"Avtovağzal" və "Memar Əcəmi-2" metrostansiyaları bu tarixdə açıqlacaq

"Avtovağzal" və "Memar Əcəmi-2" metrostansiyalarının açılışı 2016-cı ilin birinci yarısında baş tutacaq.

Bu barədə Movqe.az-a "Bakı Metropoliteni" QSC-nin mətbuat xidmətinin rəhbəri Nəsimi Paşayev bildirib. N. Paşayevin sözlərinə görə, eyni zamanda "Memar Əcəmi-2" stansiyası da fəaliyyətə başlayacaq: "2016-cı ilin birinci yarısında bənövşəyi xətt üzrə ilk iki stansiya istifadəyə veriləcək".

Məlumat üçün qeyd edək ki, 7 giriş və çıxışdan ibarət "Avtovağzal" stansiyası ən böyük stansiya olacaq.

Xatırladaq ki, Azərbaycan Respublikası Prezidenti İlham Əliyevin 2011-ci il 18 mart sərəncamı ilə təsdiq edilmiş perspektiv inkişaf sxemi və 2011-15-ci illərin Dövlət Proqramına uyğun olaraq, Bakı Metropoliteni 2030-cu ildə 5 xətt üzrə 76 stansiya və 5 elektrik deposundan ibarət olacaq.

Dövlət Proqramı əsasında, hazırda 23 stansiyası və 1 elektrik deposu olan Bakı Metropoliteninin Bənövşəyi xəttinin inşası davam etdirilir. Tikintinin birinci beşillik planına görə, bu xəttin 5 stansiyası inşa olunacaq. 12 stansiyadan ibarət olacaq bu xətt Beynəlxalq Avtovağzal Kompleksindən başlamaqla Qaraçuxur qəsəbəsinə qədər uzanacaq.

Ölkə.Az