Azərbaycanda taksi fəaliyyəti göstərənlər üçün

Azərbaycan Prezidenti İlham Əliyev “Avtomobil nəqliyyatı haqqında” Azərbaycan Respublikasının Qanununda dəyişikliklər edilməsi barədə” Qanunun tətbiqi haqqında fərman imzalayıb.

Ölkə.Az dövlət başçısının rəsmi saytına istinadən xəbər verir ki, bundan sonra  avtomobil nəqliyyatı ilə sərnişin və yük daşımaları sahəsində lisenziya almaq üçün həmin nəqliyyat vasitəsi həmçinin Azərbaycanın dövlət standartları ilə müəyyənləşdirilmiş tələblərə cavab verməlidir.

Bundan başqa, müvafiq lisenziyanın alınması üçün həmin nəqliyyat vasitəsinin Azərbaycanın dövlət standartları ilə müəyyən edilmiş istismar müddəti tələblərinə cavab verdiyini təsdiq edən avtonəqliyyat vasitələrinin buraxılış ili haqda sənədi olmalıdır.

Dəyişikliyə əsasən, taksi fəaliyyəti üçün taksometrin metroloji yoxlamadan keçməsini təsdiqləyən şəhadətnamə isə Standartlaşdırma, Metrologiya və Patent üzrə Dövlət Komitəsi tərəfindən veriləcək.

Tələbləri yerinə yetirəcək şəxslərə veriləcək lisenziya kartı isə daşıyıcının həmin avtonəqliyyat vasitəsi ilə sərnişin və yük daşımalarını həyata keçirmək üçün xüsusi razılığa (lisenziyaya) malik olduğunu təsdiq edir və müvafiq xüsusi razılıq (lisenziya) verilərkən təqdim edilir.

Digər bir yenilik isə ondan ibarətdir ki, taksi minik avtomobilləri ilə sərnişin daşımaları həyata keçirən şəxslər rüblük texniki, istismar, təhlükəsizlik və ekoloji tələblərə uyğunluğun yoxlanılması prosedurundan azad edilirlər. Bu, digər nəqliyyat vasitələri ilə sərnişin və yük daşımaları həyata keçirən şəxslərə aid deyil.

Qanuna edilmiş dəyişikliyə əsasən, taksi minik avtomobilləri ilə sərnişin daşımalarına xüsusi razılıq (lisenziya) verilərkən və həmin avtomobillərlə sərnişin daşımalarının həyata keçirilməsi zamanı avtonəqliyyat vasitəsinin texniki, istismar, təhlükəsizlik və ekoloji tələblərə uyğunluğu “Yol hərəkəti haqqında” Qanun ilə müəyyən edilmiş qaydada verilən nəqliyyat vasitəsinin texniki baxış talonu ilə müəyyən ediləcək.

Yeniliyə əsasən, bundan sonra taksi sürücüsü işləmək işləyən şəxsin yaşı 21 olmalıdır. Bundan başqa, o, mülkiyyətində və ya digər qanuni əsaslarla istifadəsində (icarə, etibarnamə və s.) olan avtonəqliyyat vasitəsini iki ildən artıq müddətdə idarə etməlidir.

Digər bir məqam isə taksi sürücülərinin hazırlığı ilə bağlıdır.

Belə ki, dəyişikliyə əsasən bundan sonra taksi minik avtomobillərinin sürücüləri etik davranış və avtomobil nəqliyyatı ilə sərnişin daşımalarını tənzimləyən normativ hüquqi aktlara dair xüsusi hazırlıq keçməlidirlər.

Taksi minik avtomobillərinin sürücüləri üçün xüsusi hazırlığın keçirilməsi qaydası, proqramı və müddəti müvafiq icra hakimiyyəti orqanı, yəni, Nəqliyyat Nazirliyi tərəfindən tərəfindən müəyyən ediləcək, təşkil olunacaq və keçiriləcək.

Ölkə.Az