Bələdiyyə sədri sahibkarlığı boğur

Sahibkar bələdiyyə sədrinin özbaşınalığına görə fəaliyyət göstərə bilmir.

Ucar rayonu Küçəkənd bələdiyyəsinin sədri balıq yetişdirmək istəyən sahibkardan rüşvət istəyir.

Bələdiyyə sədri sahibkara bildirib ki, əgər dediyi məbləği verməsə, onu işləməyə qoymayacaq.

Bununla bağlı sahibkar Göyçay rayon sakini Məmmədyarov Müşviq Sidqi oğlu Ölkə.Az-a danışıb:

"Ucar rayonu Küçəkənd kənd ərazisində sahəsi 1.70 hektar ərazini əhatə edən balıq yetişdirmək üçün minbir əziyyətlə əmələ gətirdiyim gölün istifadə edilməsinə bələdiyyə sədri Ağakişi Kərimov əsassız olaraq qadağa qoyub. Ancaq həmin ərazini 15 illik icarəyə götürməyimə dair Küçəkən bələdiyyəsi ilə 07 iyun 2003-cü il tarixdə müqavilə bağlamışam və qanuni qaydada həmin vaxt icarə pulu ödəmişəm. Müqavilə bağlanan zaman Küçəkənd bələdiyyəsinin sədri başqa şəxs idi. Ancaq yeni sədr Ağakişi Kərimov məndən həmin göldən istifadə etməm üçün 1000 manat rüşvət tələb edir. Baxmayaraq ki, qüvvədə olan icarə müqaviləm var. Bələdiyyə sədri Ağakişi Kərimovun istədiyi rüşvəti verməyə imkanımız yoxdur. Çünki həmin gölü yenidən hazırlamaq üçün bizə xeyli miqdarda vəsait lazım olacaq. Qeyd edim ki, mən 2003-cü il tarixdə həmin 1.70 hektar torpaq sahəsini icarəyə götürüb orada göl yaratmışam. İndi isə məqsədim həmin göldə maddi imkanı olan şəxslə ortaqlı iş qurub balıq yetişdirib sahibkarlıq fəaliyyəti ilə məşğul olub, gəlir əldə edib, dövlətə vergi ödəyərək, həm də bir neçə nəfəri işlə təmin etməkdir. Çox təssüf olsun ki, bələdiyyə sədrindən çox özünü qolçomaq kimi aparan Ağakişi Kərimovun istədiyi rüşvəti verə bilmədiyimiz üçün sahibkarlıqla məşğul olmaq planlarımızı həyata keçirə bilmirik. Bələdiyyə sədri Ağakişi Kərimov öz qanunsuz əməllərini onunla əsaslandırır ki, kənd sakinləri bu göldə sənin balıq yetişdirməyinə razı deyil. Onda sual verirəm ki, istədiyin rüşvəti versəm, kənd camaatı razı olacaq? Çox təəssüf olsun ki, saxtakar bələdiyyə sədrinin bu bəhanələri məndən istədiyi pulu almaqdır.

Qeyd edim ki, həmin göl yaşayış sahəsindən 1 km aralıda yerləşir və həmin göldə mən iki il balıq yetişdirib sahibkarlıqla məşğul olmuşam. Sonra müəyyən səbəblərə görə işimi dayandırdım. İndi isə maddi köməklik göstərən dostumla həmin fəaliyyəti bərpa etmək istəyirik. Biz bələdiyyə sədri Ağakişi Kərimovun qanunsuz əməllərindən Bələdiyyələrlə İş Mərkəzinin rəisi Mehdi Səlimzaqdəyə şikayət ərizələri ilə müraciət etmişik. Ancaq heç bir nəticəsi yoxdur".

Qeyd edək ki, Prezident İlham Əliyev sahibkarlığın inkişafını boğan məmurlara dəfələrlə ciddi xəbərdarlıqlar edib.

Səxavət Məmməd
Ölkə.Az