Vasif Talıbovun həyat yoldaşı donuz qripi şübhəsi ilə Türkiyəyə aparıldı

Naxçıvan Muxtar Respublikası Ali Məclisinin sədri Vasif Talıbovun həyat yoldaşı "donuz qripi" şübhəsi ilə dünən gecə təcili olaraq Ankaraya gətirilib.

Ölkə.az türk mediasına istinadən xəbər verir ki, Vasif Talıbovun həyat yoldaşı Sevil Talıbova yüksək hərarətlə əvvəlcə Naxçıvan xəstəxanasına, daha sonra ağ ciyərində aşkar olunan problem səbəbindən təcili xüsusi təyyarə ilə Ankaradakı "İbn Sina" xəstəxanasına çatdırılıb.

Sanitar təyyarədə Sevil Talıbovanın süni nəfəs cihazına qoşulduğu bildirilir. Şübhələr "donuz qripi" ətrafında olsa da, hələlik xəstəyə dəqiq diaqnoz qoyulmayıb. Onun "İbn Sina" xəstəxanasının reanimasiya şöbəsində olduğu bildirilir. Sevil Talıbovanın ardınca Naxçıvandan həyat yoldaşı Vasif Talıbov və uşaqları da başqa bir təyyarə ilə Ankaraya gəliblər.

Xatırladırıq ki, bu Türkiyədə bir ilk hesab olunur. Yerli medianın verdiyi xəbərə görə, ölkəyə ilk dəfədir ki, ambulans təyyarə ilə, yəni Türkiyədən göndərilən ambulans təyyarə ilə ölkəyə xaricdən xəstə gətirilir.

Ölkə.az.