DİN Masallıdakı silahlı basqınla bağlı məlumat yaydı

Daxili İşlər Nazirliyi Masallı rayonunda yanacaqdoldurma məntəqələrinə silahlı basqınla bağlı məlumat yaydı.

Ölkə.Az xəbər verir ki, yanvarın 14-də saat 05 radələrində Masallı rayonunun Sərçuvar kəndində yerləşən “Sərçuvar Petrol” yanacaqdoldurma məntəqəsinə gəlmiş naməlum şəxs orada işləyən Rafiq Qafarovu və Nağı Həsənovu hədələyib tüfəngdən havaya atəş açaraq pul vermələrini tələb etmiş, istədiyinə nail ola bilmədiyindən hadisə yerini tərk ediblər.

Masallı RPŞ əməkdaşlarının həyata keçirdikləri əməliyyat-axtarış tədbirləri nəticəsində hadisəni törətmiş rayon sakini Cəlal Cəlalzadə tutulmuş, hadisəni törədərkən istifadə etdiyi “İJ -58” markalı tüfəng götürülüb

Ətrafında aparılmış əməliyyat tədbirləri ilə onun ötən il dekabrın 12-də “Sərçuvar Petrol”, dekabrın 22-də Cəlilabad rayonundakı “Alpetrol”, bu il yanvarın 4-də Camaləddin Heydərova məxsus yanacaqdoldurma məntəqələrindən, habelə ötən il dekabr ayının 29-da Təzə Alvadı kəndində Mürvət Əhədova məxsus yanacaq doldurma məntəqəsindən quldurluq yolu ilə 470 manat pul, dekabr ayının 6-da Cəlilabad rayonunun Muğan kəndində “Smirs” yanacaq doldurma məntəqəsində oranın işçisi Orxan Bədəlova tüfəngdən açdığı atəşlə xəsarət yetirib 2630 manat pul aparması da müəyyən edilib.
 
Masallı RPŞ tərəfindən araşdırma aparılır.

Ölkə.Az