Nəqliyyat nazirlərinin 3-cü iclası baş tutdu

Azərbaycanın nəqliyyat naziri Ziya Məmmədov dekabrın 23-də İranın paytaxtı Tehranda Xəzəryanı ölkələrin nəqliyyat nazirlərinin 3-cü iclasında iştirak edib.

Nazirlikdən Ölkə.Az-a verilən məlumata görə, görüş zamanı nəqliyyatın bütün sahələrində əməkdaşlığın genişləndirilməsi, beynəlxalq və regional dəhlizlərin inkişafı, nəqliyyat üzrə Xəzəryanı ölkələrin imkanları və region ölkələrinin nəqliyyat infrastrukturunun modernləşdirilməsi, logistika mərkəzlərinin yaradılması kimi məsələlər müzakirə edilib.

Azərbaycanın nəqliyyat naziri Z. Məmmədov APA-ya açıqlamasında bildirib ki, iclasda müzakirə olunan mövzulardan biri də nəqliyyat və yük daşımaları sahəsində əməkdaşlığın genişləndirilməsidir:

“Məlum olduğu kimi, Azərbaycan prezidentinin göstərişinə əsasən nəqliyyat və yük daşımaları sahələrində qısa müddət ərzində təkmilləşdirmə işlərinin aparılmasıdır. Azərbaycanı tranzit baxımdan daha cəlbedici etmək məqsədilə Koordinasiya Şurası yaradılıb və bütün aidiyyatı qurumlara göstəriş verilib ki, dəmir yolu nəqliyyatı və digər nəqliyyat yollarından istifadə üçün rəqabətqabiliyyətli tariflər tətbiq olunsun”.

 Ölkə.Az