Azərbaycanda daha bir həkim terroru: həkim qohumu olan 3 yaşlı qızı şikəst etdi

Həkim səhlənkarlığı daha bir uşağın səhhətində ciddi problemlərə səbəb olub. Oxucumuz Aysel Nəcəfova redaksiyamıza məktub yazaraq qohum olduqları həkimin onun övladını şikəst etdiyini bildirib.

Ölkə.az-a daxil olan məktubu olduğu kimi təqdim edirik:

"Qızım Verdiyeva Fatimə İzzət qızı hazırda yeddi yaşındadır. Sizə yazdığım hadisə dörd il əvvəl baş verir. Üç yaşında Fatimənin bəzi qorxuları var idi. Bu qorxulara görə onu Sumqayıt şəhərindəki poliklinikada işləyən uşaq nevropatoloqu Zəkiyyə Qasımovanın yanına apardıq. Yeri gəlmişkən, deyim ki, Zəkiyyə Qasımova bizim uzaq qohumumuzdur. O, qızıma çoxlu sayda əsəb dərmanları yazdı. Bir ay müalicədən sonra bildirdi ki, uşaq ikinci kurs müalicəni də keçməlidir. Dərmanları qəbul edəndən 15 gün sonra Fatimənin ayaqları tutuldu, gözlərində nestaqm (göz bəbəyinin oynaması) yarandı. Bu vəziyyətdə onu 1 nömrəli xəstəxananın toksikologiya şöbəsinə çatdırdıq.

Xəxtəxanada kəskin dərman zəhərlənməsi diaqnozu ilə müalicəyə başlanıldı. Zəkiyyə Qasımovaya zəng vurub dedim ki, uşaq həmin dərmanlardan zəhərlənib. Ancaq ondan sonra nə zəng eləmədi, nə də uşağın yanına da gəlmədi. Müalicədən sonra Fatimə bir az yaxşılaşdı və xəstəxanadan çıxdıq. Sonra İrana apardıq və orada iki il müalicə aldı. İrandakı müalicədən sonra qızım yeriməyə başladı. Amma səndələyərək yeriyirdi. Göz bəbəyinin oynaması və əllərindəki əsmə isə davam edirdi. Azərbaycanın demək olar ki, bütün nevropatoloqlarının yanında olduq, nevroloji xəstəxanada iki dəfə konsilium keçirdilər. Ancaq uşağın dərdini tapa bilmədilər və bildirdilər ki, Ankaranın Hacettepe Universitetinə gedək. Sonra Nevrologiyanın Fizuli adlı həkiminin yanına getdik və məlum oldu ki, Fatimənin bu vəziyyətə düşməsinin səbəbi yazılan səhv dərmanlardır. Bakıda müalicənin heç bir effekti olmadığından bu dəfə Gürcüstana üz tutduq. Bir il müalicədən sonra orada bizə uşağı Türkiyəyə aparmağı məsləhət gördülər. Sonda dəyərli əşyalarımızı satıb, borca girib uşağı İstanbula apardıq. Həkimlər bildirdilər ki, sizin uşağınızın heç bir dərmanla sağalma ehtimalı yoxdur və heç bir dərman yazmadılar. Artıq qızımın yeddi yaşı var, hələ də əlləri əsir. İkinci sinifdə oxuyan qızım heç bir yazısını yaza bilmir, çətinliklə yeriyir, göz bəbəyi hələ də oynayır. Aidiyyatı qurumlardan xahiş edirəm həkim adını daşıyan bu fırıldaqçıyla bağlı tədbir görsün. Mən bir anayam. İstədiyim odur ki, heç olmsa, başqa analar mənim kimi bir dərdlə üzləşməsinlər. Qayınatam sırf nəvəsinin fikrindən iki dəfə infarkt keçirib dünyasını dəyişdi".
Sonda Aysel Nəcəfovanın fakt olaraq göndərdiyi fotoları təqdim edirik.