Böyük marketlərdə qiymət fırıldağı
Böyük marketlərdə qiymət fırıldağı son zamanlar daha da artıb.
İstehlakçıların zaldan götürdüyü malın qiyməti ilə eyni malın kassadakı qiyməti çox vaxt uyğun gəlmir. Həmişə də, zaldakı qiymət ucuz, kassadakı qiymət isə baha olur.
Oxucularımız "Favorit" supermarketlər şəbəkəsinin qiymət fırıldağı barədə redaksiyamıza müraciət edib və Ölkə.az olaraq bu hadisəni işıqlandırmışıq.
Gəlin görək istehlakçılar bu cür hallarla qarşılaşanda nə etməlidirlər?
Marketlərin qiymət fırıldağı və istehlakçıların nə etməli olduğu barədə Azad İstehlakçılar Birliyinin sədri, ekspert Eyyub Hüseynov Ölkə.Az-a danışıb:
"Bu işləri tətbiq etmək üçün 15 oktyabr 2015-ci ildən Prezident yanında Qeyri Hökumət Təşkilatlarına dəstək Şurasının layihəsini həyata keçiririk. Qiymətlərin fərqli olduğu hallarda istehlakçılar nə etməlidir, biz bunu istehlakçılara başa salırıq.
Çox təəssüf ki, bu xəstəlik devalvasiyadan çox çox əvvəl başlayıb. İlk olaraq "Neptun" mağazalar şəbəkəsindən istehlakçılar şikayət etməyə başladılar. Bu çox geniş yayılmış bir məsələdir. İstehlakçı satıcıya, müdiriyyətə irad bildirəndə deyirlər ki, yadımızdan çıxıb. Belə yerdə sual olunur, "əgər yadınızdan çıxıbsa, qoyun bir dəfə də görək ki, zalda qiymət bahadır, amma kassada ucuz. Niyə belə hal baş vermir?". Bir dəfə də belə bir şey olmayıb. Həmişə marketlərdə zalda malın üstündə ucuz qiymət yazılıb, çıxışda, kassada isə baha qiymət vurulub".
Zalda ucuz, kassada baha qiymətlə qarşılaşan istehlakçılar nə etməlidir sualına isə Eyyub Hüseynov aşağıdakı kimi cavab verdi:
"Birincisi: istehlakçının hüququ var ki, zalda gördüyü qiyməti ödəsin və malı götürsün.
İkincisi: istehlakçı çalışmalıdır ki, özü və mağaza müdirinin iştirakı ilə həmin qiymət dəyişdirilsin.
Üçüncüsü: əgər yuxarıdakılar baş tutmazsa, o zaman istehlakçı "161"-i yığaraq baş prokurorluğa, "195" və daha sonra 2-ni yığaraq İqtisadiyyat Nazirliyinə müraciət etməlidir. Əgər bunlardan cavab olmazsa (012) 441-28-33 nömrəsini yığaraq Azad İstehlakçılar Birliyinə müraciət etsinlər".
Səxavət Məmməd
Ölkə.Az
