Ordu 20 yanvar şəhidlərinin xatirəsini yad etdi
Silahlı Qüvvələrin Təlim və Tədris Mərkəzində Müdafiə Nazirliyi, Bakı qarnizonundakı hərbi hissələrin, xüsusi təyinatlı təhsil müəssisələrinin şəxsi heyətlərinin iştirakı ilə xatirə mərasimi keçirilib.
Bu barədə Ölkə.Az-a Müdafiə Nazirliyinin mətbuat xidmətindən məlumat verilib.
Əvvəlcə xalqımızın ümummilli lideri Heydər Əliyevin, 20 yanvarşəhidlərinin və ölkəmizin ərazi bütövlüyü uğrunda canlarından keçənVətən övladlarının xatirəsi bir dəqiqəlik sükutla yad edilib, Azərbaycan Respublikasının Dövlət Himni ifa olunub.
Sonra 20 Yanvar hadisələri barədə ətraflı məlumatlar tədbir iştirakçılarının diqqətinə çatdırılıb.
Tədbirin sonunda Silahlı Qüvvələrin Mahnı və Rəqs Ansamblı 20 Yanvar faciəsinə həsr olunmuş ədəbi-bədii kompozisiyanı təqdim edib.
Bu gün həmçinin C.Naxçıvanski adına Hərbi Liseydə Müharibə, Əmək və Silahlı Qüvvələr Veteranları Təşkilatı nümayəndələrinin iştirakı ilə Ümumxalq hüzn günü ilə əlaqədar tədbir baş tutub.
Əvvəlcə ümummilli lider Heydər Əliyevin və şəhidlərimizin ruhu bir dəqiqəlik sükutla yad edilərək Dövlət Himni ifa olunub.
Tədbiri giriş sözü ilə lisey rəisinin müavini polkovnik Rəhim Səmədov açaraq faciənin dəhşətlərindən danışıb. Hadisələrə həsr olunmuş film nümayiş etdirilib. Sonra Müharibə, Əmək və Silahlı Qüvvələr Veteranları Təşkilatının sədri e.o. general-mayor Dadaş Rzayev çıxış edərək qanlı yanvar gününün xalqımızın müstəqillik uğrunda apardığı mübarizənin qalibiyyət tarixi olduğunu bildirib.
Sonda təhsildə fərqlənən kursantlar fəxri fərmanlarla təltif edilib və xatirə fotosu çəkilib.
Azərbaycan Hərb Tarixi Muzeyində də bu gün 20 Yanvar hadisələrinin ildönümünə həsr olunmuş "Azadlığa aparan şanlı yol" adlı tədbir keçirilib.
Tədbirdə Müdafiə Nazirliyinin müxtəlif idarələri, xüsusi təyinatlı təhsil müəssisələri, muzeylər və ictimai təşkilatlardan nümayəndələr iştirak ediblər.
Bu tarixi gündə Azərbaycan xalqının əsrlər boyu qəlbində yaşatdığı milli azadlıq və istiqlal istəyindən geri çəkilməyəcəyini, müqəddəs amal uğrunda hətta canından belə keçməyə hazır olduğunu bütün dünyaya nümayiş etdirdiyi tədbir iştirakçılarının çıxışlarında qeyd olunub.
Sonda 20 Yanvar hadisəsinə həsr olunmuş qısametrajlı sənədli film nümayiş etdirilib.
Rəsmi hissə başa çatdıqdan sonra tədbir iştirakçıları Şəhidlər Xiyabanını ziyarət ediblər.
