\"PKK artıq Türkiyənin daxilində hərbi əməliyyatlara başlayıb\"

PKK lideri HDP-ni qiyama çağırıb

PKK lideri Murad Qarailan HDP-yə səslənərək onları Türkiyə daxili vəziyyəti qarışdırmağa çağırıb. O bildirib ki, sabah buralarda təşkilatımızın kökü kəsilərsə, sizi də orada məhv edərlər. Böyük şəhərlərdəki tərəfdarlarımız hərəkətə gəlməlidirlər.

Bununla bağlı politoloq Qabil Hüseynli Ölkə.Az-a açıqlama verib:

"Murad Qarailanın belə bir fikir səsləndirməsi o qədər də yenilik deyil. Türkiyəni qarışdırmaq, ölkənin daxili asayişini pozmaq, iki millətin qarşıdurmasını yaratmaq PKK-nın və Murad Qarailanın gündəliyinə daxil olan əsas məsələlərdəndir. Son zamanlar isə PKK artıq Türkiyənin daxilində hərbi əməliyyatlara başlayıb. Türkiyəyə kifayət qədər ziyan vurmağa çalışır. ABŞ və Avropa ölkələri Türkiyəyə dolayısı ilə bildirir ki, yerli şəraitə uyğun olmayan silahlardan, tank, top, helikopter və qırıcı bombardmançılardan istifadə etməməyi tövsiyyə edirlər. Bu, açıq Türkiyənin daxili işinə qarışmaqdır. Dövlət asayişi bərpa etmək üçün sərəncamda olan qüvvələrdən istifadə etməlidir. Ona görə də, bununla bağlı edilən təkliflərin heç bir əsası yoxdur.

PKK silahı yerə qoyub Türkiyəni tərk etməyincə Türkiyə silahlı qüvvələri silahı yerə qoymayacaq. Bu, istənilən dövlətdə belədir və belə də olmalıdır. Ölkədə xoşagəlməz vəziyyət yaranıb. Türkiyə PKK-nın kökünü kəsmək istəyir, ancaq Rusiya, İran və bəzi qərb ölkələri PKK-nın güclənməsinə çalışır. PKK terror aktlar törədərək ölkəni qarışdırmaq, ölkənin turizm sektorunu çökdürmək üçün əllərindən gələni edirlər".

Səxavət Məmməd
Ölkə.Az