Ruslan İzzətli: \"HDP Qəndil dağından, PKK-dan gələn sifarişləri yerinə yetirir\"

Türkiyənin İstanbul şəhərində, Sultanəhməd meydanında dəhşətli terror aktı baş verib. Terror aktı zamanı 15 nəfərin öldüyü bildirilir.

Bu qanlı hadisə ilə bağlı D18 Hərəkatının sədri Ruzlan İzzətli Ölkə.Az-a danışıb:

"İstər Türkiyə tarixçi və siyasətçilərinə, istər də ölkəmizin tarixçi və siyasətçilərinə PKK-nı kimin yaratdığı məlumdur. PKK-dan Türkiyədə kimlər istifadə edir bunu hər kəs yaxşı bilir. Türkiyə Suriya və Yaxın Şərq məsələsində Putinə ağır zərbə vurdu. Putin ona vurulan zərbəni heç vaxt bağışlamayacaq. Rusiya Türkiyə ilə açıq müharibə edə bilmir. Çünki iqtisadi cəhətdən Rusiyanın vəziyyəti ağırdır. Əgər Türkiyə ilə müharibəyə girsə, vəziyyəti daha da ağırlaşacaq. Türkiyə Rusiya üçün Gürcüstan, Ukrayna deyil. Bunu Putin də çox yaxşı bilir. Buna görə də, Rusiya Türkiyənin içərisindəki "isti ocaqları" qaynatmağa başlayıb. Son dönəmlər Türkiyə PKK-ya qarşı açıq müharibə aparır. Kürdləri təmsil edən HDP parlamentdə 3-cü ən böyük partiya olmasına baxmayaraq yenə öz ampulasından əl çəkmir. HDP və yerlərdəki kürd liderləri kürd xalqı artıq özün idarə edə biləcək düşüncəsini ortaya qoydu.

Diyarbəkirdə, Mardində PKK sivil insanları məcbur edir ki, Türkiyə polisinə, əsgərinə, valisinə qarşı silahlı mübarizə aparsın. Təbii ki, Türkiyə dövləti bunu kənardan izləməyəcək. Türkiyə ordusunun Baş qərargahı rəsmi hər gün 50, 60,70 PKK terrorçusunu məhv etdiyini bildirir. Türkiyə dövləti PKK-nı birmənalı şəkildə aradan qaldıracağını düşünür. Diyarbəkirdə, Mardində, Şırnakda PKK deyilən bir problem qalmayacaq.

İstanbulda olan partlayış sabah İzmirdə, Trabzonda da ola bilər. İstanbulda baş verən terroru PKK törədib. Bundan əlavə Türkiyənin İŞİD kimi də bir düşməni var. Türkiyənin qarışmasında PKK və HDP çox aktivlik göstərir. Mən də o fikirdə idim ki, HDP-nin Türkiyə parlamentində olması Türiyə siyasətinə rəng qatacaq, bu müsbət bir haldır. Çox təəssüf ki, necə siyasət yürüdəcəyinə HDP özü qərar verə bilmir, Qəndil dağından, PKK-dan gələn sifarişləri yerinə yetirir".

Xatırladırıq ki, Ərdoğan İstanbuldakı terror aktından sonra çıxış edərək bu qanlı aksiyanın arxasında İŞİD-in durduğunu bildirib.

Səxavət Məmməd
Ölkə.Az