Ramil Məmmədli: "Serj Sarkisyan hansı yola əl atsa da, istədikləri nəticəni almayacaq"
"Kollektiv Təhlükəsizlik Müqaviləsi Təşkilatının üzvləri Serj Sarkisyan kimliyinə və əxlaqına yaxşı bələddirlər. Onlar prezident statusundan istifadə edərək, yüksək tribunadan etdiyi son çıxışının da kökündə Azərbaycana qarşı əsassız ittihamların olduğunu da sezməyə bilməzlər".
Bunu Ölkə.az-a açıqlamasında hərbi-siyasi icmalçı, ehtiyyatda olan zabit Ramil Məmmədli Ermənistan prezidenti Serj Sarkisyanın Moskva şəhərində keçirilən Kollektiv Təhlükəsizlik Müqaviləsi Təşkilatının (KTMT) kollektiv təhlükəsizlik Şurasının növbəti sessiyasında çıxışını şərh edərkən deyib.
O bildirib ki, həddən çox uğursuzluğa məruz qalan S. Sarkisyan bu çıxışı suda boğulanın saman çöpündən yapışmasına bənzəyir:
"Belə rəsmi tədbirdə yalan və populist çıxış etmək həyasızlıqdan başqa bir şey deyil. Türkiyə ilə Azərbaycan hərbi münasibətlərini qabartmaqla Azərbaycandan KTMT üçün düşmən obrazı yaratmaq cəhdi də baş tutan deyil. Ermənistanın sığındığı Rusiyada yaxşı bilir ki, Azərbaycanın “Rosoboroneksport”dan satınalmalarının məbləği nə qədərdir və bu rəsmi Bakının haqqıdır. Bununla bağlı yaxşı bir rus atalar sözü var: “Arsızlıq ikinci xoşbəxtlikdir”. Ancaq bu məsələdə Serj Sarkisyan hansı yola əl atsa da, istədikləri nəticəni almayacaq”.
R. Məmmədli deyib ki, dünya sivil qanunlarla idarə olunur və regional, iqtisadi-siyasi, hərbi-təhlükəsizlik, terorizmlə mübarizə tədbirləri həyata keçirmək, qonşularla münasibət qurmaq üçün daha çox insani və işgüzar keyfiyyətlərə malik olmaq lazımdır. S. Sarkisyan isə bunları bacarmır. O ancaq günahkar insanları öldürməyin, böhtan və yalan yaymağın ustasıdır.
Hərbi politoloqun sözlərinə görə, beynəlxalq təşkilatlar - dünya ictimaiyyəti də Ermənistanın atəşkəsi pozan addımlarından xəbərdardır:
“Azərbaycan Ordusu təmas xəttində yaşayış məntəqələrimizi və dinc insanları atəşə tutan erməni silahlı bölmələrinə məxsus ancaq hərbi obyektlərin, atəş nöqtələrinin, dayaq məntəqələrinin, hərbi texnikanın məhv edilməsinə yönələn əməliyyatlar həyata keçirir. Azərbaycan bunu dünyada qəbul edilmiş bütün sivil qayadlara uyğun olaraq, sərhədləri daxilində həyata keçirir. Nəzərə alınmalıdır ki, ölkəmiz daim terrorizmə və separatizmə qarşı mübarizədə də fəal iştirak edib. Azərbaycanın həyata keçirdiyi bu əməliyyatlar da beynəlxalq hüquq normalarına uyğun qərarlar və tələblər çərçivəsində edilir”.
R. Məmmədli deyib ki, Müdafiə Nazirliyinin S. Sarkisyanı yalançı-saxtakar hesab etməsi də məsələyə çox düzgün yanaşmadır:
“Həqiqətən də Müdafiə Nazirliyinin bəyanatında deyildiyi kimi “Serj Sarkisyan dünya ictimaiyyətini aldadır”. Hesab edirəm ki, bu cür çıxışların təkrar olunmaması üçün Azərbaycan dövləti diplomatik xətlə Kollektiv Təhlükəsizlik Müqaviləsi Təşkilatının Baş Katibliyinə rəsmi şəkildə mövqeyini bildirməlidir ki, bir də S. Sarkisyan belə mötəbər tribunadan bu cür yalan dolu çıxış edə bilməsin”.
Ölkə.az
