl suyuna çəkilmiş” sözləri “qızıldan” sözləri ilə əvəz edilir.

 

Ermənistanın daha bir pilotsuz aparatı məhv edildi

09.12.2015

Ermənistan ordusunun növbəti pilotsuz uçan aparatı məhv edilib.

Ölkə.Az xəbər verir ki, bu barədə Azərbaycan Müdafiə Nazirliyinin dekabrın 9-da yaydığı məlumatda bildirilir.

Məlumata görə aparat dekabrın 9-u saat 9.00 radələrində Tərtər rayonu istiqamətində Azərbaycan ordusunun mövqeləri üzərində uçmaq istəyərkən vurulub.

Həmin cihazın DJI Inspire 1 (Quadcopter) tipli pilotsuz aparat olduğu bildirilir.

 

 

Dövlət qulluqçuları attestasiyadan keçiriləcək

10.12.2015

Nazirlər Kabineti “Dövlət qulluqçusunun attestasiyasının keçirilməsi Qaydaları”nı təsdiq edib.

İnzibati və yardımçı vəzifələri tutan hər bir dövlət qulluqçusu “Dövlət qulluğu haqqında” qanunda başqa hal nəzərdə tutulmayıbsa, 5 ildə bir dəfədən çox olmayaraq attestasiyadan keçirilməlidir.

 

Mehriban Əliyeva ən gözəl birinci xanımlar sırasında

10.12.2015

Xarici mətbuat dünyada ən gözəl hesab olunan birinci xanımların siyahısını dərc edib.

Siyahıda Azərbaycanın birinci ledisi Mehriban Əliyeva da yer alıb.

 

Mədət Quliyev Eldar Mahmudovun daha bir qadağasını ləğv etdi

10.12.2015

Azərbaycan Milli Təhlükəsizlik Nazirliyinin (MTN) İstintaq Təcridxanasında “Həbs yerlərində saxlanılan şəxslərin hüquq və azadlıqlarının təmin edilməsi haqqında” qanunun tətbiqinə real olaraq başlanılıb.

Ölkə.Az “Report”a istinadən xəbər verir ki, bunu vəkil Cavad Cavadov bildirib.

Vəkil qeyd edib ki, bu, MTN rəhbərliyinin dəyişməsi ilə bağlıdır:

“Artıq həbsdə saxlanılan şəxslər qanunun tələbinə görə zəng etmək hüququndan mütəmadi istifadə edirlər və ailələri ilə görüşmək hüququ təmin olunur. Bu təcridxananın hüquqi statusu məsələsini kənara qoysaq, bunu müsbət addım kimi dəyərləndirmək lazımdır. Çünki bu hüquqlar bu təcxridxanadan indiyə kimi təmin olunmurdu”.

 

 

Daha bir yüksək vəzifəli məmur vəzifəsindən azad edildi

10.12.2015

Rabitə və Yüksək Texnologiyalar Nazirliyinin Aparat rəhbərinin müavini İlham Mərdanov tutduğu vəzifədən azad edilib.

Bu gün İ.Mərdanovun fotosu və haqqında məlumat nazirliyin rəsmi saytından çıxarılıb. İ.Mərdanov sabiq təhsil naziri Misir Mərdanovun qardaşıdır.

Xatırladaq ki, bundan öncə Aparat rəhbəri Vidadi Zeynalov vəzifəsindən uzaqlaşdırılıb. Səbail Rayon Məhkəməsinin qərarı ilə V.Zeynalov barəsində 3 ay müddətinə həbs-qətimkan tədbiri seçilib. V.Zeynalov Cinayət Məcəlləsinin 179.3.2 (Mənimsəmə və ya israf etmə; külli miqdarda törədildikdə;) və 308.2-ci (Vəzifə səlahiyyətlərindən sui-istifadə) maddələri ilə ittiham olunur.

 

Sərxoş sürücülər daha böyük məbləğdə cərimələnəcəklər

10.12.2015

Azərbaycanda nəqliyyat vasitəsini idarə etmək hüququ olan şəxs tərəfindən nəqliyyat vasitəsini alkoqoldan, narkotik vasitələrdən, psixotrop maddələrdən və ya güclü təsir göstərən digər maddələrdən istifadə olunması nəticəsində sərxoş vəziyyətdə idarə edilməsinə görə tətbiq olunan cərimənin məbləği artırılır.

Ölkə.Az “Report”-a istinadən xəbər verir ki, cəzanın sərtləşdirilməsi yeni İnzibati Xətalar Məcəlləsində (İXM) nəzərdə tutulub.

 

Valideynlər üçün cərimənin məbləği artırılır

10.12.2015

Azərbaycanda yetkinlik yaşına çatmayanların tərbiyə və təlimi vəzifələrini lazımınca yerinə yetirməyən valideynlər üçün müəyyən edilən cərimənin məbləği artırılır.

Ölkə.Az-ın Trend-ə istinadən məlumatına görə, Milli Məclisin Ailə, qadın və uşaq məsələləri komitəsinin bu gün keçirilən iclasında İnzibati Xətalar Məcəlləsinin 51-ci maddəsinin yeni redaksiyada verilməsi təklif edilib.

Belə ki, Azərbaycanda yetkinlik yaşına çatmayanların tərbiyə və təlimi vəzifələrinin valideynlər və ya onları əvəz edən şəxslər tərəfindən üzrlü səbəblər olmadan yerinə yetirilməməsinə və ya lazımınca yerinə yetirilməməsinə görə onlara xəbərdarlıq ediləcək və ya 40 manatdan 60 manatdək miqdarda cərimə ediləcək.

 

Azərbaycan bayrağını düz tutmayanları sərt cəzalar gözləyir

10.12.2015

Azərbaycanın Dövlət bayrağının istifadəsi qaydalarının pozulmasına görə sərt cəzalar müəyyənləşdirilir.

Ölkə.Az xəbər verir ki, APA-nın məlumatına görə, yeni hazırlanmış İnzibati Xətalar Məcəlləsinin 583-cü maddəsinə görə, Azərbaycan Respublikası Dövlət bayrağının istifadəsi qaydalarının pozulmasına görə vəzifəli şəxslər 400 manatdan 600 manata qədər, hüquqi şəxslər isə 1 500 manatdan 2 000 manata qədər cərimələnəcəklər.

 

Azərbaycandan məcburi çıxarılan əcnəbilərin sayı açıqlandı

10.12.2015

Dövlət Miqrasiya Xidməti (DMX) tərəfindən 2015-ci ilin noyabr ayı ərzində 1848 əcnəbi tərəfindən Azərbaycanda olma, habelə müvəqqəti və daimi yaşama qaydalarına əməl etmədən inzibati qanunvericiliyin tələblərinin pozulması halları müəyyən edilib.

Bu barədə Xidmətdən Ölkə.Az-a bildirilib.

“Onlardan 12-nin Azərbaycan ərazisində müvəqqəti və ya daimi yaşamaq üçün əsas verən sənədləri itirildiyindən yenisi ilə əvəz olunub, 142 nəfərin ölkə ərazisində yaşamaları leqallaşdırılıb, 1301 əcnəbinin ölkə ərazisini 48 saat ərzində tərk etmələri, 393 əcnəbinin isə inzibati qaydada ölkə hüdudlarından kənara çıxarılmaları barədə qərarlar qəbul edilib.

 

Nardaranda məscid bağlandı

11.12.2015

Nardaran qəsəbəsində yerləşən Rəhimə xanım ziyarətgahının Hüseyniyyə məscidi bağlanıb.

Bu barədə Trend-ə Nardaran sakinləri məlumat verib.

Sakinlər bildiriblər ki, Hüseyniyyə məscidi Nardaran ziyarətgahının axundu Hacı Nuhbala Rəhimovun həbsindən sonra bağlanılıb. Məlumata görə, özünü “Müsəlman birliyi hərəkatı” adlandıran qurumun üzvləri bu məsciddə namaz qılırmış.

Xatırladaq ki, Nardarandakı Rəhimə xanım ziyarətgahının axundu Hacı Nuhbala Rəhimov bir neçə gün öncə Nardaran hadisələrində təqsirli bilinərək Sabunçu Rayon Polis İdarəsinin əməkdaşları tərəfindən saxlanılaraq barəsində Sabunçu rayon Məhkəməsinin qərarı ilə 12 sutkalıq həbs qətimkan tədbiri seçilib.

 

Mədət Quliyev: "250 əməkdaş MTN-dən xaric edilib"

11.12.2015

“Azərbaycan Milli Təhlükəsizlik Nazirliyində ixtisarların olacağı gözlənilir”

Ölkə.Az xəbər verir ki, bunu milli təhlükəsizlik nazirinin birinci müavini, milli təhlükəsizlik naziri vəzifəsini icra edən, general-leytenant Mədət Quliyev jurnalistlərə açıqlamasında bildirib.

General qeyd edib ki, MTN-dəki vəzifəsindən azad olunanların yerinə hələlik təyinat olmayıb: “Əksinə, müəyyən nöqsanlara yol verdiyinə görə 250 nəfərə yaxın əməkdaş MTN sıralarından xaric edilib. Biz düşünürük ki, MTN operativ və çevik olmalıdır”.

 

ANS-də 4 veriliş bağlandı

11.12.2015

ANS telekanalında verilişlərin bağlanması davam edir.

Ölkə.Az Publika.az-a istinadən xəbər verir ki, ANS telekanalında “Şoubiz”, “İç Xəbər”, “İtibucaq” və “Düzbucaq” verilişləri bağlanıb.

Xəbərdə bildirilir ki, bu telekanal rəhbərinin şəxsi qərarıdır və bu verilişlərin yayımının dayandırılmasında Milli Teleradio Şurasının göstərişi olmayıb.

Qeyd edək ki, adıçəkilən verilişlər həftənin 6 günü yayımlanırdı.

 

160 nəfərin ölkədən çıxışına qadağa qoyuldu

11.12.2015

Vergi borclarının alınması mexanizmlərinin təkmilləşdirilməsi məqsədilə bu il qəbul edilmiş dəyişikliklərdə hesablanmış vergilər üzrə borcların və faizlərin, tətbiq edilmiş maliyyə sanksiyalarının ödənilməsinin təmin edilməsi üsulu kimi vergiödəyici olan fiziki şəxslərin və ya hüquqi şəxslərin icra orqanının rəhbərinin ölkədən getmək hüququnun müvəqqəti məhdudlaşdırılması barədə məhkəməyə müraciət etmək vergi orqanlarının hüquqlarına aid edilib.

Ölkə.Az-ın məlumatına görə, bunu AZƏRTAC-a müsahibəsində vergilər naziri Fazil Məmmədov deyib.

 

“Günəşli”də axtışlara “Azərkosmos” da qoşulur

11.12.2015

Dekabrın 10-da “Günəşli” yatağındakı 10 saylı dərin dəniz özülündə baş vermiş qəza ilə əlaqədar yaradılmış işçi qrupunun növbəti iclası keçirilib.

SOCAR-ın mətbuat xidmətindən verilən məlumatına görə, iclasda fövqəladə hallar nazirinin müavini Tapdıq Əmiraslanov, Ekologiya və Təbii Sərvətlər Nazirliyinin məsul əməkdaşları, SOCAR-ın vitse-prezidentləri Rəfiqə Hüseynzadə, Rəhman Qurbanov, habelə BP şirkətinin vitse-prezidenti Robert Vat və mütəxəssislər iştirak ediblər.

 

SOCAR dövlət büdcəsinə ödənişləri azaltdı

11.12.2015

SOCAR 2015-ci ilin noyabr ayında dövlət büdcəsinə 133 milyon 599 min manat vəsait ödəyib. Bu ötən ilin eyni dövrü ilə müqayisədə 8 milyon 774 min manat yaxud 6,16% azdır.

Bu barədə SOCAR-dan Ölkə.Az-a bildirilib.

“Ümumiyyətlə, 2015-ci ilin yanvar-noyabr aylarında büdcəyə 1 milyard 404 milyon 875 min manat (azalma 17,70%) vəsait ödənilib”, - deyə şirkətdən qeyd edilib.

Bundan əlavə, cari ilin noyabr ayında SOCAR Dövlət Sosial Müdafiə Fonduna 11 milyon 189 min manat vəsait köçürüb.

Qeyd edək ki, bu göstərici ötən ilin noyabr ayı ilə müqayisədə 571 min manat və ya 105,4% çox olub. 2015-ci ilin yanvar-noyabr aylarında isə Şirkət tərəfindən Dövlət Sosial Müdafiə Fonduna ödəniş 126 milyon 606 min manat (azalma 2,26%) təşkil edib.

 

Heydər Əliyevin vəfatından 12 il ötür

12.12.2015

Mərhum prezident 2003-cü ildə dünyasını dəyişib.

Azərbaycan xalqının ümummilli lideri Heydər Əliyevin vəfatından 12 il keçir.

Azərbaycanın bütün bölgələrində, o cümlədən paytaxt Bakıda ümummilli lider Heydər Əliyevin anım mərasimləri təşkil olunur.

Dövlət qurumları, siyasi partiyalar, QHT, media orqanları və ictimaiyyətin nümayəndələri bu günlərdə Heydər Əliyevin Fəxri xiyabandakı məzarını ziyarət edirlər.

Azərbaycanın xarici ölkələrdə fəaliyyət göstərən diaspor təşkilatları da Heydər Əliyevin vəfatının 12-ci ildönümü ilə əlaqədar anım mərasimləri təşkil edirlər.

Ölkə.az