"Bank of Baku" müştərilərini aldatdığını etiraf etdi

Üç gün öncə "Bank of Baku"nun müştərisi olan Pərviz Əzimovu bankın aldatdığını və plastik kart hesabından artıq pul çıxdığını yazmışdıq.

Ölkə.az-ın bu xəbərindən və müştərinin haqlı tələblərindən sonra bank çıxış yolu qalmadığını deyəsən anlayıb. Bu haqda bankın müştərisi Pərviz Əzimov yazır:

""Bank of Baku" haqqında o günkü şikayətimdən sonra olanları yazım.

Yazmışdım ki, bank kartdan günün kursundan əlavə məbləğ tutub.

Bank rəsmiləri də sosial şəbəkədə gah statusun altında yazdılar ki, məlumatlarınızı qeyd edin yoxlayaq, sonra "inbox"da yazdılar ki, yenidən müraciət edin. 1 saat keçdi yazdılar ki, müştəri kodunuzu deyin. Ən nəhayət yazdılar ki, bəs 10 faiz konvertasiya haqqı tutulub (10 faiz! Fantastika). Ona görə də əlavə çıxılan pul odur. Hesabladım, gördüm, əgər 10 faiz çıxıblarsa, o zaman 407 AZN çıxmalı idilər, amma 390 AZN çıxıblar. Demək yenə səhv ediblər.

Dünən isə sms gəldi ki, bəs üzr istəyirik, balansınızdan əlavə məbləğ çıxılıb, 359 AZN əvəzinə 390 AZN çıxmışıq.

Qadanızı alım, vallah, bunlar bilmir nə edir? Öz etdiklərini 2 gündə 3 dəfə özləri danıblar. Siz də ehtiyatlı olun, vəziyyətdən çıxmaq üçün bu banklar ağızlarına gələn bir əməliyyat adı deyə bilərlər. İnanıb keçməyin, hesablayın mütləq".

Qeyd edək ki, ölkə rəhbəri son çıxışında fırıldaqçılar haqqında ölçü götürüləcəyini, ictimai nəzarətin mütləqliyini qeyd edib.

Ölkə.az