Mingəçevirdə çörəyin qiyməti qaldırıldı

Ölkə ərazisində çörəyin və unun qiymətinin aşağı salınmasıyla bağlı dövlət rəhbərliyinin tapşırıqları deyəsən Mingəçevirdə icra edilmir.

Rayon sakinlərinin Ölkə.az-a verdiyi məlumata görə, son bir neçə gündə ölkənin bütün bölgələrində çörəyin və unun qiymətində azalma müşahidə olunduğu halda, Mingəçevirdəki "Kür" çörək zavodu qiyməti qaldırıb:

"Mingəçevirin demək olar ki, 80% dükanları çörəyi həmin zavoddan götürür. Əvvəl dükanlar çörəyi 25 qəpiyə götürüb, 30 qəpiyə satırdılar. İndi zavod qiyməti 30 qəpiyə qaldırıb. Dükan sahibləri də deyirlər ki, məcbur olub biz də 35-40 qəpiyə satırıq. Bu da əhalinin narazılığına səbəb olur. Əgər çörəyin qiyməti Mingəçevirdə də aşağı salınmasa, icra başçısı buna görə cavab verəcək".

---

 

Qeyd edək ki, Mingəçevir Şəhər İcra Hakimiyyətindən şəhərdə çörəyin bahalaşması ilə bağlı xəbərimizə münasibət bildirilib.

İcra başçısının birinci müavini İlham İsmayılov redaksiyamıza zəng edərək bildirib ki, bu kimi hallara qarşı davamlı tədbirlər həyata keçirilir:

"Hətta bununla bağlı icra hakimiyyəti nümayəndəsi, polis, prokurorluğun əməkdaşı, ictimaiyyət nümayəndəsi və bələdiyyə nümayəndəsinin iştirakı ilə qrup yaradılıb. Qrup hər gün mütəmadi olaraq reydlər keçiri və bu kimi halların qarşısını alır. Sözügedən məsələ də tərəfimizdən araşdırılacaq".

Qeyd edək ki, şəhər sakinləri Ölkə.az-a müraciətində bildirirdilər ki, şəhərin Samux küçəsində yerləşən "Kür" çörək zavodunda qiymətlər qaldırılıb.

İntiqam VALEHOĞLU
Ölkə.az