Ruslan İzzətli: "Hökumət iqtisadi-siyasi açılım etməyəcəyi təqdirdə vəziyyət daha da pisləşəcək"

Hökumətin hazırki iqtisadi siyasəti, büdcənin neftdən asılı vəziyyətə gətirilməsi devalvasiyanın olacağını labüd etmişdi.

Son 10 ayda Azərbaycan manatı 98 faiz devalvasiya olub. Hökumət iqtisadi-siyasi açılım etməyəcəyi təqdirdə vəziyyət daha da pisləşəcək. Çox güman ki, getdikcə ağırlaşan iqtisadi vəziyyəti nəzərə alan ölkələr bizə kredit verməyəcək. Axı neftin qiymətinin tamamilə aşağı düşdüyü bir zamanda neftdən asılı olan bir ölkəyə kim kredit verər?

Əslində iqtidar hazırkı krizis və ağır iqtisadi vəziyyətin qarşısını ala bilərdi. Son ildə aşağıda sadaladığım siyasəti yeritsəydi, bu günki gündə Azərbaycan bu cür acınacaqlı vəziyyətə düşməzdi.

1. Hakimiyyət ölkə iqtisadiyyatını neftdən asılı etməməli, əksinə neftdən gələn pulları qeyri-neft sektoruna yatırmalı idi.

2. İqtisadiyyatda monopoliyanın qarşısını almalı, kiçik və orta sahibkarlığın inkişafına dəstək olmalı idi.

3. Hakimiyyət bu günə qədər özünü iqtisadi və siyasi inteqrasiyadan kənar saxlayıb.
Bunun nəticəsidir ki, Azərbaycan Ermənistandan fərqli olaraq Dünya Ticarət Təşkilatına hələ də üzv ola bilməyib. Ölkəmiz o təşkilata üzv olsaydı gömrük və vergidə korrupsiyanın qarşısını almağa məcbur idi ki, bu da hakimiyyətin marağına və çıxarlarına uyğun deyil. Ona görə də üzv olmadı. Bütün bunların nəticəsi isə göz qabağındadır.

4. Demokratik dəyərlərə sahib çıxmalı idi. Əgər bunu etsəydi indi ölkəmiz Avropa ilə vizasız gediş-gəliş edərdi. Avropaya vizasız gediş-gəliş həm təhsildə, həm səhiyyədə həm də iqtisadiyyatda ciddi inkişafa səbə ola bilərdi.

Bunların edilmədiyi, iqtisadi monopoliyanın hökm sürdüyü kimi kiçik və orta sahibkarlığın boğulub büdcənin neftdən asılı saxlanılması krizisi qaçınılmaz edir.

Ölkə.Az