Həftənin icmalı
Ağır hamiləliklə bağlı yeni komissiya yaradıldı
11.01.2016
Bu ildən başlayaraq, Azərbaycanda kritik vəziyyətdə olan və ölümlə nəticələnə bilən hamiləliklərin səbəbi Səhiyyə Nazirliyi tərəfindən yeni yaradılan xüsusi komissiya tərəfindən araşdırılacaq.
Səhiyyə Nazirliyinin Doğuşayardım Komissiyasının sədri Leyla Rzaquliyeva deyib ki, artıq bununla bağlı Doğuşayardım Komissiyasının nəzdində xüsusi komissiya yaradılıb: “İndi hamiləliklə bağlı kritik vəziyyətlər çoxdur. Necə olur ki, kritik vəziyyətdə olan hansısa qadının hamiləliyi ölümlə nəticələnir, hansısa qadının həyatını xilas edə bilirik? Xüsusi komissiya bu halları araşdıracaq. Analiz edilməlidir ki, belə hallar niyə baş verir? Komissiya ana ölümlərinin qarşısının alınması üçün yaradılıb”.
Valyutadəyişmə məntəqələri bağlanmağa başladı
11.01.2016
Azərbaycan bankları şöbələrindən və filiallarından kənarda fəaliyyət göstərən valyutadəyişmə məntəqələrini bağlayırlar.
Ölkə.Az Trend-ə istinadən xəbər verir ki, belə göstəriş valyutadəyişmə məntəqələrinə bu gün elə bankların rəhbərlikləri tərəfindən daxil olub.
"Zaminbank" ASC-nin Müşahidə Şurasının sədri Nadir İsmayılov bildirib ki, bankın İdarə Heyəti bu gündən ölkə üzrə öz valyutadəyişmə məntəqələrini bağlamaq barədə qərar qəbul edib: "Bu gün valyutadəyişmə məntəqələrimizi bağlamaq barədə qərar qəbul etdik, çünki onların fəaliyyəti rentabelli deyildi. Bizim ölkə üzrə - Bakı, Xırdalan və digər şəhər və bölgələrdə - xeyli sayda valyutadəyişmə məntəqəmiz olub. Lakin onların fəaliyyətinin davam etdirilməsini məqsədəuyğun hesab etmədik".
N.İsmayılov qeyd edib ki, bankın ümumilikdə ölkə üzrə 48 valyutadəyişmə məntəqəsi olub.
Meyiti tapılmış neftçinin şəxsiyyəti müəyyənləşdirildi
11.01.2016
“Günəşli” yatağındakı 10 saylı dərin dəniz özülündə baş vermiş qəza nəticəsində itkin düşən, bu gün Xəzərin Türkmənistan sahillərində meyiti tapılan neftçinin kimliyi məlum olub.
FHN-in mətbuat xidmətindən verilən məlumata görə, meyiti tapılan şəxsin 10-cu dərin dəniz özülündə mexanik işləyən və baş vermiş qəza nəticəsində itkin düşən, 1958-ci il təvəllüdlü Qasımov Mübariz Dilqəm oğlu olduğu müəyyənləşdirilib.
Çərşənbələrin vaxtı açıqlandı
11.01.2016
Azərbaycanda ilk çərşənbə fevralın 23-də keçiriləcək.
Ölkə.Az xəbər verir ki, bunu APA-ya Tusi adına Şamaxı Astrofizika Rəsədxanasının direktor müavini Xıdır Mikayılov deyib.
O bildirib ki, Azərbaycanda axır çərşənbə isə martın 15-də qeyd olunacaq.
X. Mikayılov qeyd edib ki, bahar Azərbaycana 2016-cı ildə martın 20-də Bakı vaxtı ilə təxminən saat 08:30 radələrində gələcək.
Təhsillə bağlı yeni qanun layihəsi
12.01.2016
Azərbaycanda “Orta ixtisas təhsili” haqqında ayrıca qanun layihəsi qəbul oluna bilər.
Milli Məclisin Elm və təhsil komitəsinin sədr müavini Bəxtiyar Əliyev Trend-ə bildirib ki, bu gün iqtisadiyatın bütün sahələrində və sahibkarlığın inkişaf etdirilməsi üçün ixtisaslı fəhlə kadrlarına çox böyük ehtiyac var.
Onun sözlərinə görə, müxtəlif dövlət qurumları orta ixtisas təhsili məktəbləri yaradıb və yaxşı olardı ki, özəl müəssisələr, böyük şirkətlər də bu işə qoşulsun.
Gömrük Komitəsində ciddi kadr dəyişikliyi
12.01.2016
Dövlət Gömrük Komitəsində ciddi kadr dəyişikliyi baş verib.
Ölkə.Az azvision.az-a istinadən xəbər verir ki, Gömrük Sahəsində Hüquqpozmalara Qarşı Mübarizə Baş İdarəsinin rəisi, general –mayor Güloğlan Muradlı Dövlət Gömrük Komitəsinin sədri Aydın Əliyevin əmri ilə vəzifəsindən kənarlaşdırılıb. O, rəhbəri olduğu idarənin rəis müavini vəzifəsinə təyin edilib.
G. Muradlınının yerinə Balakən Gömrük İdarəsinə ötən ilin oktyabırında rəis təyin olunan polkovnik Baba Salayev təyin edilib. B. Salayevin yaxın müddətdə general-mayor rütbəsi alacağı gözlənilir.
B. Salayev əvvəl Gömrük Sahəsində Hüquqpozmalara Qarşı Mübarizə Baş İdarəsinin əməliyyat idarəsinin rəis müavini işləmişdi.
Azərbaycanda beynəlxalq tədbirlərə nə qədər vəsait ayrılıb?
12.01.2016
Son illərin ənənəsinə uyğun olaraq 2015-ci ildə ölkəmiz bir çox mötəbər beynəlxalq səviyyəli tədbirlərə yüksək səviyyədə ev sahibliyi edib və xarici ölkələrdə keçirilən tədbirlərdə təmsil olunub.
Bu barədə ölkə başçısı İlham Əliyevin sədrliyi ilə keçirilən Nazirlər Kabinetinin 2015-ci ilin yekunlarına həsr olunan iclasda maliyyə naziri Samir Şərifov bildirib.
“Təkcə yola saldığımız ilin yox, müasir tariximizin ən əlamətdar idman hadisələrindən biri ölkəmizin ilk Avropa Oyunlarına ev sahibliyi etməsi olub. Ümummilli həmrəyliyin göstəricisinə çevrilən bu möhtəşəm idman bayramı Prezident İlham Əliyevin rəhbərliyi altında ölkəmizin beynəlxalq aləmdə artan nüfuzunun göstəricisi olmaqla yanaşı, respublikamızın mədəniyyətlərarası və dinlərarası dialoqun mərkəzi, qlobal siyasi, iqtisadi, humanitar problemlərin müzakirə olunduğu məkan kimi rolunu və əhəmiyyətini təsdiqləməkdədir.
Ölkəmizdə və xaricdə keçirilən digər beynəlxalq tədbirlərin maliyyə təminatı üçün 2015-ci ilin dövlət büdcəsindən 21,5 milyon manat, o cümlədən Bakı şəhərində beynəlxalq əhəmiyyət kəsb edən Asiya İnkişaf Bankının (ADB) Rəhbərlər Şurasının 48-ci illik toplantısının, 3-cü Ümumdünya Mədəniyyətlərarası Dialoq Forumunun, məktəblilərin 47-ci Beynəlxalq Kimya Olimpiadasının, şahmat üzrə Dünya Kubokunun keçirilməsinə, “Milan EXPO-2015” Beynəlxalq Sərgisində ölkəmizin iştirakına, BMT-nin Təhsil, Elm və Mədəniyyət Məsələləri üzrə Təşkilatı (UNESCO) ilə əməkdaşlıq çərçivəsində fəaliyyətin həyata keçirilməsinə və bu kimi digər tədbirlərin maliyyələşdirilməsinə vəsait ayrılıb”, - deyə Samir Şərifov qeyd edib.
Bakıda jurnalistlər aksiya keçirdi — FOTOLAR
12.01.2016
Bu gün Bakı Ağır Cinayətlər Məhkəməsində hakim Eldar İsmayılovun sədrliyi ilə jurnalist Rasim Əliyevin ölümü ilə bağlı cinayət işi üzrə növbəti məhkəmə prosesi keçirilir.
Ölkə.Az bizimyol.info-ya istinadən xəbər verir ki, proses açıq keçirilsə də, jurnalistlər məhkəmə zalına buraxılmayıb. Məhkəmə prosesinə buraxılmayan jurnalistlər, məhkəmə önündə əllərində Rasim Əliyevin şəkilləri ilə aksiya keçiriblər. Onlar "Rasim Əliyevin ölümündə günahkar olan həkimlər cəzalandırsın" şüarını səsləndiriblər. Aksiyaya polis müdaxilə edərək jurnalistlərin əllərindəki şəkilləri cırıb. Jurnalistlər polis müdaxiləsinə etiraz ediblər.
Xatırladaq ki, hadisə 2015-cü il avqustun 8-də baş verib. Bir qrup şəxs tərəfindən döyülərək xəstəxanaya yerləşdirilən Rasim Əliyev orada vəfat edib. İnsidentə səbəb R.Əliyevin Facebook statusunda futbolçu Cavid Hüseynovu tənqid etməsi olub. Cavid Hüseynov avqustun 6-da "Qəbələ" futbol klubunun heyətində Kipr Respublikasının "Apollon" futbol klubu ilə Bakı şəhərində keçirilən oyunda iştirakından sonra jurnalistlərin suallarını cavablandırarkən yol verdiyi hərəkətlərə görə onu tənqid edən Rasim Əliyevə zəng edərək təkzib verməyi tələb etmişdir.
Yaşlı müəllimlər işdən çıxarılacaq
12.01.2016
Azərbaycan Dövlət İqtisad Universitetində təhsil haqları artırılmayacaq.
Ölkə.Az APA-ya istinadən xəbər verir ki, bunu ADİU rektoru Ədalət Muradovdeyib.
O bildirib ki, ADİU-da yalnız əcnəbi tələbələrin təhsil haqları artırılıb:
“Əcnəbi tələbələr üçün təhsil haqqı 4000 dollar müəyyən olunub”.
Universitetdə 917 nəfər müəllimin çalışdığını nəzərə çatdıran rektor qeyd edib ki, bu rəqəm çoxdur:
“Yaşı 70-dən yuxarı, elmi dərəcəsi olmayan, habelə yaşı 75-dən yuxarı dosentlərin işdən çıxarılması nəzərdə tutulur. Yalnız professorlar istədikləri qədər universitetdə çalışa biləcəklər”.
Rektor əlavə edib ki, rəsmi rəqəmlərə görə, universitetin məzunlarının 38 faizi 1 ay müddətində işlə təmin olunub.
Dərs davamiyyəti əl izi ilə aparılacaq
12.01.2016
“Bu ilin sentyabr ayından tələbələrin dərsə davamiyyəti barmaq izi ilə həyata keçiriləcək”.
Bunu Azərbaycan Dövlət İqtisad Universitetin rektoru Ədalət Muradov deyib. Onun sözlərinə görə, bununla da müəllim tələbələrin dərsə gəlib-gəlməməsini yoxlamağa həsr etdiyi vaxtı dərsə ayıracaq:
“Bu sistem universitetdə fəaliyyət göstərən "SABAH" qruplarında tətbiq olunur. Bundan başqa yaxın gələcəkdə müəllimlərin dərslərinin əvəz olunması məsələsi də həllini tapacaq. Belə ki, müəllimlər elektron jurnalı ancaq barmaq izi ilə aça biləcək. Yalnız icazə verilən zaman müəllimləri kimsə əvəz edə bilər”.
Nardaranlılara təzminat verildi
12.01.2016
Bakının Sabunçu rayonu, Nardaran qəsəbəsinin Abşeron küçəsində yolun genişləndirilməsi ilə əlaqədar yaşayış və qeyri-yaşayış sahələrinin sökülməsinə görə 11 nəfərə kompenasiya verilib.
Ölkə.Az report-a istinadən xəbər verir ki, bu barədə "Azəryolservis" Açıq Səhmdar Cəmiyyətinin mətbuat katibi Anar Nəcəfli bildirib.
O bildirib ki, sökülən 51 obyektin də sənədləri hazırlanır, yaxın vaxtlarda onlara kompensasiya ödəniləcək: "Növbəti mərhələdə isə torpaq sahələrinə görə kompensasiyalar ödəniləcək."
Daha iki qurum ləğv olundu
13.01.2016
Azərbaycan Milli Elmlər Akademiyasının “RİA-AGENTlərin işlənməsi və xalq təsərrüfatında təsdiqi üzrə istehsalat təcrübəli xüsusi konstruktor texnoloji bürosu” ləğv olunduğunu elan edir.
Ölkə.Az xəbər verir ki, Vergilər Nazirliyindən APA-ya verilən məlumata görə, kreditorlar 2 ay ərzində tələblərini Baklı şəhəri, Xəzər küçəsi, 25 ünvanına bildirə bilərlər.
Bundan başqa, “Bakışəhərtikinti” TREST-i 21 saylı Tikinti İdarəsi də ləğv olunduğunu elan edir. Kreditorlar 2 ay ərzində tələblərini Baklı şəhəri, Nərimanov rayonu, Atatürk prospekti ev 5 ünvanına bildirə bilərlər.
3,7 milyon nəfərin maaş və pensiyası artacaq
13.01.2016
Əmək haqlarının, pensiyaların, sosial müavinətlərin artımı təxminən 3,7 milyon nəfəri əhatə edəcək. Bu isə bizim əhalinin 30%-ni təşkil edir.
Ölkə.Az xəbər verir ki, bu barədə Azərbaycan Respublikası Əmək və Əhalinin Sosial Müdafiəsi nazirinin müavini İdris İsayev ANS TV-yə müsahibəsində bildirib.
“Büdcə təşkilatlarında artıq 620 mindən artıq insan çalışır, 1 milyon 300 minə yaxın pensiyaçımız, 500 minə yaxın ünvanlı sosial yardım alan şəxslər var. Qaçqınları da götürsək təxminən 3,7 milyon nəfərin əmək haqları artırılacaq”.
Siyəzən rayonunda bir qrup sakinlə polis arasında insident baş verib
13.01.2016
Siyəzən rayonunda bir qrup sakinlə polis arasında insident baş verib.
APA-nın məlumatına görə, Rayon İcra Hakimiyyətinin binası qarşısına toplaşanlar polisin ictimai asayişin bərpa olunması və ərazidən uzaqlaşmaq tələbinə əməl etməyiblər. Buna görə də polis aksiya keçirənləri ərazidən uzaqlaşdırmağa başlayıb.
Əraziyə təhlükəsizlik qüvvələri cəlb edilib.
Saxlanılanların olduğu bildirilir.
Hadisə ilə bağlı Baş Prokurorluq və Daxili İşlər Nazirliyinin birgə məlumat yayacağı gözlənilir.
Dərmanların qiyməti yenidən tənzimlənəcək
13.01.2016
“Tarif (qiymət) Şurasında indiyə qədər elan edilmiş təsiredici maddələr üzrə dərman vasitələrinin qiymətlərinin təsdiqlənməsi üçün sənədlərin (bəyannamələrin) qəbulu davam etdirilir”.
Ölkə.Az xəbər verir ki, bunu APA-ya açıqlamasında İqtisadiyyat və Sənaye Nazirliyinin İctimaiyyətlə əlaqələr şöbəsinin müdiri Abbas Əliyev deyib.
O bildirib ki, sənəd qəbulu başa çatdıqdan sonra yeni təsiredici maddələr üzrə dərman vasitələrinin qiymətlərinin təsdiqlənməsi üçün sənədlərin (bəyannamələrin) qəbuluna başlanılacaq.
Şöbə müdiri əlavə edib ki, hazırda dərman vasitələrinin qiymətlərinin tənzimlənməsi prosesinə hazırlıq işləri aparılır. A. Əliyev qeyd edib ki, yaxın vaxtlarda növbəti dərman vasitələrinin qiymətləri tənzimlənəcək.
1 milyard insan kor olmaq təhlükəsi ilə üz-üzə
13.01.2016
Aparılan araşdırmalara görə, 2050-ci ilə qədər dünya əhalisinin yarısı (təxminən 5 milyard) görmə qabiliyyətini itirəcək. Hazırda dünyada 2 milyarddan çox insan yaxını görmür.
Ölkə.Az publika.az-a istinadən bildirir ki, türkiyəli göz həkimi Özər Kavalcıoğlu 50-ci ilə qədər təxminən 1 milyard insanın korluq riski ilə qarşılaşacağını deyib. Onun sözlərinə görə, yaxını görmə problemi əvvəllər, adətən, yaşlı insanlarda rast gəlinirdi:
"Lakin statistika göstərir ki, bu problem son 30 ildə yeniyetmələr arasında geniş yayılıb. Hazırda lazer texnologiyaları ilə aradan qaldırmaq mümkün olsa da, bu, mühüm problemin yaranmaması, göz sağlamlığının qorunması üçün qabaqlayıcı tədbirlər önəmlidir. Bu, məktəblərdə maarifləndirmə yolu və ya səhiyyə təşkilatlarının dəstəyi ilə həyata keçirilməlidir. Əsas məsələ uşaqlara hələ kiçik yaşından görmə qabiliyyətini qorumağı öyrətməkdir".
İmtahandan kəsilən müəllimlərə şad xəbər
14.01.2016
Azərbaycanda diaqnostik qiymətləndirmədə iştirak etməyən, bu imtahandan keçməyən və işə yeni qəbul olunan müəllimlər üçün bu ilin yayında yenidən diaqnostik qiymətləndirmə keçirilə bilər.
Ölkə.Az xəbər verir ki, bunu Trend-ə Təhsil Nazirliyinin İnsan resursları şöbəsinin müdiri İlham Nağıyev deyib.
Onun sözlərinə görə, ötən ilin noyabr-dekabr aylarında diaqnostik qiymətləndirmənin keçirildiyi 12 bölgə üzrə müəllimlərin davamiyyəti 98 faiz təşkil edib: “Bəzi rayonlarda hətta 100 faiz nəticə göstərildi. Müəllimlərimizin böyük əksəriyyəti diaqnostik qiymətləndirmədə iştirak edib. Ancaq müəllimlərin 1 faizi müəyyən səbəblərdən, əsasən də sağlamlıq imkanları ilə əlaqədar diaqnostik qiymətləndirmədə iştirak edə bilməyib”.
Gömrükdən nəyi pulsuz keçirmək olar?
14.01.2016
Prezident İlham Əliyevin 24 dekabr 2015-ci il tarixli Fərmanı ilə "Gömrük sahəsində nəzarətin həyata keçirilməsi ilə əlaqədar bəzi yoxlamaların sadələşdirilməsi haqqında Azərbaycan Respublikası Prezidentinin Fərmanı"nın birinci hissəsi ləğv olunduqdan sonra daha Azərbaycan vətəndaşları ümumi gömrük dəyəri 1500 dollar ekvivalenti məbləğindən (müşayiət edilən hər bir yetkinlik yaşına çatmamış fiziki şəxsə görə əlavə 500 dollar ekvivalenti məbləğindən) artıq olmayan, kommersiya məqsədləri üçün nəzərdə tutulan malları gətirə bilərlər.
Bəs görəsən, gömrükdən nəyi və hansı həddə rüsumsuz keçirmək mümkündür? Bununla bağlı iqtisadçı-ekspert Qalib Toğrul bildirib ki, aşağıdakıları gömrükdən rüsumsuz keçirib ölkəyə gətirmək mümkündür:
- Avtomobilin konstruksiyasında nəzərdə tutulmuş yanacaq bakının tutumu həcmində yanacaq;
- 18 yaşına çatmış hər bir fiziki şəxs tərəfindən şəxsi istifadə üçün keçirilən 3 litr alkoqollu içki və 600 ədəd siqaret (3 blok);
- 10 kiloqrama qədər ərzaq məhsulları (nərə cinsli balıq istisna olmaqla);
- 125 qrama qədər nərə cinsli balıq kürüsü;
- Gömrük ərazisindən aparılan mallar (məsələn, "Duty free"dən alınan);
- Beynəlxalq poçt göndərişləri və ya daşıyıcı şirkət vasitəsilə eyni fiziki şəxsin adına 30 (otuz) gün müddətində ümumi gömrük dəyəri 1000 ABŞ dolları ekvivalenti məbləğindən artıq olmayan gömrük ərazisinə gətirilən mallar;
- Beynəlxalq poçt göndərişləri və ya daşıyıcı şirkət vasitəsilə gömrük ərazisindən göndərilən mallar;
Səfirimizin həyat yoldaşına cinayət işi açıldı
14.01.2016
Azərbaycanın Latviyadakı səfiri Elman Zeynalovun həyat yoldaşı Nəzirə Zeynalovanın adı rüşvətdə hallanır.
Ölkə.Az haqqın.az-a istinadən xəbər verir ki, səfirin xanımı sürücülük vəsiqəsi almaq üçün Yol Hərəkəti Təhlükəsizliyi İdarəsinin yerli müffətişliyinə heç bir izahat vermədən 500 avro rüşvət təklif edib. Latviyalı müffəttişlər isə səfir xanımının bu davranışından şikayətçi olublar və hazırda Zeynalovanın işi ilə ölkənin Korrupsiya əleyhinə Bürosu məşğul olur.
Un və çörəyin istehsalı və satışı üçün inqilabi — QƏRAR
14.01.2016
Manatın məzənnəsinin dəyişməsi ilə əlaqədar əhalinin, xüsusilə aztəminatlı ailələrin sosial müdafiəsini gücləndirmək məqsədilə Azərbaycan Prezidentinin tapşırığına əsasən, buğdanın idxalı və satışı, buğda ununun və çörəyin istehsalı və satışı 15 yanvar 2016-cı il tarixindən etibarən əlavə dəyər vergisindən (ƏDV) azad olunub.
İqtisadiyyat və Sənaye Nazirliyinin mətbuat xidmətindən verilən məlumata görə, bunun nəticəsində unun topdansatış qiyməti əhəmiyyətli dərəcədə azalıb, daşınma xərclərindən asılı olaraq 50 kiloqramlıq 1 kisə unun qiyməti 21 manat 50 qəpiklə 22 manat 50 qəpik arasında, pərakəndə satış qiyməti isə 23 manatla 24 manat arasında formalaşıb.
Unun yeni qiymətinə uyğun olaraq, 500 qramlıq çörək 30 qəpiyə, 700 qramlıq çörək isə 40 qəpiyə satılacaq.
Unu və çörəyi göstərilən qiymətlərdən artıq qiymətə təklif edən şəxslərə qarşı ən ciddi məsuliyyət tədbirləri görüləcək.
Bölgələrdə sahibkarlara 50 faiz endirim edildi
14.01.2016
Azərbaycanın bölgələrində fəaliyyət göstərəcək sahibkarlara lisenziya 50 faizlik endirimlə təqdim ediləcək.
Bu gündən Milli Məclis tərəfindən "Dövlət rüsumu haqqında" Qanununa edilən dəyişiklik qüvvəyə minib.
Dəyişikliyə əsasən, bundan sonra lisenziyalaşdırılan sahibkarlıq fəaliyyəti yalnız Azərbaycan Respublikasının regionlarında həyata keçirildikdə, sahibkar həmin fəaliyyət növü üzrə müəyyən etdilən dövlət rüsumunun yalnız 50 faizini ödəyəcək.
Dəyişikliyə əsasən, 50 faizlik endirim regional tele- və radioyayım üçün lisenziyalara şamil edilmir. Güzəşt yalnız Bakı şəhərinin inzibati ərazisindən kənarda fəaliyyət göstərən sahibkarlara şamil edilir.
Azərbaycanda 16 vəzifəli şəxs rüşvətə görə həbs edilib
15.01.2016
2015-ci ildə Korrupsiyaya qarşı Mübarizə Baş İdarəsində müraciətlərə baxılması nəticəsində 169 vəzifəli şəxs intizam məsuliyyətinə cəlb edilib.
Bu barədə Korrupsiyaya qarşı Mübarizə Baş İdarəsinin rəisi Kamran Əliyev bu gün keçirdiyi mətbuat konfransında bildirib.
O qeyd edib ki, intizam məsuliyyətinə cəlb edilmiş 169 vəzifəli şəxsdən Səhiyyə Nazirliyi üzrə 42, Əmək və Əhalinin Sosial Müdafiəsi Nazirliyi üzrə 28, Təhsil Nazirliyi üzrə 13, Daxili İşlər Nazirliyi üzrə 48, Müdafiə Nazirliyi üzrə 1, Fövqəladə Hallar Nazirliyi üzrə 1, Gömrük Komitəsi üzrə 1 və digər dövlət qurumları üzrə 35 olub.
K. Əliyev həmçinin bildirib ki, hesabat dövründə Baş prokuror yanında Korrupsiyaya qarşı Mübarizə Baş İdarəsinin 161 saylı “Qaynar xətt” əlaqə mərkəzinə 7266 müraciət daxil olub, bunlardan 5820-si ilkin, 1446-sı təkrar müraciətlərdir.
Süni qiymət artıran 7 nəfər həbs edilib
15.01.2016
“Un, çörək, yumurta və bu kimi istehlak məhsullarının, habelə dərman vasitələrinin qiymətlərini süni şəkildə artırılması, mal qıtlığı yaradılması və digər sui-istifadə hallarının qarşısının alınması məqsədilə həyata keçirilmiş istintaq-əməliyyat tədbirləri nəticəsində 6 cinayət işi başlanılıb, 7 nəfər şəxs təqsirləndirilən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilib”.
Ölkə.Az xəbər verir ki, bunu Azərbaycan Respublikası Baş prokurorunun müavini - Baş prokuror yanında Korrupsiyaya qarşı Mübarizə Baş İdarəsinin rəisi Kamran Əliyev deyib.
"MTN işi" ilə bağlı istintaq qrupu yaradılıb
15.01.2016
"MTN işi` ilə bağlı xüsusi istintaq əməliyyat qrupu yaradılıb".
Ölkə.Az xəbər verir ki, bunu Azərbaycan Respublikası Baş prokurorunun müavini - Baş prokuror yanında Korrupsiyaya qarşı Mübarizə Baş İdarəsinin rəisi Kamran Əliyev deyib.
İdarə rəisi sahibkarların keçmiş MTN naziri ilə bağlı şikayətlərinə əsasən istintaq-əməliyyat tədbirləri Baş prokurorluq tərəfindən aparılmır. Odur ki, bu barədə nəsə demək mümkün deyil.
Deputatların tətili başa çatdı
15.01.2016
Milli Məclis deputatlarının tətili başa çatıb.
Yanvarın 1-dən istirahətə gedən deputatlar bu gün işə çıxıblar.
Milli Məclisin Daxili Nizamnaməsinə uyğun olaraq, deputatlar 15 gün məzuniyyətdə olublar.
Bu gündən Milli Məclisin komitələri fəaliyyətə başlayır.
“Günəşli” yatağında daha bir quyuda yanğın söndürüldü
15.01.2016
“Günəşli” yatağındakı 10 saylı dərin dəniz özülündə baş vermiş qəzanın nəticələrinin aradan qaldırılması üçün Fövqəladə Hallar Nazirliyi (FHN) tədbirləri davam etdirir.
FHN-in mətbuat xidmətindən Ölkə.Az-a verilən məlumata görə, Nazirliyin Dövlət Yanğından Mühafizə Xidmətindən bildirilib ki, qaz quyularından birində yanğın söndürülüb.
Digər quyularda yanğının söndürülməsi üçün işlər davam etdirilir.
Qubada bahalaşma əleyhinə aksiya keçirilib — RƏSMİ
15.01.2016
Hazırda Qubanın mərkəzindəki “Köhnə avtovağzal” deyilən ərazidə bahalaşma əleyhinə aksiya keçirilir.
Quba Rayon İcra Hakimiyyətindən Modern.az saytına bildirilib ki, hazırda rəhbərlik vətəndaşlarla görüşür.
Vətəndaşların qarşısına çıxan İcra başçısı onların qəbul ediləcəyi və problemlərin həllinə çalışacaqlarını vəd edib. Amma aksiyaçılar buna məhəl qoymayıb və
Quba-Bakı yolunu bağlamağa cəhd göstəriblər.
Əraziyə hüquq-mühafizə orqanlarının əməkdaşları cəlb olunub. Quba rayon polis şöbəsinin əməkdaşı Aslan Babaşov rayonda vəziyyətin stabil olduğunu
deyib:
“Qubanın "köhnə avtovağzal" adlanan ərazisində aksiya keçirilib. Hazırda vəziyyət stabildir. Heç bir qarşıdurma yoxdur”.
Azərbaycan Ordusunda məvaciblər aşağı salındı — 30-50 faiz
15.01.2016
Bu ilin yanvar ayından etibarən Müdafiə Nazirliyinin tabeliyində olan onlarla hərbi hissədə xidmət edən minlərlə hərbi qulluqçunun məvacibi 30-50 faiz civarında aşağı salınıb.
Bu barədə “Xəzər” Hərbi Tədqiqatlar İnstitutu (Caspian Defense Studies Institute) Azərbaycanın Silahlı Qüvvələri Baş Qərargahındakı mənbəyə istinadən məlumat yayıb. Məlumata görə, sözügedən qərar Silahlı Qüvvələrin 3 mindən artıq zabit və gizirini əhatə edir. Belə ki, həmin zabit və gizirlərin məvacibləri 2016-cı ilin yanvar ayından etibarən müxtəlif səviyyədə aşağı salınıb. Bəzilərinin məvacibləri 30-50 faiz azaldılıb, bəzilərinin əmək haqqısı isə iki qatdan bir qata keçirilib.
Ölkə.az
