Nazirlikdən balıqçılara cavab

Ekologiya və Təbii Sərvətlər Nazirliyi Su Hövzələrində Bioloji Resursların Artırılması və Mühafizəsi Departamentinin direktoru Rasim Həsənov Neftçalada balıqçıların etirazına münasibət bildirib.

Ölkə.Az xəbər verir ki, Rasim Həsənov qeyd edib ki, etiraz edən şəxslər qanunsuz balıq ovu ilə məşğul olmaq istəyənlərdir: `Qanunsuz balıq ovu ilə məşğul olanların, brakonyerliyin qarşısı tərəfimizdən alınır. Biz qanun çərçivəsində bu şəxslərdən tələb edirik ki, qanuni prosedurlara əməl etsinlər, sadələşdirilmiş qaydada balıq ovlama bileti alsınlar.

Bizim balıq ovu ilə məşğul olanlardan yeganə tələbimiz budur. Hər şeyi qanun çərçivəsində həll etmək mümkündür. Bir daha qeyd edirəm, hər bir balıqçı qanuna müvafiq qaydada balıq ovlama bileti almalıdır`.

Onun sözlərinə görə, bu aksiyanı təşkil edənlər rayonda qanunsuz balıq ovuna himayədarlıq edənlərdi: `Digər tərəfdən, biz qanuni tələbləri irəli sürməyə də bilərik, amma brakonyerlik baş alıb gedəndə deyilməsin ki, siz hara baxırsınız. Lakin bu, çıxış yolu deyil. Balıqçılar yerlərdəki qanunsuz balıq ovuna dəstək verən və belə aksiyalar təşkil edən bəzi himayədarlarının fitnəsinə getməsinlər. Hər kəs sadəcə qanunun tələblərinə əməl etməlidir".

Ölkə.Az