Moskvada Heydər Əliyevin vəfatının 12-ci ildönümünə həsr olunmuş tədbir keçirilib

Moskvada Heydər Əliyevin vəfatının 12-ci ildönümü münasibətilə anım mərasimi keçirilib.

APA-nın Moskva müxbirinin verdiyi məlumata görə, Azərbaycanın Rusiyadakı səfirliyində keçirilən mərasimdə Rusiya prezidentinin səlahiyyətli nümayəndəsi Aleksandr Beqlov, prezidentin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy, Rusiya Mərkəzi Seçki Komissiyasının sədri Vladimir Çurov, bir sıra xarici ölkələrin səfirləri, Rusiya və Azərbaycanın ictimai xadimləri iştirak ediblər.

Tədbiri giriş söz ilə açan Azərbaycanın Rusiyadakı səfiri Polad Bülbüloğlu 12 dekabr tarixinin bütün azərbaycanlılar üçün ağır və faciəvi gün olduğunu söyləyib: “Düz 12 il bundan əvvəl bu gün Azərbaycan xalqının lideri, görkəmli siyasi xadim Heydər Əliyev dünyasını dəyişib. Bu gün bütün Azərbaycan xalqı üçün ağır və kədərli gündür".

Səfir Heydər Əliyevin həyatının böyük bir hissəsinin Moskva ilə bağlı olduğunu qeyd edib: "Bu gün bu zalda vaxtı ilə Moskvada Heydər Əliyevlə birgə çalışanlar əyləşib. Onların hər birinin Heydər Əliyevlə bağlı xatirələri var. Heydər Əliyevin kurasiyasında SSRİ-nin 18 nazirliyi və qurumu olub. Elə bu rəqəmin özü də nəsə deyir".

Diplomat bildirib ki, 1993-cü ildə Heydər Əliyev yenidən hakimiyyətə qayıtmaqla, Azərbaycanın xilaskarı olub: "Heydər Əliyevin nüfuzu, ağılı və bacarığı sayəsində Azərbaycan qısa müddət ərzində düzgün inkişaf yoluna qədəm qoyub. Heydər Əliyev öz müdrikliyi sayəsində müasir Azərbaycanın memarı hesab edilir. Heydər Əliyev siyasi xətti hazırda prezident İlham Əliyev tərəfindən layiqincə davam etdirilir".

Sonra M. Şvıdkoy çıxış edərək qeyd edib ki, Heydər Əliyevi təkcə Azərbaycanda deyil, Rusiyada da xatırlayırlar. “Əminəm ki, keçmiş sovet məkanının digər ölkələrində də Heydər Əliyev yad olunur. Qeyri-adi müdrikliyi, dərin analitik düşüncəyə sahib olan insan həm Azərbaycan, həm də SSRİ məkanına daxil olan ölkələr üçün çox şeylər edib. Əlbəttə ki, Heydər Əliyev müasir Azərbaycanın taleyində tarixi rol oynayıb. Əminəm ki, onun iradəsi, 90-cı illərin əvvəlində Cənubi Qafqazda gedən geosiyasi proseslərə yanaşması nəticəsində Azərbaycanın həqiqi müstəqilliyi təmin olunub. Əgər Heydər Əliyev olmasaydı, Azərbaycanın taleyi əsrin sonunda başqa cür olardı".

Tədbirdə həmçinin Rusiya baş nazirinin sabiq müavini, Rusiya istehsalçıları İttifaqının prezidenti Oleq Soskovets çıxış edib. O, Heydər Əliyevlə bağlı xatirələrindən danışıb: “Deyə bilərəm ki, məhz Heydər Əliyevin sayəsində Azərbaycanın müstəqilliyi tam təmin olundu. O hər zaman Rusiyanın dostu olaraq qaldı və bu xatirəni biz hər zaman qoruyub saxlayacağıq. Ona təşəkkür edirik ki, bu gün biz bir yerdəyik. Təşəkkür edirik ki, bu gün Azərbaycan və Rusiya çox düzgün istiqamətdə olan yolla gedirlər".

Tədbirin sonunda ehsan süfrəsi açılıb.

Ölkə.Az