Sabiq polis rəisi ölkədə artan oğurluq və qarətlərdən danışdı

"Hansı ölkədə ki, sosial problemlər baş alıb gedir, həmin ölkədə mütləq şəkildə tamah məqsədi ilə törədilmiş cinayətlər də artır" 

Son günlər ölkədə oğurluq, quldurluq və soyğunçuluq halları artıb.

Ölkədə baş verən devalvasiya, qiymət artımı, kriminala meyilli insanları artıq hərəkətə gətirib. Manatın kəskin ucuzlaşması, qiymətlərin bahalaşması, iş yerlərindəki ixtisarlar bəzi insanları daha risqli və çirkin işə əl atmağa vadar edir.

Ölkədə son günlər pisləşən kriminogen durumla bağlı sabiq polis rəisi, Elmi-praktiki Hüquq Mərkəzinin əməkdaşı Mahmud Hacıyev Ölkə.Az-a danışıb:

"Bu nə mənim, nə də sizin subyektiv fikriniz deyil. Bu 100 illər bundan öncə sübut olunmuş, istər məhkəmə istintaq təcrübəsində, istər məhkəmə istintaq təcrübəsinin nəzəri hissəsi ilə məşğul olan məhkəmə psixoloqları, kriminalistlər, kriminoloqlar tərəfindən sübut olunub. Hər hansı bir ölkədə, dəxli yoxdur bu ölkə Azərbaycandır, ya başqa hansısa biri, hansı ölkədə ki, sosial problemlər baş alıb gedir, mütləq qaydada orada tamah məqsədi ilə baş vermiş cinayətlərin sayı artır. Bu riyaziyyatda 2x2=4 kimi bir şeydir. Tamah motivi ilə baş verən cinayətlər: oğurluq, quldurluq, soyğunçuluq, şəxsi əmlak oğurluğu, dövlət və bələdiyyə əmlakının oğurluğu. Bu aksiomadır. Bunu inkar etmək olmaz. Bunu inkar etmək o deməkdir ki, vurma cədvəlində 2x2=4 yox, 2x2=5 edir deməkdir.

Azərbaycanda iki dəfə devalvasiya olub. Bu faktdır, bunu danmaq olmaz. Hər iki devalvasiyada pulun alıcılıq gücü düşdü. Bununla yanaşı ərzaq və digər məhsulların qiymətlərində də kəskin artım oldu. Bunlar da istər-istəməz əhali arasında sosial iqtisadi problemlər yaradır. Problemlər yarananda əhalinin bir qismi bu problmin öhdəsindən gələ bilmir. İnsan öhdəsindən gələ bilmədiyi işə görə kriminala baş vurur. Bu qaydadır, düsturdur, mütləq baş verməlidir.

Deyə bilərlər ki, ölkədə hüquq-mühafizə orqanları var, onlar gücləndirilmiş iş rejimində işləyə, şəxsi heyətlərinin sayını artıra bilərlər. Sosial-iqtisadi problemlər yarananda, əhali də kriminala meyilli olanda onda hüquq mühafizə orqanları gücsüz vəziyyətdə olurlar. İstər hüquq-mühafizə orqanlarının peşəkarlığı da yüksək səviyyədə olsun, şəxsi heyətlərinin sayı da çox olsun, fərq etməz. Çünki kriminala gedən kəslər düşünürlər, çalışırlar, elə şəraitdə əməl törətsinlər ki, hüquq-mühafizə orqanları onları tuta bilməsin. Cinayət qanunvericiliyində, cinayət hüququnda cinayətlər 2 cür baş verir. Bunlar gizli və açıq şəraitdə baş verən cinayətlərdir. Oğurluq, quldurluq, soyğunçuluq, şəxsi əmlak oğurluğu, dövlət və bələdiyyə əmlakının oğurluğu, bunlar gizli şəraitdə baş verən cinayətlərdir. Bu tip cinayətlərin açılması həmişə problemlər yaradıb. Ona görə də cinayət hallarının artması gözlənilən idi".

Qeyd edək ki, son günlər oğurluğa, quldurluğa, soyğunçuluğa görə həbs edilən şəxslərin əksəriyyəti, "iş yoxdur", "ailəmi dolandıra bilmirəm" kimi fikirlərlə özlərinə haqq qazandırmağa çalışırlar.

Səxavət Məmməd
Ölkə.Az