“Baş prokurorluq yoxlama göndərib, gəlmələrini gözləyirəm”

Rüfət Səfərov: “Yəqin ki, burda da üzəduranlar tapılacaq...”

Müdafiə Nazirliyi mətbuat xidmətinin sabiq rəisi, Yeni Azərbaycan Partiyasının (YAP) keçmiş funksioneri Eldar Sabiroğlunun oğlu Rüfət Səfərovun iqtidardan müxalifətə keçməsini bəyan etməsi, eləcə də, prokurorluqdakı vəzifəsindən istefa verməsi ciddi qalmaqala səbəb olub. O, yaydığı bəyanatla prokurorluq orqanındakı vəzifəsindən könüllü istefa verdiyini, bu addımını hazırkı rejimə etiraz əlaməti kimi atdığını bildirib.

Zərdab rayon Prokurorluğunun müstəntiqi Rüfət Səfərovun bəyanatı ciddi hadisələrlə müşayiət oluna bilər. Artıq atası ona etirazını bildirib.

R. Səfərov müsavat.com-a müsahibəsində bu istefası ilə bağlı danışdı. Müsahib öncə son durum barədə məlumat verdi.

-Ərizəmi saat 12 radələrində təqdim etdim. Poçt vasitəsilə. Təbii ki, gözləyirəm ki, barəmdə hər hansı qərar olsun, iş yerimi sonra tərk edim. Özbaşına surətdə buranı tərk edə bilmərəm. Zərdab rayon prokuroru zəng vurub və narazılığını bildirib. 3-4 dəfə zəng vuraraq deyib ki, Baş Prokurorluqdan tələsdirirlər və ərizəni soruşurlar. Mən də hazırda xəstəyəm, yüksək hərarətim var... O, mənə telefonda dedi ki, sən prokurorluq orqanına ləkəsən. Desin, düz deyir...

- Ailənizin yaşadığı evin qarşısında yenə polislər varmı?

- Artıq yoxdur.

- Ata-ananız zəng edibmi yaxın vaxtlarda sizə?

- Xeyr, zəng etməyiblər. Mən qeyd etmişəm, nəslimdə, şəcərəmdə məni tanıyanlar-tanımayanlardan zəng gözləmirəm.

- Niyə birdən-birə bu müraciətə ehtiyac gördüz?

- Mən buna elə yanaşmazdım ki, birdən-birə olub. Bu, bir neçə ilin prosesidir. Yekunda belə qərar verilib. Ani qərar vermədim, hesablamışam, şüurlu olaraq. Bir neçə ildir ki, prokurorluq orqanlarında fəaliyyət göstərirdim. İndi düşündüm ki, zaman gəlib bu günə düşüb.

-Son bir neçə ayda istər özünüzlə, istər atanızla bağlı hansı sahədə problemlər baş verib ki, belə bir qəfil müraciətə ehtiyac gördüz? Pərdəarxasında nələr baş verib?

- Mən açıq söyləyim ki, mənim bu addımımı şərtləndirən iki mühüm amil var. Başlıca amil odur ki, ölkədə kəskin surətdə hüquq və azadlıqlar tapdanır. Bu, başlıcadır. İkinci və köməkçi faktor isə atama qarşı haqsız hücumlardır. Atamın, ailəmizin təhqir olunması və sairdir.

- Bu bəyanatdan sonra atanızla çox kəskin telefon danışığınızın olub. Nələr danışdız? Sizi nələrdə ittiham etdi?

- Onun o sözlərini mən təkrar etmək istəmirəm. Təhqiramiz sözlər idi. Ləyaqətsiz təhqirlər idi.

 

“O, mənə telefonda dedi ki, sən prokurorluq orqanına ləkəsən. Desin, düz deyir... ”

- Sizi övladlıqdan rədd edəcəkmi?

- Bunu özündən soruşun. Ona da hazıram. Əgər bu addımı atarsa, normal baxıram. Bu cəmiyyətdə baş verən hər şeyə normal baxıram.

- Bəs özünüz onlardan imtina edə bilərsizmi?

- Əsla. Mən o qədər şərəfsiz insan deyiləm.

- Atanızın sizə yazdığı müraciətdən də aydın olur ki, imtahan verib, Zərdaba getmisiz. Burda atanızın dəstəyi olmayıbmı?

- Hər halda atamın dəstəyi olsaydı, mən bu dəqiqə Zərdabda olmazdım. Doğrudur, mən Zərdabı sevirəm, zərdablılar qarşısında baş əyib, ehtiram edirəm. Fürsətdən istifadə edib, baş prokurora da minnətdarlığımı bildirirəm ki, zamanında bu fürsəti bizə tanıdı. Biz də öz bacarıqlarımız sayəsində dövlətə xidmət etdik.

-Bakıya keçmək üçün dəfələrlə müraciət etmisizmi?

- Mən etməmişəm, atam müraciət edib. Mənsə atama demişəm ki, ata, bu texniki məsələyə görə özünü yorub kiməsə də minnətçi düşmə. Mən şəxsi, marjinal maraqlarımla bu addımı atmamışam. Zərdablılara da öyrəşmişdim, burda da atmosfer olaraq rahat idim. Məni Bakıya dəvət etmədilər, ay filan şeyi etmədilər... deyə bir problemim olmayıb. Bunlar boş söhbətlərdir. Buna görə də hər hansı addım atmamışam.

- Bir sabah oyandız və qərar verdiz ki, ürək sözlərinizi söyləyib, bu sistemdən getməlisiz...

- Eynilə. Tamamilə düz deyirsiz.

- Təkanverici heç nə olmayıb son dönəmdə?

- Xeyr, təkanverici, xüsusi heç nə olmayıb. Amma uzun müddətin fikirlər burulğanı məni gətirdi bu qərara.

- Sizin barənizdə çox az bilgimiz var. Harda oxumusuz, orta, ali təhsilinizi harda almısız?

-Mən Bakı Dövlət Universitetinin hüquq fakültəsini bitirmişəm. Magistraturanı da orda bitirmişəm. Orta təhsilimi isə Bakıda 135 və 248 saylı orta məktəblərdə almışam.

- Hansısa dini qrupun üzvü olmanız barədə də versiyalar səslənir...

- Xeyr. Mənim heç bir dini qruplaşmaya aidiyyatım yoxdur. Sırf öz işimlə məşğulam, bundan sonra da öz işimlə məşğul olacam.

- Hansısa müxalifət partiyasına keçəcəksiz?

- Xeyr, elə bir fikrim yoxdur. Niyə mən mütləq hansısa partiyada olmalıyam?

- Rüfət bəy, müsahibənizdə “əgər Eldar Sabiroğlu məndən imtina edərsə, təxminən 3-4 gün ərzində əgər atam ölərsə, atamın başdaşına bu rejimin anatomiyasını birbaşa hopduracam”, fikrini işlətmisiz. Sizə elə gəlmirmi ki, bu, əndazəni aşan, normaldan uzaq, emosionallıq dolu bir yanaşmadır?

- Sizinlə söhbət edirəm. Doğrudur, bir qədər səhhətim də qaydasında deyil. Amma siz mənim danışığımda hər hansı çılğınlıq hiss etdiniz?

- Hal-hazırda yox. Amma mən daha öncə dediklərinizi nəzərdə tuturam.

- Kimin nə deməsinin mənimçün əhəmiyyəti yoxdur. Əsas odur kİ, mən özüm nə düşünürəm.

- Ölkədən getmək, mühacirət etmək... belə planlarınız varmı?

- O barədə düşünməmişəm. Amma hesab etmirəm ki, belə bir əsas var. Mən bu ölkənin azad vətəndaşıyam. Hər hansı cinayət törətməmişəm. Nəyə görə daşqalaq olunmalıyam?

- Azərbaycanda bu cür etiraz edən eks məmurların, YAP fəallarının aqibəti bilinən xətt üzrə gedir. Həbs, hansısa formada cəzalandırma... bunlar istisna deyil hər halda...

- Gözləyirəm indi. Baş prokurorluq yoxlamanı göndərib artıq. Yəqin ki, burda da üzəduranlar taparlar. Gözləyirəm. Məhz bu qərardan sonra eşitdiyimə görə yoldadırlar, gəlirlər. (gülür)

- Həyatınızın bundan sonrakı mərhələsini necə təsəvvür edirsiz? Necə yaşayacaqsız? Nələr olacaq bundan sonra?

- Bütün mahiyyətimi və varlığımı kitaba və elmə qoyacam. Ondan sonra nə olacağını isə həyat göstərəcək.

Ölkə.Az