Həftənin icmalı
Prezidentdən lisenziyalaşdırma sahəsi ilə bağlı — Fərman
21.12.2015
Azərbaycan prezidenti İlham Əliyev lisenziyalaşdırma sahəsində bəzi tədbirlər haqqında fərman imzalayıb.
Ölkə.Az-ın məlumatına görə, fərmana əsasən, “Lisenziyalaşdırma Qaydası”, “Lisenziya tələb olunan fəaliyyət növlərinin (dövlət təhlükəsizliyindən irəli gələn hallar istisna olmaqla) siyahısı və həmin fəaliyyət növlərinə lisenziya verilməsinə görə ödənilən dövlət rüsumunun məbləğləri”, “Dövlət təhlükəsizliyindən irəli gələn hallarla əlaqədar lisenziya tələb olunan fəaliyyət növlərinin siyahısı və həmin fəaliyyət növlərinə lisenziya verilməsinə görə ödənilən dövlət rüsumunun məbləğləri” və “Naxçıvan Muxtar Respublikasının icra hakimiyyəti orqanları tərəfindən lisenziya verilən fəaliyyət növlərinin siyahısı” təsdiq edilir. Müəyyən edilir ki, bu fərmanın qüvvəyə mindiyi gün qüvvədə olan lisenziyalar müddətsiz hesab edilir; bu fərmanın 4 nömrəli əlavəsində göstərilən fəaliyyət növlərinə lisenziyaları Naxçıvan Muxtar RespublikasıNazirlər Kabinetinin müəyyən etdiyi müvafiq icra hakimiyyəti orqanları verirlər.
Mehriban Əliyeva ilin idman xadimi seçildi
21.12.2015
Azərbaycan İdman Jurnalistləri Assosiasiyası (AİJA) çoxillik ənənəsinə sadiq qalaraq 2015-ci ilin idman laureatlarının adlarını açıqlayıb.
AİJA Azərbaycanın birinci xanımı, “Bakı-2015” birinci Avropa Oyunları Təşkilat Komitəsinin sədri Mehriban Əliyevanı ilin idman xadimi elan edib.
Təhsil lisenziyalarının dövlət rüsumu iki dəfə azaldıldı
22.12.2015
Azərbaycanda təhsil sahəsində lisenziyaların verilməsinə görə ödəniləcək dövlət rüsumunun məbləğləri iki dəfə azaldılıb.
Ölkə.Az-ın APA-ya məlumatına görə, bu, Azərbaycan prezidenti İlham Əliyevin “Lisenziyalaşdırma sahəsində bəzi tədbirlər haqqında” 21 dekabr 2015-ci il tarixli fərmanı ilə təsdiq edilən “Lisenziyalaşdırma Qaydası”nda əksini tapıb.
Süni qiymət artıranlar cəzalandırılacaq — Nazirlik
22.12.2015
Ölkədə süni qiymət artımı ilə bağlı nəzarət tədbirləri gücləndirilib.
Bu barədə Ölkə.Az-a İqtisadiyyat və Sənaye Nazirliyindən bildirilib.
Qeyd edilib ki, süni qiymət artıran şəxslər cəzalandırılacaq:
"Veysəloğlu" qiymətləri qaldırır
22.12.2015
Azərbaycan Mərkəzi Bankın İdarə Heyətinin 21 dekabr 2015-ci il tarixində imzaladığı üzən məzənnə rejiminə keçilməsi barədə qərarına əsasən, manatın məzənnəsinin ABŞ dollarına nisbətən növbəti dəfə aşağı düşməsi Veysəloğlu Şirkətinin distribyuterlik etdiyi məhsulların qiymətlərinə də təsirsiz ötüşməyəcək.
Şirkətin əsas fəaliyyəti idxal üzərində qurulduğundan ABŞ dollarının məzənnəsinin kəskin artması şirkət üçün də bir sıra çətinliklər yaratmışdır. Hazırda şirkət özünün qiymət siyasətini yenidən nəzərdən keçirdir.
Azərbaycan 12 məhbusu İrana təhvil verdi
22.12.2015
Ədliyyə Nazirliyi 2015-ci il ərzində Azərbaycanda cinayət törətdiyi üçün həbs edilən İran vətəndaşlarının öz ölkələrinə təhvil verilməsi barədə məlumat acıqlayıb.
Nazirliyin mətbuat xidmətindən Ökə.Az-a verilən məlumata görə, Azərbaycan ərazisində cinayət törətdiyi üçün saxlanılaraq barələrində həbs qətimkan tədbiri seçilən 12 İran vətəndaşı ölkələrinə təhvil verilib.
Nazirlikdən Xəzərin çirklənməsi ilə bağlı açıqlama
22.12.2015
Xəzər dənizindəki “Günəşli” yatağının 10 saylı stasionar dərin dəniz özülündə baş vermiş yanğın hadisəsindən sonra ətraf mühitə mümkün təsirlərin öyrənilməsi məqsədi ilə ekologiya və təbii sərvətlər nazirinin göstərişi əsasında yaradılan ekspedisiya qrupu aparılan müşahidələr zamanı özül ətrafında qırıq-qırıq, kiçik ölçülü, davamsız parıltılı ləkələr müşahidə edilib ki, bu da əsasən neft yox, kondensat qalıqlarıdır.
Daha bir fəaliyyət üçün lisenziya ləğv olundu
22.12.2015
Azərbaycan Respublikası vətəndaşlarının xarici ölkələrdə işə düzəlmələrində vasitəçilik fəaliyyəti lisenziya tələb olunan fəaliyyət növlərinin siyahısından çıxarılıb.
Ölkə.Az-ın APA-ya istinadən verdiyi xəbərə görə, bu, Azərbaycan prezidenti İlham Əliyevin “Lisenziyalaşdırma sahəsində bəzi tədbirlər haqqında” 21 dekabr 2015-ci il tarixli fərmanı ilə təsdiq edilən “Lisenziya tələb olunan fəaliyyət növlərinin (dövlət təhlükəsizliyindən irəli gələn hallar istisna olmaqla) siyahısı və həmin fəaliyyət növlərinə lisenziya verilməsinə görə ödənilən dövlət rüsumunun məbləğləri”ndə əksini tapıb.
Bakıdakı xoşagəlməz qoxunun səbəbi açıqlandı
22.12.2015
Bakının Xətai və Səbail rayonlarında müşahidə olunan xoşagəlməz qoxunun səbəbi açıqlanıb.
Ekologiya və Təbii Sərvətlər Nazirliyindən verilən məlumata görə, Bakı şəhərində son 3 gündə əlverişsiz metroloji şərait bərqərar olub. Tez-tez istiqamətini dəyişən zəif küləklər, nisbi rütubətliliyin yüksək olması, axşam saatlarında temperaturun aşağı, gündüz saatlarında temperaturun yüksək olması ilə bağlı hava hövzəsində yığılan, nəqliyyatdan və stasionar mənbələrdən atılan tullantıların səpələnməsi üçün əlverişli meteoroloji şərait yaradıb. Buna görə də bu, bu gün səhər saatlarında Bakının Xətai və Səbail rayonlarının bir hissəsində xoşagəlməz iyi ilə müşahidə olunub. Günün sonuna doğru şimal küləyinin güclənməsi gözlənilir.
Nazirlikdən bildirilib ki, artıq günorta saatlarından xoşagəlməz qoxu zəifləyib və bu hal itmək üzrədir. Küləyin sürətlənməsi ilə qısa müddət ərzində iy də olmayacaq.
Rasim Əliyevin cinayət işinin materialları məhkəməyə göndərildi
22.12.2015
Jurnalist Rasim Əliyevin ölümü ilə bağlı başlanmış cinayət işinin materialları məhkəməyə göndərilib.
Bakı Şəhər Prokurorluğundan Ölkə.Az-a verilən məlumata görə, Bakı şəhər sakini Rasim Əliyevin avqustun 8-də Bayıl qəsəbəsi ərazisində bir qrup şəxs tərəfindən döyülərək vəfat etməsi faktına görə Bakı şəhər prokurorluğunda başlanmış cinayət işinin istintaqı tamamlanıb.
Dekabrın 22-də Kənan Mədətov, Camal Məmmədov və Samir Mustafayevin Cinayət Məcəlləsinin 126.3-cü (qəsdən sağlamlığa ağır zərər vurma, zərərçəkmiş şəxsin ölümünə səbəb olduqda), Elşən İsmayılov və Arif Əliyevin isə həmin Məcəllənin 126.3 və 177.1-ci (oğurluq) maddələri ilə təqsirləndirilmələrinə dair cinayət işi üzrə ittiham aktı təsdiqlənərək baxılması üçün Bakı Ağır Cinayətlər məhkəməsinə göndərilib.
İRƏLİ İctimai Birliyinin yaranmasının 7 illiyi ilə əlaqədar tədbir keçirildi
23.12.2015
İRƏLİ İctimai Birliyinin yaranmasının 7 illiyi ilə əlaqədar hesabat xarakterli tədbir keçirilib.
Ölkə.Az-ın məlumatına görə, tədbirdə çıxış edən gənclər və idman nazirinin müavini İntiqam Babayev deyib ki, Azərbaycanda 300-dən artıq gənclər təşkilatı mövcuddur, İRƏLİ İctimai Birliyi isə bu təşkilatlar arasında fəallığı ilə seçilir.
Milli Məclisin Gənclər və İdman komitəsinin sədri Fuad Muradov gənclərin gələcəkdə Şuşada, Laçında böyük işlər görəcəyinə inandığını söyləyib.
Zakir Həsənov iki ölkə ilə hərbi sənəd imzaladı
23.12.2015
Moskva şəhərində səfərdə olan Azərbaycan Respublikasının Müdafiə naziri general-polkovnik Zakir Həsənov dekabrın 23-də Belarus Respublikasının Müdafiə naziri general-leytenant Andrey Ravkov və Qırğızıstan Respublikası Silahlı Qüvvələrinin Baş Qərargah rəisi Janıbek Kaparov ilə ikitərəfli görüşlər keçirib.
Müdafiə Nazirliyindən Ölkə.Az-a verilən məlumata görə, hər iki görüşdə ölkələrimiz arasında hərbi sahədə 2016-cı il üçün əməkdaşlıq planları imzalanıb.
Jurnalistin sorğusunu cavabsız qoyanları sərt cəza gözləyir
23.12.2015
Azərbaycanda jurnalistin sorğusunu cavabsız qoymağa görə cəzalar sərtləşdirilir
Azərbaycanda jurnalistlərin sorğularına cavab verməkdən imtina etməyə, cavabsız buraxmağa və jurnalistə informasiyanın verilməsinə məhdudiyyət qoymağa görə yeni cəzalar tətbiq olunur.
Emin İlham Əliyevi təbrik etdi
23.12.2015
Müğənni Emin Ağalarov Azərbaycan Respublikasının Prezidenti İlham Əliyevi təbrik edib.
Ölkə.Az axar.az-a xəbər verir ki, dünən Heydər Əliyev sarayında müğənni-bəstəkar Emin Ağalarovun konserti keçirilib. Emin konsertdə qarşıdan gələn yeni il ilə bağlı bütün xalqa təbrik və ürək sözlərini ünvanlayıb. O, həmçinin Prezident İlham Əliyevin də ad gününü təbrik edib.
Tiflisə bilet qalmadı
23.12.2015
Yeni il ərəfəsində dəmiryol vağzalının kassalarında Bakı-Tiflis istiqamətinə bilet qalmayıb.
Ölkə.Az xəbər verir ki, bu barədə axar.az-a verilən məlumatda qeyd olunub.
Bayramla əlaqədar dekabrın 30-da Gürcüstan paytaxtına getmək istəyənlər 15 gün qabaqdan bilet əldə ediblər. Bayrama bir həftə qalmasına baxmayaraq, artıq kassalarda bilet yoxdur.
Hazırda dəmiryol vağzalının kassalarının qabağında növbələr yaranıb. İnternetdən onlayn bilet almaq da mümkün deyil.
Ötən il də bayramqabağı Tiflis istiqamətinə qatarlara bilet yarım ay əvvəldən qurtarmışdı.
İlham Əliyev 54 yaşını qeyd edir
24.12.2015
Bu gün Azərbaycan Prezidenti İlham Əliyevin ad günüdür.
Prezident 54 yaşını qeyd edir.
İlham Heydər oğlu Əliyev 1961-ci il dekabrın 24-də Bakı şəhərində anadan olub. Orta təhsilini 1967-1977-ci illərdə Bakı şəhərində alan İ. Əliyev 1977-ci ildə Moskva Dövlət Beynəlxalq Əlaqələr İnstitutuna (MDBƏİ - MQİMO) daxil olub, ali təhsilini müvəffəqiyyətlə başa vuraraq elmi fəaliyyətini institutun aspiranturasında davam etdirib.
1985-1990-cı illərdə Moskva Dövlət Beynəlxalq Əlaqələr İnstitutunda müəllim işləyib. 1991-1994-cü illərdə özəl biznes sahəsində çalışıb və bir sıra istehsalat-kommersiya müəssisələrinə rəhbərlik edib. 1994-cü ildən 2003-cü ilin avqust ayınadək Azərbaycan Respublikası Dövlət Neft Şirkətinin vitse-prezidenti, sonra isə birinci vitse-prezidenti olub.
İki dəfə 1995-ci və 2000-ci illərdə Azərbaycan Respublikasının Milli Məclisinə seçilib. 2003-cü ildə Azərbaycan Respublikasının Baş naziri vəzifəsinə təyin edilməsi ilə əlaqədar olaraq deputat səlahiyyətlərinə xitam verilib.
1999-cu ildə hakim Yeni Azərbaycan Partiyasının sədr müavini, 2001-ci ildə sədrin birinci müavini, 2005-ci ildə isə partiyanın sədri seçilib.
2001-2003-cü illərdə Avropa Şurası Parlament Assambleyasında (AŞPA) Azərbaycan Respublikası Milli Məclisinin nümayəndə heyətinin rəhbəri olub. 2003-cü ilin yanvar ayında Avropa Şurası Parlament Assambleyasının sədr müavini, AŞPA-nın Büro üzvü seçilib.
2003-cü il avqustun 4-də Milli Məclis tərəfindən təsdiq edildikdən sonra Azərbaycan Respublikasının Baş naziri təyin edilib. 2003-cü il oktyabrın 15-də Azərbaycan Respublikasının Prezidenti seçilib.
2008-ci il oktyabrın 15-də keçirilən seçkilərdə seçicilərin 88,73% səsini qazanan İlham Əliyev ikinci dəfə prezident seçilib.
Azərbaycanın Milli Olimpiya Komitəsinin prezidenti İlham Əliyev 2013-cü il oktyabrın 9-da keçirilən prezident seçkilərində növbəti dəfə qələbə qazanıb.
Evlidir. Üç övladı var.
İl ərzində 848 nəfər qida zəhərlənməsindən ölüb
24.12.2015
Bu ilin yanvar-noyabr ayları ərzində Azərbaycan ərazisində 605 qida zəhərlənməsi hadisəsi qeydə alınıb.
Ölkə.Az xəbər verir ki, Səhiyyə Nazirliyi Respublika Gigiyena və Epidemiologiya Mərkəzindən Trend-ə verilən məlumata görə, qida zəhərlənmələri nəticəsində 848 nəfər zərərçəkən qeydə alınıb.
Ötən müddət ərzində ölkə üzrə qeydə alınan 21 botulizm hadisəsi nəticəsində 39 nəfər botulizmlə xəstələnib. Bu il botulizm nəticəsində 3 nəfər dünyasını dəyişib. Botulizm xəstəliyinin başvermə səbəbləri ev şəraitində konservləşdirilmiş məhsullar, digər zəhərlənmələrə səbəb isə məişət şəraitində hazırlanmış kulinariya məhsulları, kremli tortlar, müxtəlif salatlar və digər məhsullar olub.
İctimai yerlərdə siqaret çəkilməsi qadağan ediləcək
24.12.2015
Yaxın iki ildə Azərbaycanda ictimai yerlərdə siqaret çəkilməsi qadağan ediləcək.
Ölkə.Az “Report”a istinadən xəbər verir ki, bununla bağlı prezident İlham Əliyevin təsdiqlədiyi “Azərbaycan Respublikasında qeyri-infeksion xəstəliklərlə mübarizəyə dair 2015-2020-ci illər üçün strategiya” sənədində müddəa yer alıb.
Tütün məhsulları ilə məhdudlaşdırmalar 2016-2017-ci illərdə həyata keçiriləcək.
Əfv siyahısı prezidentə təqdim olundu
24.12.2015
Azərbaycan İnsan Hüquqları üzrə Birgə İşçi Qrupunun iclası başa çatıb.
Ölkə.Az “Report”a istinadən xəbər verir ki, iclasda hazırda həbsdə olan şəxslərdən ibarət 22 nəfərlik siyahı hazırlanıb. Siyahı Azərbaycan Prezidentinə təqdim olunacaq. Prezidentdən həmin şəxslərin çəkilməmiş cəzalarının əfv edilməsi xahiş olunacaq.
Həmin şəxslər arasında hazırda həbsdə olan Hüquq Maarifçiliyi Cəmiyyətinin rəhbəri İntiqam Əliyev, jurnalist Pərviz Həşimli, REAL-ın rəhbəri İlqar Məmmədov, “Seçki” Monitorinq Mərkəzinin rəhbəri Anar Məmmədovun və başqalarının adları var.
Mehriban Əliyevaya vəzifə verildi
24.12.2015
Azərbaycanın birinci xanımı Mehriban Əliyeva dekabrın 24-də yenidən Azərbaycan Gimnastika Federasiyasının prezidenti seçilib.
APA-nın xəbərinə görə, Azərbaycan Gimnastika Federasiyasının hesabat-seçki xarakterli altıncı ümumi yığıncağında keçirilən səsvermənin yekunlarına əsasən, Mehriban Əliyeva növbəti beş il müddətində federasiyaya rəhbərlik edəcək.
Çörəyin qiymətini artıranlarla bağlı ciddi tədbirlər görüləcək
24.12.2015
Azərbaycanda manatın məzənnə dəyişikliyinin çörəyin qiymətinə təsiri araşdırılır.
İqtisadiyyat və Sənaye Nazirliyinin mətbuat xidmətindən verilən məlumata görə, manatın üzən məzənnə rejiminə keçirilməsi ilə əlaqədar idxal olunan ərzaq buğdasının qiymətinın artması nəticəsində unun və çörəyin qiymətindəki dəyişiklik nazirlik yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən diqqətlə araşdırır və süni qiymət artımı hallarına yol verilməməsi üçün nəzarət tədbirləri davam etdirilir.
Daha bir şəhərin Baş planı hazırlanır
24.12.2015
Dövlət Şəhərsalma və Arxitektura Komitəsinin sifarişi ilə Salyan şəhərinin Baş plan layihəsinin hazırlanması həyata keçirilir.
Bu barədə komitədən bildirilib.
“Baş planın ilkin layihəsi ilə tanışlıq dekabrın 24-dən başlayaraq 60 gün müddətində Salyan şəhərində keçiriləcək. Hazırlanmış ilkin layihə ilə tanış olmaq, o cümlədən layihəyə dair etiraz və təkliflərin bildirilməsi üçün aşağıdakı ünvana müraciət etmək olar.Salyan şəhəri, T.Xəlilbəyli küçəsi 136, Salyan Rayon İcra Hakimiyyətinin inzibati binası”, - deyə komitənin məlumatında deyilib.
Bayramda 8 gün evdə olacağıq
25.12.2015
2016-cı ildə Azərbaycanda Novruz bayramı ilə əlaqədar qeyri-iş günləri açıqlanıb.
Nazirlər Kabinetinin qərarına əsasən gələn il 20, 21, 22, 23 və 24 mart tarixləri mart Novruz bayramıdır. Əmək Məcəlləsinə əsasən, 2016-cı ildə Novruz bayramı günlərində 20 mart tarixi bazar gününə təsadüf etdiyi üçün iş və istirahət günlərinin yerləri dəyişdirilərək 25 mart qeyri-iş günü olacaq. 26 və 27 mart tarixləri isə şənbə və bazar günlərinə təsadüf etdiyindən Novruz bayramında 8 gün – 20, 21, 22, 23, 24, 25, 26 və 27 mart tarixləri qeyri-iş günü olacaq.
Həmçinin 6-7 iyul tarixlərində Ramazan, 12-13 sentyabrda isə Qurban bayramıdır.
Daha bir vəzifəli korrupsiyaya görə tutuldu
25.12.2015
Azərbaycanda daha bir vəzifəli şəxs korrupsiya faktına görə tutulub.
Ölkə.Az xəbər verir ki, Baş prokuror yanında Korrupsiyaya Qarşı Mübarizə Baş İdarəsi əməkdaşları ötən gün Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) Füzuli rayon şöbəsində əməliyyat keçirib. Əməliyyat zamanı şöbənin rəis müavini Yasər İbrahimov saxlanılıb. SHXÇDX-nın Füzuli rayon şöbəsindən APA-ya Y. İbrahimovun tutulması faktını təsdiqləyiblər.
Hazırda əməliyyat tədbirləri davam etdirilir.
Azərbaycan Qırğızıstana 1 milyon manatlıq yardım göndərdi
25.12.2015
Azərbaycanın göndərdiyi humanitar yardım dekabrın 24-də Qırğızıstana çatıb.
Bu barədə Ölkə.Az-a Azərbaycan Fövqəladə Hallar Nazirliyindən (FHN) bildirilib.
Qeyd edək ki, Azərbaycan FHN Qırğızıstanda baş vermiş güclü zəlzələ ilə əlaqədar prezident İlham Əliyevin tapşırığı ilə bu ölkəyə bir milyon manat dəyərində humanitar yardım göndərib.
Azərbaycanda yeni vergi departamenti yaradıldı — Rəis təyin edildi
25.12.2015
Vergilər naziri Fazil Məmmədovun 24 dekabr 2015-ci il tarixli əmri ilə Vergilər Nazirliyi yanında 1 saylı Vergilər Departamenti yaradılıb.
Analitik-informasiya şöbəsindən "APA-Economics"ə verilən məlumata görə, yeni yaradılmış strukturun ştat tərkibi Bakı Vergilər Departamentinin işçiləri hesabına formalaşdırılıb.
Vergilər Nazirliyi yanında Bakı Vergilər Departamentinin rəisinin 1-ci müavini Zaur Fətizadə 1 saylı Vergilər Departamentinin rəisi vəzifəsinə təyin olunub.
Düşmənin pilotsuz uçan aparatı məhv edildi
25.12.2015
Düşmənin pilotsuz uçan aparatı məhv edilib.
Müdafiə Nazirliyinin mətbuat xidmətindən verilən məlumata görə, dekabrın 25-də saat 11:45 radələrində Tərtər rayonu istiqamətində Ermənistan silahlı qüvvələrinə məxsus pilotsuz uçan aparat aşkarlanaraq bölmələrimiz tərəfindən sərrast atəşlə dərhal məhv edilib.
KİV-lə bağlı qanun pozuntusuna qarşı sərt cəzalar tətbiq ediləcək
25.12.2015
Azərbaycanda kütləvi informasiya vasitələrinə qanunsuz sponsorluq edənlərə qarşı yeni və sərt cəzalar tətbiq olunur.
Milli Məclisdən APA-ya verilən məlumata görə, bu, yeni hazırlanmış İnzibati Xətalar Məcəlləsinin 386-cı maddəsində təsbit olunub.
Maddəyə görə, kütləvi informasiya vasitələrinə, o cümlədən teleradio verilişlərinin (proqramlarının) hazırlanmasında sponsorluqla bağlı “Televiziya və radio yayımı haqqında” və “Kütləvi informasiya haqqında” qanunların tələblərinin pozulmasına görə, fiziki şəxslər 1000 manatdan 1500 manata qədər, vəzifəli şəxslər 2500 manatdan 3 500 manata qədər, hüquqi şəxslər isə 8 000 manatdan 10 000 manata qədər cərimələnəcəklər.
Xarici kəşfiyyata işləyən 7 azərbaycanlı tutuldu
25.12.2015
Bu il dövlət sərhədini pozduğuna görə 461, sərhəd rejimi qaydalarını pozduqlarına görə 16 min 648 nəfər saxlanılıb.
Bu barədə Dövlət Sərhəd Xidmətinin (DSX) 2015-ci ildə xidməti-döyüş fəaliyyətinin yekunlarına həsr olunan hesabat müşavirəsində qeyd olunub. Onların 55,1% Azərbaycan, 8,5% Özbəkistan, 7,6% İran, 4,3% Banqladeş, 3,9% Əfqanıstan, 2,6% Gürcüstan, 2,4% Moldova, 2,2% Rusiya, 1,7% Türkiyə, 1,3% Nigeriya, 1,3% Qırğızıstan, 9,1% digər ölkə vətəndaşları olub.
Bundan başqa, il ərzində 4 011 nəfər axtarışda olan şəxs tutulub, 269 nəfər saxta, 30 nəfər özgəsinin sənədi ilə və 20 nəfər gizli şəkildə sərhəd nəzarəti məntəqələrindən keçməyə cəhd edərkən saxlanılıb.
Eyni zamanda Azərbaycana qarşı kəşfiyyat-pozuculuq fəaliyyəti məqsədilə bu il dövlət sərhədində xarici xüsusi xidmət orqanları ilə əlaqədə şübhəli bilinən 7 Azərbaycan vətəndaşı və 1 əcnəbi tutulub.
Məxfi əməkdaşlığa cəlb olunmuş 2 Azərbaycan vətəndaşı müəyyən olunub, xaricdə münaqişə zonalarında döyüşmüş 11 Azərbaycan vətəndaşı saxlanılıb. Qanunsuz miqrasiya, qaçaqmalçılıq, narkotik maddələrin qanunsuz dövriyyəsi ilə məşğul olan 16 mütəşəkkil cinayətkar dəstə zərərsizləşdirildiyi də diqqətə çatıdırlıb.
AMEA-nın 4 qurumu ləğv edildi
25.12.2015
Azərbaycan Milli Elmlər Akademiyasının (AMEA) 4 qurumu ləğv edilib.
Nazirlər Kabinetinin Azərbaycan Milli Elmlər Akademiyasının bəzi məsələləri haqqında qərarına əsasən, Azərbaycan Milli Elmlər Akademiyasının Elmi İnnovasiyalar Mərkəzi, "Selen" Elmi İstehsalat Birliyi, Reagentlərin İşlənməsi və Xalq Təsərrüfatı üzrə İstehsalat Təcrübəli Xüsusi Konstruktor Texnoloji Bürosu və Mineral Xammalın Kompleks Emalı üzrə Təcrübə İstehsalatlı Xüsusi Konstruktor Texnoloji Bürosu ləğv edilib.
AMEA bu qərardan irəli gələn məsələləri həll edəcək.
Bu qərar imzalandığı gündən (15 dekabr) qüvvəyə minir.
Dövlət sərhədini pozan 461 nəfər saxlanılıb
25.12.2015
2015-ci ildə dövlət sərhədini pozduğuna görə 461, sərhəd rejimi qaydalarını pozduqlarına görə 16 648 nəfər saxlanılıb.
Ölkə.Az-ın məlumatına görə, bu barədə Dövlət Sərhəd Xidmətinin (DSX) 2015-ci ildə xidməti-döyüş fəaliyyətinin yekunlarına həsr olunmuş hesabat müşavirəsində bildirilib.
Həmin şəxslərin 55,1%-i Azərbaycan, 8,5%-i Özbəkistan, 7,6%-i İran, 4,3%-i Banqladeş, 3,9%-i Əfqanıstan, 2,6%-i Gürcüstan, 2,4%-i Moldova, 2,2%-i Rusiya, 1,7%-i Türkiyə, 1,3%-i Nigeriya, 1,3%-i Qırğızıstan, 9,1%-i isə digər ölkə vətəndaşları olublar.
MTN-nin daha bir generalı həbs edildi
25.12.2015
Ləğv edilən Milli Təhlükəsizlik Nazirliyinin Antiterror Mərkəzinin sabiq rəisi, general mayor Elçin Quliyev həbs edilib.
Ölkə.Az xəbər verir ki, bu barədə Trend-ə etibarlı mənbə bildirib.
Qeyd edək ki, bundan öncə, E.Quliyev MTN-in Heydər Əliyev adına Akademiyasının kafedra rəisi təyin edilmişdi.
AZAL-dan sevindirici xəbər
25.12.2015
Bakı-Berlin-Bakı reysi bərpa edilir.
Azərbaycan Hava Yolları ASC-dən bildirilib ki, 27 mart 2016-ci il tarixindən etibarən Bakıdan Berlinə müntəzəm reyslər bərpa ediləcək.
Bakı-Berlin-Bakı marşrutu üzrə birbaşa uçuşlar həftədə iki dəfə - çərşənbə axşamı və bazar günləri yerinə yetiriləcək.
AZAL-ın reysi Berlin hava limanının daha yüksək səviyyəli xidmət, müddəti və müasir biznes zalı (business lounge) ilə fərqlənən əsas terminalı olan “A” terminalına enir.
Bakı-Berlin-Bakı marşrutu üzrə aviabiletin qiyməti 371 avrodan başlayır.
Bakı-Berlin-Bakı reysi biznes və ekonom salonlu müasir, komfortlu “Airbus A319” laynerləri ilə həyata keçiriləcək.
Ölkə.az
