Təhsil nazirliyi iddialara cavab verdi: Təəssüf hissi ilə bildiririk ki...
Təhsil Nazirliyinin "Bizim Yol" qəzetinin araşdırmasına cavab olaraq məlumat yayıb
Ölkə.Az informasiya portalı olaraq qəzetin araşdırmasının saytımızda da dərc edildiyini diqqətə alıb nazirliyin də mövqeyini dərc edirik. Lakin nazirliyin bizə daxil olan məlumatında bəzi korrektələr etmək məcburiyyətində qaldıq. Belə ki, dırnaq işarələri arasında qeyd olunana araşdırma sözlərini "dırnaqsız" təqdim edirik. Çünki redaksiyamızın mövqeyi budur ki, bu araşdırma dırnaqarası deyil:
"Ötən gün kütləvi informasiya vasitələrində Azərbaycan Dövlət İqtisad Universitetinin və Azərbaycan Dillər Universitetinin timsalında büdcədən maliyyələşən təşkilatlara lazım olduğundan artıq vəsaitin ayrılması, büdcə vəsaitlərinin səmərəsiz xərclənməsi mövzusunda məlumatlar verilmişdir.
Həmin məlumatlara cavab olaraq bildiririk ki, Azərbaycan Respublikası Prezidentinin müvafiq fərmanına əsasən 2010-2011-ci tədris ilindən başlayaraq ölkə ərazisində fəaliyyət göstərən ali təhsil müəssisələrində dövlət büdcəsinin vəsaiti hesabına maliyyələşdirmə adambaşına prinsipi əsasında müəyyən olunur. Yəni, ali təhsil müəssisəsi büdcə vəsaitini bu ali təhsil müəssisəsinə dövlət sifarişi ilə qəbul olunan tələbələrin sayına adekvat olaraq alır. Ona görə də sözügedən media araşdırmasında qeyd olunan ali təhsil müəssisələrinə lazım olduğundan artıq büdcə vəsaiti ayrıla bilməz, digər tərəfdən Təhsil Nazirliyi dövlət büdcəsinin sərəncamçısı olmadığından ali təhsil müəssisəsinə əlavə vəsait ayırmaq səlahiyyəti yoxdur. İslahatdan sonra ali təhsil müəssisələri tamamilə maliyyə muxtariyyəti statusunu əldə etmiş və gəlirlərinə uyğun xərclərini qanunvericiliyə əsasən müəyyənləşdirməkdə sərbəstdirlər.
Eyni zamanda qeyd olunmalıdır ki, dövlət sifarişi ilə kadr hazırlığının həyata keçirilməsi ilə əlaqədar ayrılan büdcə vəsaitləri əsasən əməyin ödənişi və kommunal xərclərə yönəldilir. Hazırda büdcə vəsaiti hesabına əməyin ödənişi xərci Azərbaycan Dövlət İqtisad Universitetində 74,83 %, Azərbaycan Dillər Universitetində isə 87,54 % təşkil edir.
Təəssüf hissi ilə bildiririk ki, Təhsil Nazirliyinin mövqeyi öyrənilmədən bu araşdırma media orqanlarında dərc olunmuşdur".
Qəzetin araşdırmasını buradan oxuya bilərsiniz: Təhsil sistemindəki korrupsiya — Şok rəqəmlər
