Hərbi ekspert: \"Düşmən obyektlərinin vurulduğu görüntülərinin yayımlanması səhv addımdır\"

Cəhbədən şəhid xəbəri gəlməkdə davam edir

Bir neçə gündür cəhbə xəttində atəşkəs rejimi ermənilər tərəfindən intensiv pozulur. Artıq tərəflər təkcə avtomat və pulemyotlardan deyil, minaatanlardan və artilleriyadan istifadə edirlər. Artıq son günlər cəhbədəki gərginlik nəticəsində 3 əsgərimiz şəhid olub.

Bununla bağlı hərbi ekspert Üzeyir Cəfərov Ölkə.Az-a danışıb:

"Cəhbədə bir gün də olsun sakitlik yoxdur. Əvvəlki vaxtlarda necə ölüm itim var idi, o indi də davam edir. Son günlərdəki hadisələr narahat edicidir. Artıq 3 gündür ki, əsgərlərimizin şəhid olması ilə bağlı məlumatlar gəlir. Bunun səbəbi də tərəflərin ağır silahlardan istifadə etməsidir. Əvvəllər avtomat və pulemyotlardan istifadə edilirdisə, indi tərəflər minaatanlardan, artilleriyadan atəş açırlar. Bundan da sığortalanmaq çox çətindir. Minaatanlardan və artilleriyadan açılan atəşlər nəticəsində ən azından ağır yaralanma baş verir. Ağır yaralanmadan da sonra yaralıların həyatını çox zaman xilas etmək olmur.

Tərəflər arasında təkcə əsəb müharibəsi deyil, ağır silahlardan istifadə edilməkdə şiddətli mövqe müharibəsi gedir. Son zamanlar özümüzün də bəzi diqqətsizliyimiz oldu. Bəzi video görüntülər yaydıq və düşmənə fürsət verdik ki, əsgər ölümlərində özlərinə bəraət qazansınlar. Bu çox səhv yanaşmadır. Bəzən bizim Müdafiə Nazirliyinin mətbuat xidmətinin çox kobud səhvləri olur. Başa düşürəm ki, bəzən onların özlərindən aslı olmayaraq ruh yüksəkliyi yaratmaq üçün bu cür videolar yayımlayırlar. Ancaq indiyə qədər görməmişik ki, ermənilər foto və video görüntü yayımlasınlar. Onlarda da belə görüntülər var, sadəcə onu yayımlamırlar. Onlar bilirlər ki, bunun məsuliyyəti çox ağırdır. Çox təəssüflər olsun ki, tərəflər arasında artilleriya silahlarından istifadə olunması ölüm-itimin çoxalmasına gətirib çıxarır. Bunun qarşısı təcili alınmalıdır.

Erməni tərəfini anlamaq olar. Onlar bunu Rusiya qarşısında özlərini göstərmək üçün edirlər. Türkiyə-Rusiya münasibələrinin pisləşməsi fonunda "biz də varıq" deməyə çalışırlar. Azərbaycan tərəfinin cavab atəşi də başa düşüləndir. Sadəcə yeganə narahat edici şey bizim düşmən obyektlərini vurmağımızın görüntülərinin yayımlanmasıdır. Bu da düşmənin əlinə əsas verir ki, elədəkiləri vəhşiliklərə, cinayətlərə bəraət qazandırsın. Düşmən məhv edilməlidir, ancaq bunu video, foto görüntülərini yaymaqla etmək düzgün addım deyil. Müharibə təhlükəsinin olmasını düşünmürəm. Hər hansısa aktiv döyüş əməliyyatlarının başlayacağına inanmıram".

Qeyd edək ki, Rusiya-Türkiyə münasibətlərinin gərginləşməsindən sonra Azərbaycan və Ermənistan arasında da gərginliyin olacağı bildirilirdi.

Səxavət Məmməd
Ölkə.Az