Bu azərbaycanlı tələbə rektor oldu

Bu layihə yalnız BSU-dadır

Ölkə.Az xəbər verir ki, Bakı Slavyan Universitetinin (BSU) Jurnalistika və Azərbaycan filologiyası fakultəsinin 3-cü kurs tələbəsi Rəhim Qədirov BSU-da keçirilən “Bir günlük xəlifə” layihəsində rektor olaraq işinin icrasına başlayıb.

"Bir günlük xəlifə" layihəsində Jurnalistika fakultəsinin tələbələri Elşən Yəhyayev mətbuat katibi, Əli Lətifli Tədris işləri üzrə prorektor, Səfər Əlizadə isə Heydər Əliyev adına radionun müdiri vəzifələrini yerinə yetirdilər.

“Bir günlük Xəlifə” özünüidarəetmə günü layihəsi Azərbaycanın ali təhsil ocaqları arasında yeganə olaraq BSU-da 2002-ci ildən etibarən hər ilin 13 dekabr tarixində həyata keçirilir və tələbələrdə özünüidarəetmə, işgüzarlıq kimi xüsusiyyətlərin inkişafında, onların peşə məsuliyyətini dərk etməsində önəmli rol oynayır. Məhz həmin gün universitetin rektor, prorektor, dekan və s. rəhbər vəzifələrdə tələbələr tərəfindən səsvermə yolu ilə seçilmiş xəlifələr fəaliyyət göstərir. Həmin xəlifələr universitetdə bir gün ərzində tədris prosesi, inzibati və s. işlərlə bağlı qərarlar qəbul edə, həmçinin yeniliklər həyata keçirə bilərlər.

Xəlifələrin qəbul etdiyi qərarlar tam olaraq hüquqi qüvvəyə malik olur. Onu da qeyd edək ki, xəlifələr 13 dekabrdan sonra “Kölgə kabineti” tərkibində bir il müddətində seçildikləri rəhbər vəzifələrini davam etdirirlər.

Ötən illərdən fərqli olaraq bu il “Xəlifə günü” dekabrın 14-nə təsadüf edib. Öncəliklə “xəlifə”lərin iş günü BSU-nun foyesində yerləşən Ümummilli Lider Heydər Əliyevin büstü önünə əklil və gül dəstələri qoymaqla başlayıb və müxtəlif tədbirlərlə davam edib.

Ölkə.Az