"Pulu mənasız yerlərə xərcləməkdənsə zavod, fabrik açmaq lazım idi"

İkinci devalvasiya dalğası ölkə iqtisadiyyatını iflic vəziyyətinə salıb.

Hər kəs bu məsələdən narahatdır. Bir yandan qiymət artımı, digər yandan dollarla götürülmüş kreditlər. Çıxış yolu kimi daxili istehsalı gücləndirmək lazım olduğu deyilsə də, bunun üçün vəsait və uzun zaman tələb olunur.

Ölkədə baş verən ikinci devalvasiyanı politoloq Zərdüşt Əlizadə Ölkə.Az-a verdiyi açıqlamasında şərh edib:

"Əgər ölkədə istehsal yoxdursa, ölkə əhalisinin əsas təminatı xaricdən gələn mallarla ödənilirsə, demək ölkəyə gələn dollar kütləsinin dolların məzənnəsinin kritik əhəmiyyəti var. Neftin qiyməti aşağı düşdü, bunun nəticəsində də neftdən gələn gəlirlər də aşağı düşdü. Xalq yeməlidir, içməlidir, geyinməlidir və s. Manatın dollar və avroya nisbətdə kəskin ucuzlaşması, istehlak bazarında qiymətlərin sürətlə qalxmasına gətirib çıxaracaq. Ona görə ki, Azərbaycana əsas mallar xaricdən gəlir.

Baş verənlər mənasız, məntiqsiz iqtisadi siyasətin nəticəsidir. Xalqda da günah var. Xalq tələb etmirdi "zavod, fabrik açın!", "Kəndliləri, sahibkarları boğmayın!", deyə. Xalq bunu tələb etmədi, süfrədən düşən qırıntlara göz dikdi, indi də bunun acı bəhrəsini dadır. Hal-hazırda Azərbaycan dərin iqtisadi böhran içərisindədir. 2000-ci ildən iqtisadçılarımız yazır ki, neft azalmağa başlayanda və neftin qiyməti düşəndə Azərbaycan kəskin iqtisadi böhranla üzləşəcək. Dərin iqtisadçı olmasam da, həmişə deyirdim ki, bəxtəvər günlərin sonu yaxınlaşır. Pulu mənasız Avroviziya, I Avropa oyunlarına, divar daşlarına xərcləməkdənsə onun əvəzinə zavod, fabrik tikmək, kənd təsərüffatını inkişaf elətdirmək lazımdır. Devalvasiya məsələsi isə, bilirsiniz bu hadisə hakimiyyət arasında parçalanmalara gətirib çıxara bilər".

Səxavət Məmməd
Ölkə.Az