\"Yarımçıq İsmayıl\"ın Neftçala sərgüzəştləri

Manatın ikinci devalvasiyasından və neft qiymətlərinin kəskin ucuzlaşmasından sonra qiymət artımı insanların maddi vəziyyətinin çətinləşməsinə gətirib çıxardı. Nəticədə əsasən bir çox rayonlarda dolanışıq səviyyəsi qəfildən aşağı düşmüş insanlar bazara nəzarət etməyən, süni qiymət artımının qarşısını almaqda maraqlı olmayan bəzi yerli icra orqanlarının nəzarətsizliyindən şikayət etməyə başladı.

Nə qədər qəribə olsa da, bəzi rayonlarda yerli icra orqanları insanların narazılıqlarının yaranmasına özləri rəvac verir. Xalqın problemləri ilə maraqlanmayan, yalnız öz maraqlarını güdən bəzi məmurlar insanları küçələrə çıxmağa sövq edir. Bunlardan biri də Neftçalanın icra başçısı İsmayıl Vəliyevdir.

Qaynar.info-nun verdiyi xəbərə görə, ən çətin vəziyyətin olduğu rayonlardan biri məhz Neftçaladır. Sosial-iqtisadi problemlərdən əziyyət çəkmiş rayonda vəziyyət son dövrlər daha da pisləşib. Üstəlik icra başçısının "bazar qalmaqalı" yanan odun üzərinə tökülmüş neft effekti verib.

Bir neçə gün əvvəl mətbuatda sakinlərlə icra başçısı İsmayıl Vəliyev arasında gərginlik baş verdiyi xəbərləri yayılmışdı. Belə ki, Neftçalada uzun illərdir balıq bazarı fəaliyyət göstərir. Amma İsmayıl Vəliyev rayona icra başçısı təyin edildikdən sonra özü üçün ikinci balıq bazarını açdırıb. Bu günlərdə isə köhnə balıq bazarında ticarətlə məşğul olan alverçilərə qarşı təzyiqlər başlayıb. Sakinlərin sözlərinə görə, İsmayıl Vəliyev balıq alverçilərini məcburi şəkildə öz bazarına gətirmək istəyir ki, gündəlik yer pulu yığsın. Buna görə, icra başçısı alverçilərə təzyiq etdirir, onları həbs etdirəcəyi ilə hədələyir. Buna görə də balıq alverçiləri ilə İsmayıl Vəliyev arasında gərginlik yaranıb. Alverçilər halal çörəklərini qazanmalarına mane olan icra başçısına hücum edib.

Əldə etdiyimiz məlumata görə, Neftçalada bu vəziyyət yenidən gərginləşib. Yenə problem icra başçısının balıq bazarıdır. İsmayıl Vəliyev bütün vasitələrdən istifadə edərək balıqçıları öz bazarına gətirməyə çalışır. O, hətta ticarətçilərə yer pulu almamağı da vəd edib. Amma hamı bunun sadəcə vəd naminə verilmiş bir söz olduğunu yaxşı başa düşür. İsmayıl Vəliyev balıqçıları bu yolla aldadıb, öz bazarına gətirmək və sonra istədiyini etmək niyyətindədir.

İcra başçısının köhnə bazarla bağlı əsas bəhanəsi orda anti-sanitariya vəziyyətinin hökm sürməsidir. Sakinlərin sözlərinə görə, bu da İsmayıl Vəliyevin planının tərkib hissəsidir. Belə ki, o, bu işlə məşğul olan idarələrə bazarda heç bir təmizlik aparmamaqla bağlı tapşırıq verib. Məqsəd orda anti-sanitariya vəziyyəti yaratmaqla balıqçıları qaçırmağa nail olmaqdır.

Rayon sakinləri bildirir ki, İsmayıl Vəliyev neftçalalıların heç bir problemi ilə maraqlanmır. 5-ci günlər icra başçısının qəbul günləri olsa da, 5 ildir rayona başçılıq edən başçı bu günə qədər heç bir sakini qəbul edib, şikayətini dinləməyib.

Onu da qeyd edək ki, başladığı bütün tikinti işlərini yarımçıq qoyduğu üçün rayon sakinləri ona maraqlı ayama da qoşublar: "Yarımçıq İsmayıl".

Neftçala ilə bağlı redaksiyamıza daxil olan məlumatlar xeyli əhatəli olduğu üçün, bu istiqamətdə araşdırmalarımızı davam etdirmək fikrindəyik. Növbəti yazılarda "Yarımçıq İsmayıl" ləqəbli icra başçısının Neftçaladakı şəxsi biznesi və torpaq alveri haqqında olacaq. Ölkədə sosial etirazların başladığı ilk rayon olan Neftçalanın bu ağır durumunun səbəbkarının hansı əməllərin sahibi olduğunu açıqlayacağıq.