"Azərbaycanda cinayətlərin sayı artacaq"

Son günlər ölkə mediasında ən çox izlənilən, oxunan iqtisadiyyat və kriminal xəbərlərdir. Məsələn, bir neçə ay əvvəl hansısa vacib iqtisadi xəbərin oxunma sayı 500-ə çatmırdısa, indi bu göstərici bəzi hallarda on mini keçir. Şübhəsiz ki, burada əsas səbəb manatın devalvasiyaya uğraması, nəticədə ölkədə ərzaq məhsullarının, bir çox xidmətlərin qiymətinin təxminən iki dəfə artmasıdır. Diqqət çəkən digər məqam isə kriminal xarakterli hadisələrin sayında müşahidə olunan artımdır. Təsadüfi deyil ki, bu ərəfədə sosial şəbəkələrdə də insanlar arasında bir vahimə yaşanır. Hətta bununla bağlı bir sıra videolar da paylaşılmaqdadır. Doğrudanmı, devalvasiya, bahalaşma insanların psixologiyasına bu qədər təsir göstərib və kriminal hadisələrin sayında müşahidə olunan artım da məhz bunun nəticəsidir?

Tanınmış psixoloq Dəyanət Rzayev Ölkə.az-a açıqlamasında bildirib ki, bahalaşmadan sonra cinayət hadisələrinin artması təsadüfi deyil:

"Niyə bundan əvvəl hadisələrin sayı bu qədər deyildi? Fikir verirsinizsə, son zamanlar qarətlər, soyğunçuluqlar artıb. Baxaq, qarət xarakterli cinayəti törədənlər hansı tipli insanlardır, kimlərdir? Görürsən ki, kimsə dükandan ərzaq məhsulu oğurlayır. Deməli, bu, insanların imkansızlığıyla bağlıdır".

Ekspert bildirir ki, ehtiyac ucbatından törədilən cinayətlərlə yanaşı, psixologiyasında cinayətə meyillilik olan şəxslərin sayı da yetərincədir:

"Psixologiyasında kriminala meyli olan insan isə belə hallarda özünə bəraət qazandırır. Məsələn, soruşursan ki, niyə belə etmisən? Cavab verir ki, imkansızlıqdan. Halbuki başqa şeylərə əl ata bilərdi. Deməli, bunun ya genində, ya özündə kriminala meyil var. Ancaq ümumilikdə demək olar ki, yaxın vaxtlarda belə hadisələrin sayı daha da çoxalacaq. İnsan var ki, aclıqdan, çarəsizlikdən, borc əlindən özünü öldürür. Baxanda bu da cinayət hadisəsidir. Bu hadisələrin bahalaşmayla, devalvasiya ilə birbaşa bağlılığı var. Ən qorxulusu bilirsiniz nədir? Məsələn, Sovet İttifaqı dağılanda da devalvasiya gedirdi, qıtlıq yaranmışdı. Amma o zaman insanlarda müəyyən qədər patriatizm və gələcəyə ümid var idi. İndiki halda insanlarda ümid yoxdur. Çünki ölkə yeni qurulurdu deyə, insanlar nəyəsə ümid bəsləyirdilər".

Dəyanət Rzayevin sözlərinə görə, bu durum bir müddət davam edəcək və tədricən stabilləşəcək:

"Dediyim kimi bir müddət qarətlərin, soyğunçuluqların sayı artacaq. İnsanlar kasıbçılığa, qənaətlə yaşamağa öyrəşəndən sonra tədricən stabillik yaranacaq. Bu, təbii bir haldır. Dünya statistikasına da baxsaq görərik ki, böhran dövründə cinayətlərin sayı artır".

İntiqam VALEHOĞLU
Ölkə.az