Xəzərin zəbt olunmuş sahilləri və dənizə həsrət qalmış xalq...
Xəzər Rayon İcra Hakimiyyəti sakinləri Xəzər dənizinə həsrət qoyub
Ölkə.az-ın çəkiliş qrupu Xəzərin "zəbt olunmuş sahilləri" haqqında reportaj hazırlayıb. Reportajda gözəllikdə misli-bərabəri olmayan Abşeron bağlarının necə məhv olduğu, Xəzərin qumlu sahillərinin necə zəbt olunduğu öz əksini tapıb.
Əməkdaşlarımız Mərdəkandan Buzovnaya qədər Xəzər sahilindəki hasarlanmış ərazidə olub. Oradan hazırlanmış video, foto və geniş yazını sizə təqdim edirik:
Xəzər dənizinin sahili Bakının Xəzər Rayon İcra Hakimiyyətinin başçısı Gülağa İslamov tərəfindən ya satılıb, ya da yüksək çinli məmurlara hədiyyə edilib.
Mərdəkandan Buzovnaya qədər Xəzər dənizinin sahili ilə gedirik. Yolun sağında istirahət mərkəzləri, solunda isə hektarlarla ərazi hasarlanıb. Kənd sakinləri və sahildəki istirahət mərkəzlərinin mühafizəçiləri bu hasarlanmış obyektlərin kimə məxsus olduğunu əzbər deyir.
Foto və videodan da gördüyünüz kimi, hər yer hasarlanıb, Mərdəkan qəsəbəsinin sakinləri Xəzərin sahilində yaşasa da, Xəzəri görə bilmirlər. Hər tərəf hündür, "Çin səddini" xatırladan divardır...
Əldə etdiyimiz məlumata görə, hasarlanmış ərazilərdə böyük istirahət mərkəzləri tikiləcək və xırda istirahət mərkəzləri ləğv ediləcək. Olan yenə kiçik sahibkarlara olacaq. Bu isə kasıb təbəqənin dənizdən əlinin üzülməsi ilə nəticələnəcək.
Azərbaycan Respublikasının “Torpaq Məcəlləsi”nə görə, Xəzərin 80-130 metrliyində olan ərazilərin satılması qadağan edilsə də, dənizsahili ərazi hazırda hasarlanmaqdadır.
Mərdəkandan Buzovnaya qədər olan sahil ərazisində onlarla kiçik istirahət mərkəzləri var. İstirahət mərkəzlərinin solunda isə hündür divar. Əvvəl elə bilirik ki, divarın arxasında tikinti gedir. Ancaq divara dırmaşıb baxanda görürük ki, yox, hələ tikinti getmir. Bir neçə hektar əraziyə yük maşınları ilə söküntü materialları, torpaq, iri daşlar tökülür. Ərazidə daşlardan, torpaqdan hündür təpəciklər düzəldilib. Bir qədər də irəliləyib yenidən divara çıxanda hasarlanmış yerdə yarım hektarlıq su hövzəsi görürük.
Yaxınlıqda olan istirahət mərkəzinin mühafizəçiləri ilə danışırıq. Onlar bildirirlər ki, hasarlanmış əraziyə mütamadi olaraq torpaq, daş gətirib tökürlər. Bunun səbəbbi də odur ki, o ərazi əvvəllər suyun altında olub. Ərazini uzun müddətdir torpaq və daşla doldururlar. Ancaq sudan ərazini azad etmək mümkün olmayıb. Əgər ərazi vaxtında sudan təmizlənsə idi, onda orada çoxdan böyük istirahət mərkəzi tikilmişdi.
Hasarlanmış ərazinin mühafizəçilərindən ərazinin kimə aid olmasını soruşuruq. Demək olar ki, hamısı eyni cür cavab verir, "yuxarılarındır". Balıqçılar isə, hasarlanmış ərazinin hansı nazirlərə aid olmasını qorxmadan çəkinmədən söyləyirlər.
Bir neçə gün öncə prezident İlham Əliyev İnzibati Xətalar Məcəlləsində dəyişiklik edilməsi haqqında sərəncam imzalayıb. Dəyişikliyə əsasən, dövlətin iqtisadi və ya təhlükəsizlik mənafelərinin təmin edilməsi ilə əlaqədar müvafiq icra hakimiyyəti orqanının qərarı olmadan həmin torpaq sahəsində dəniz sahilinə gediş-gəlişin məhdudlaşdırılmasına görə, fiziki şəxslər 4 min, vəzifəli şəxslər 8 min, hüquqi şəxslər isə 40 min manat miqdarında cərimə olunacaqlar.
Qanunda "icra hakimiyyəti orqanının qərarı olmadan" deyilir, ancaq hər kəsə məlumdur ki, icra başçılarının icazəsi olmadan rayonlarda daşı daş üstə qoymaq mümkün deyil. Ona görə də ərazilərin zəbt olunmasında əsas rolu elə icra başçıları və onların aparatları oynayır.
Bəzən isə icra başçıları qanunu pozmaq "məcburiyyətində qalırlar". Hansısa yüksək vəzifəli məmur istəyir, onların isə ağzı nədir etiraz etsinlər. Bəlkə də buna etiraz edən icra başçısı işini itirə bilər. Bəzən isə belə də olur, kreslosunu rahatlamaq və fəaliyyət müddətini uzatmaq üçün icra başçıları yüksək vəzifəli məmurlara yarınmaq üçün özləri yaxın yerləri hasarlayıb onlara peşkəş edirlər. İndi hər şey mümkündür, amma fakt odur ki, yavaş-yavaş dəniz kasıbın əlindən alınır...
Əgər belə davam etsə, gələcəkdə Abşeron kəndlərinin və paytaxtın sakinləri Xəzərin yalnız havasını hiss edəcəklər, üzünə isə həsrət qalacaqlar və ya girişi pulla olan çimərlikdə pul verib dənizi görə biləcəklər.
Səxavət Məmməd
Fotolar: Nurlan Gülməmmədov
Ölkə.Az
