\"Binə\" ticarət mərkəzində etiraz aksiyası keçirilir

Bakının ən böyük ticarət mərkəzlərindən biri olan "Binə"də hazırda etiraz aksiyası keçirilir.

Ölkə.az xəbər verir ki, aksiya iştirakçıları ticarət mərkəzində işləyən sahibkarlardır.

Xatırladırıq ki, onlar bir müddət öncə də dinc aksiya keçirərək tələblərini ortaya qoymuşdular.

Aksiya iştirakçılarının verdiyi məlumata görə, hələ ki onların istəkləri yerinə yetirilməyib.

Belə ki, ticarət mərkəzindəki 5/3, 5/4 sıralarda dükan icarəyə götürən sahibkarlar icarə haqlarının çox olmasından şikayətçidirlər.

Şikayətçilərin sözlərinə görə, əgər tələbləri yerinə yetirilməsə digər sahibkarlar da onlara qoşulacaqlar:

"Ölkədə böhran var. Alver yoxdur. Pul qazana bilmirik. Gəlirlərimiz kəskin şəkildə aşağı düşüb. Amma buna baxmayaraq icarə haqqı dəyişməyib. Üstəlik, ay tamam olan kimi pulu gəlib tələb edirlər. O pulu necə ödəyək? Bizi başa düşüb qiyməti aşağı salmalıdırlar. Digər sıralarda olan tacirlər də bizə qatılmağı düşünürlər. Alver heç kimdə yoxdur, problem hamımızın problemidir. Belə getsə, hamımız dükanları qapadıb, gedəcəyik", deyə aksiya iştirakçılarının adından danışan sahibkar saytımıza bildirib.

Ölkə.az