"Xəzər dənizinin sahili Çin səddi kimi hasara alınıb"

Xəzər dənizinin mühasirəyə alınması sürətlə davam etdirilir

Artıq Xəzər dənizini kənardan görmək belə çətinləşib. Bakının girişində Xəzərin sahili villalarla mühasirəyə alınıb. Bakı kəndlərində isə icra başçıları torpaqları ya yüksək vəzifəli məmurlara satıb, ya da hədiyyə ediblər. Məmurlar isə həmin torpaqlarda böyük istirahət mərkəzləri, müxtəlif kommersiya obyektləri tikiblər. Artıq dənizin kənarında yaşamağı ilə öyünən Bakı kəndlərinin sakinləri özləri belə dənizə həsrət qalıblar.

Bu məsələlərlə bağlı D18 Hərəkatının sədri Ruslan İzzətli Ölkə.Az-a danışıb:

"Azərbaycanda nazirlərin, komitə sədrlərinin illərdir öz vəzifələrində oturması artıq o nazirlik və komitələrdə "şahlıq" institutunu yaradıb. Onların "şahlığını" artıq nəinki nazirlik və komitələrdə, bunu təbii sərvətlərimizdə, Xəzər dənizinin üzərində də görə bilərik. Nəinki Mərdəkan, Nardaran, Buzovna tərəfdə, elə Bakının girəcəyində də Xəzər dənizinin sahilinin zəbt edildiyini görə bilərik. Xəzər dənizinin sahili Çin səddi kimi hasara alınıb, heç kəs o dənizi görə bilmir. Ancaq qanunvericilikdə Xəzərin 80-130 metrliyində olan ərazilərin satılması qadağan edilib.

Xəzər rayon icra hakimiyyətinin başçısında o qədər də günah yoxdur. İcra başçısı nazirlərə xoş gəlmək üçün o torpaqları verməlidir. Biz qanunu icra başçısı, nazirlərin üzərinə atmamalıyıq. Qanun o qədər sərtləşməlidir ki, o qanun nazir üçün də, icra başçısı üçün də keçərli olmalıdır.

1500-2000 min manat maaş alan nazir, dəyəri 5-6 milyon manat olan villanı hansı pulla tikdirir? Nəinki nazirlərin, bu gün icra başçılarının da şəhərin mərkəzində elə bir villası var ki, onun qiyməti ən azı 3-4 milyondur. O villalar rüşvətxorluq, korrupsiya, rayonlara ayrılan pulların mənimsənilməsi hesabına tikilir. Xəzər rayon icra başçısı və digər icra başçıları satdığı o torpaqlardan dövlətə 5 manat vergi verməyiblər. Ya da o torpaqları satmayıblar, hansısa nazirin ad günündə o torpaqları onlara hədiyyə ediblər".

Qeyd edək ki, prezident İlham Əliyev İnzibati Xətalar Məcəlləsində dəyişiklik edilməsi haqqında sərəncam imzalayıb. Dəyişikliyə əsasən, dövlətin iqtisadi və ya təhlükəsizlik mənafelərinin təmin edilməsi ilə əlaqədar müvafiq icra hakimiyyəti orqanının qərarı olmadan həmin torpaq sahəsində dəniz sahilinə gediş-gəlişin məhdudlaşdırılmasına görə, fiziki şəxslər 4 min, vəzifəli şəxslər 8 min, hüquqi şəxslər isə 40 min manat miqdarında cərimə olunacaqlar.

Səxavət Məmməd
Ölkə.Az