Araşdırmaçıdan Araz Əlizadəyə cavab: \"O, İran kəşfiyyatının dili ilə danışır\"

Millət vəkili Araz Əlizadə türkləri və tarixçiləri tənqid edib

Araz Əlizadə bildirib ki, türklər monqollardan törəmədirlər və özlərini tarixçi hesab edənlər monqolların, qazaxların, türkmənlərin, özbəklərin sifətinə və sonra da öz sifətlərinə baxsınlar, əgər monqollara oxşarlıqları varsa, özlərini monqol hesab etsinlər. 1990-cı illərdə bizim türk kökənli olmağımızı bisavad xalq cəbhəçiləri ortaya atıblar və bunu da gənclərin beyninə yeridiblər.

Araz Əlizadənin fikrinə siyasi elmlər üzrə fəlsəfə doktoru, araşdırmaçı Zaur Əliyev Ölkə.Az-da cavab verib:

"Düzü, Araz Əlizadəni ciddi bir insan kimi tanımıram. İndi də millət vəkiliyi mandatın özünə qalxan edib türk kimliyinə qarşı danışır. Əslində onun informasiyasının İran kəşfiyyat orqanlarının virtual aləmdə apardığı xəttlə üst-üstə düşməsin asanlıqla sezmək olur. Araz Əlizadə İran kəşfiyyatının dili ilə danışır.
Araz Əlizadə bu günə qədər heç kim idi və bundan sonra da heç kim olacaq. Əsas məsələ türkləri ittiham edən Araz Əlizadə ilk öncə danışdığı dilə nəzər salsın. Türkcə danışır, türk adətləri ilə yaşayır. Üçüncü məsələ Azərbaycan bayrağı haqqında oxusun. Dövlətin əsas atributu olan bayrağımızda mavi rəng Azərbaycan xalqının türk mənşəli olmasını bildirir, mavi rəng türkçülük ideyası ilə bağlıdır. Ən azından yaxasında daşıdığı millət vəkilinin əsas atributu olan Azərbaycan bayrağından utansın türkçülük əleyihnə danışmaqla. Məlumdur ki, təfəkkür özünü 3 şəkildə; obrazlı, texniki və məntiqi formalarda göstərir və bu baxımdan təfəkkürün ifadəçisi olan dil eyni zamanda hər üç formanı ifadə etmək qüdrətində olan bir vasitədir. Araz Əlizadə açıqlamaları ilə təfəkkürün 3 əsas şəklinin daşıyıcı olmadığın göstərir.

O mənasız yerə insanların antopoloji görünüşünə görə çıxışlar edir. Araz Əlizadə anlamalıdır ki, türklər həm avropoid (azərbaycanlılar, bolqarlar, tatarlar, osmanlılar), həm də monqoloid (tuvalılar, qazaxlar, özbəklər, qırğızlar və s.) irqinə mənsubdur.

Nizami Gəncəvi ilə bağlı fikirləri isə primitivdir. Nizami türklərin deyil, bəşəriyyətin övladıdır. Araz Əlizadəyə qısa bir məlumat verim, biliyi artsın. Nizaminin elə sözləri var ki, bunlar onun türkə məhəbbətidir, vətəninə məhəbbətidir. Orta əsr Şərq şeir dili sayılan fars dili təbiidir ki, Nizami Gəncəvi kimi böyük söz ustadından yan keçə bilməzdi. Şair bu ənənəyə sadiq qalaraq həmişəyaşar “Xəmsə”sini fars dilində yazmış, ancaq türk olduğunu unutmamışdır. Elə onun

Türklərin çün yüksəldi dövlətləri,
Ədalətlə bəzəndi bütün elləri.
Madam ki, sən zülmə qulluq edirsən,
Türk deyil, qarətgar bir hindusan! Sözlərin türk olmayan insan necə yaza bilərdi?

Firdovsi X əsrdə 200 illik İran-Turan müharibələrindən, türk eposlarından danışırdı, Əfrasiyabı Turan hökmdarı kimi təqdim edirdi, Keyxosrovu da iranlıların. Bizim mövcudluğumuzla bağlı pasportumuz var: “Kitabi-Dədə Qorqud”, Şumerlərə qədər gedib çıxan min illərin abidəsidir, ana dilimizdə yazılıb. Azəri, azərbaycanlı adı millət yoxdur. Azəri və azərbaycanlı coğrafi bir anlamdır, bu ölkədə yaşayan vətəndaşlar. Fransada yaşayan fransızlar, Amerikada yaşayan amerikanlılar kimi. Bunu bilməyən biri necə millət vəkili olub anlamaqda çətinlik çəkirəm. Birdə Araz Əlizadə mərhum Heydər Əliyevin “Bir millət, iki dövlət” deyimin xatırlasın. Hər halda tarixdə mühüm imza qoyan, uzun illər hakmiyyətdə olan bir şəxsdən özünü ağıllı saya bilməz", - deyə Əliyev qeyd edib.

Səxavət Məmməd

Ölkə.Az