Xatirə İslam və hamamdakı şəkillər
İntiqam VALEHOĞLU
İki gündür hamı "Facebook"da, "Instagram"da müğənni Xatirəni söyür.
Nə var, nə var Xatirə camaata deyib ki, siz qaraçısız, görməmişsiz, nə bilim nə. Yoldaşlar, imkan verin, əvvəlcə bu məsələyə qaraçı xalqının nümayəndələri münasibət bildirsin. İkincisi, yazırsınız ki, təqsir səndə yox, səni 5-6 min verib toyunda oxutdurandadır. Yəni, bu məntiqlə belə çıxır ki, biz Xatirəni toylarımıza çağırıb oxutdurmuşuq, o da pul qazanıb, sonra harınlayıb. Siz dəqiq bilirsiniz ki, onun sizə qaraçı deməyinin səbəbi budur? Söhbət təkcə Xatirədən getmir. Ümumiyyətlə, çox adam belə düşünür ki, müğənni, musiqiçi qudurubsa, bunun günahı bizdədir. Biz yedirtmişik, içirtmişik, oxutmuşuq, çaldırmışıq, axırda pulunu vermişik. O da indi üstümüzə hücum çəkir. Dostlar, bəs heç düşünürsünüzmü ki, siz belə deyəndə başqa birinin haqqına girmiş olursunuz? Məsələn, dünən səhnəyə çıxan Ayka Şirinka yüz minlik maşın sürürsə və heç kimi saymırsa, bu, o deməkdir ki, o bizim pulumuzla qudurub? Əsla. Niyə bu civilərdən müğənni qayıran daydaylara belə haqsızlıqlar edirsiniz? Həmin daydaylar gecələrini gündüzlərinə qatıb onlara pul buraxıblar. Bax həmin civilər o daydayların məclislərində çalıb-oxuyublar.
O ki qaldı Xatirəyə, bu, onun ilk belə açıqlaması deyil. Məsələn, hamamda şəkil çəkib paylaşır, günahkar oxucu olur, deyir ki, ərimin 5 min işçisi var, sonra söhbət yalan çıxır, bu dəfə jurnalistlər haqsız sayılır. Hovuzda iki oğlanla şəkil çəkdirir, jurnalistlər yazır. Ardınca açıqlama verilir ki, həmin oğlanlarla bacı-qardaş kimiyik. Təbii ki, bütün bunlar şəxsi məsələlərdir. Ancaq bir insanı yaxşı yaxud pis mənada olmasından asılı olmayaraq, cəmiyyətdə tanıyırlarsa, ikiqat diqqətli olmalıdır.
Yadıma düşmüşkən, deyim ki, dünəndən bəri xalqımızın zəngin söyüş bazasına heyranlığımı gizlədə bilmirəm. Təsəvvür edin, elə söyüşlər söyürlər ki, Fərda demişkən, xırdaladıqca xırdalayırsan e. Yerin altındakılar, üstündəkilər, gələcək nəsilləri "nizədən" keçirirlər. Ancaq inanıram ki, Xatirə heç olmasa çıxıb deyəcək ki, o statusu yazan mən deyildim. Yalandan da olsa...
Ölkə.az
