Həftənin icmalı
İcra başçısının villasından 4 milyon manat oğurlanıb
18.01.2016
Balakən və Şamaxı rayonlarının icra hakimiyyətinin başçısı işləmiş Asif Nəriman oğlu Məmmədovun yaşadığı evə maskalıların hücumu olub. Evdən 4 milyon manat nağd pul götürülüb.
Ölkə.Az xəbər verir ki, bu barədə istiqlal.az-a məlumatlı mənbələrdən informasiya daxil olub.
Mənbənin məlumatına görə, hadisə 2014-cü ildə - A.Məmmədov Şamaxı rayon İcra Hakimiyyətinin başçısı vəzifəsindən çıxarılandan az sonra baş verib: “Bir qrup maskalı şəxs onun Teymur Əliyev küçəsində yerləşən “milyonerlər məhəlləsi” adlanan ərazidə yerləşən villasına hücum çəkib. Basqın zamanı hamı evdə olub. Ancaq maskalılar buna əhəmiyyət verməyərək ev sahiblərinin əl-qolunu bağlayaraq 4 milyon pulu aparıblar”.
Ordumuz beynəlxalq tədbirlərdə iştirak edir
18.01.2016
Yanvarın 18-dən 20-dək Konya şəhərində (Türkiyə Respublikası) "Turaz Şahini - 2016" təliminin əsas planlaşdırma iclası, yanvarın 18-dən 22-dək Brüssel şəhərində (Belçika Krallığı) ümumi təhlükəsizlik və müdafiə siyasəti üzrə treninq kursu və yanvarın 18-dən aprelin 8-dək Şrivenhəm şəhərində (Böyük Britaniya) hərbi ingilis dili təməl kursu keçirilir.
Ölkə.Az-a Müdafiə Nazirliyinin mətbuat xidmətindən verilən məlumata görə, tədbirlərdə Azərbaycan Respublikası Silahlı Qüvvələrinin nümayəndələri iştirak edirlər.
Pensiyaçılara daha bir şad xəbər
18.01.2016
2016-cı ilin yanvar ayının pensiyaları vaxtından əvvəl veriləcək.
Bunu Dövlət Sosial Müdafiə Fondunun sədri Elman Mehdiyev deyib. Onun sözlərinə görə, fond yanvar ayının pensiyalarının maliyyələşdirilməsini başa çatdırıb. Belə ki, ötən ilin yekunları üzrə fondda təqribən 107 milyon manat məbləğində sərbəst vəsaitin yarandığını nəzərə alaraq sosial sığortadan ayrılmalar üzrə daxilolmaları gözləmədən pensiyaların verilməsinə başlanıb.
Dezinformasiya yayanlara qarşı qanuna uyğun ölçü götürüləcək
18.01.2016
Bir müddət əvvəl Azərbaycanın müxtəlif bölgələrində etiraz aksiyaları təşkil etmək cəhdləri iflasa uğradığı üçün hazırda bəzi qüvvələr daxili ictimai-siyasi vəziyyəti gərginləşdirmək üçün müxtəlif dezinformasiyalar yayırlar.
Ölkə.Az xəbər verir ki, hakimiyyətdəki mənbənin APA-ya verdiyi məlumata görə, şəxsi məsələləri ilə bağlı müxtəlif dövlət orqanlarının bölgələrdəki bölmələrinə gedən, yaxud yerli icra nümayəndəliklərində hesabat iclaslarında iştirak edən vətəndaşların toplu halında şəkillərinin etiraz aksiyası adı altında təqdim olunması ilə bağlı araşdırmalar başlayıb
Yumurtanın qiymətini süni şəkildə artıranlar həbs edildi
18.01.2016
Manatın məzənnəsində baş vermiş dəyişiklikdən istifadə edərək süni qiymət artımı, mal qıtlığı yaradılması, inhisarçılıq və digər sui-istifadə hallarının qarşısının alınması məqsədilə ardıcıl olaraq təxirəsalınmaz istintaq-əməliyyat tədbirləri həyata keçirilməkdədir.
8 ildir bağlanan "Şəhidlər məscidi" istifadəyə veriləcək
19.01.2016
“Türkiyə Dəyanət İşləri Vəqfi” tərəfindən tikilən və yenidən təmir işlərinə bağlanan “Şəhidlər məscidi” kimi tanınan ibadət evi yaxın zamanlarda yenidən istifadəyə veriləcək”.
Ölkə.Az xəbər verir ki, bu sözləri “Bizim Yol”-a açıqlamasında Bakı Şəhəri İcra Hakimiyyətinin (BŞİH) nümayəndəsi bildirib. Məsciddəki təmir işlərini BŞİH-i həyata keçirir. İş icraçısının sözlərinə görə, onlar ibadət evinin daxilində və minarələrində təmiri işi ilə məşğuldurlar.
Qeyd edək ki, 28 iyun 1996-cı ildən ibadətə açılan məscid 2008-ci ildən təmirə bağlansa da uzun müddət orada heç bir iş görülməyib.
Məktəblərdə qış tətil günlərinin vaxtı açıqlandı
19.01.2016
27-31 yanvar tarixlərində Azərbaycanın orta ümumtəhsil məktəblərində qış tətili olacaq.
Bununla yanvarın 26-da dərs ilinin birinci yarımili başa çatacaq.
Dərs ilinin ikinci yarımili 1 fevral tarixində başlayacaq.
Azərbaycanın ümumi təhsil məktəblərində dərs məşğələləri bu il sentyabrın 15-i başlayıb, bu il iyunun 14-də başa çatacaq.
Qeyd edək ki, dərs ili ərzində 5 gün payız tətili (16-20 noyabr), 5 gün qış tətili (27-31 yanvar, ibtidai siniflər üçün isə 5 günlük (1-5 may) əlavə yaz tətili müəyyən edilib.
QHT Şurası 337 min manatı büdcəyə qaytardı
19.01.2016
"Şuranın QHT-lərdən yeganə istəyi müqavilə öhdəliklərinin dürüst icra edilməsidir".
Bunu Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının 2015-ci ildəki fəaliyyəti haqqında hesabat konfransında Şura sədri Azay Quliyev bildirib. Onun sözlərinə görə, Şura 2015-ci il ərzində elan etdiyi maliyyə yardımı müsabiqələrində yerli QHT-lərin 513 layihəsinə 4 milyon 750 min 644 manat, 7 xarici quruma isə 504 min 670 manat vəsait ayırıb, reallaşdırılan layihələr üzrə isə 847 nəfər əməkhaqqı alıb.
Zorakılıq qurbanlarının müavinət alması ilə bağlı təkliflər hökumətə təqdim edildi
19.01.2016
Ailə, Qadın və Uşaq Problemləri üzrə Dövlət Komitəsi hökumətə məişət zorakılığı qurbanlarına birdəfəlik müavinətlərin verilməsini təklif edib.
Ölkə.Az xəbər verir ki, bunu Trend-ə Komitənin İnformasiya və analitik araşdırmalar şöbəsinin müdiri Elgün Səfərov deyib.
Onun sözlərinə görə, müavinətin bütün məişət zorakılığına məruz qalan qurbanlara şamil edilməsi təklif edilir.
E.Səfərov hesab edir ki, müavinətin məbləği zorakılığın ağırlıq dərəcəsindən, formasından, nəticəsindən asılı olaraq, 4 kateqoriya üzrə dəyişməlidir.
Natiq Kərimov azadlığa buraxıldı
19.01.2016
Nardaran Ağsaqqallar Şurasının sədri Natiq Kərimov həbsdən azad edilib.
Nardaran Ağsaqqallar Şurasının sədri Natiq Kərimov saxlanıldığı DTX-nın təcridxanasından sərbəst buraxılıb.
Bu barədə məlumatı onun oğlu Kamran Kərimov təsdəqləyib.
Qeyd edək ki, N.Kərimov yanvarın 6-da Dövlət Təhlükəsizliyi Xidmətinin (DTX) keçirdiyi əməliyyat zamanı saxlanılmışdı. Səbayel Rayon Məhkəməsinə aparılan N.Kərimov haqda 4 aylıq həbs-qətimkan tədbiri seçilmişdi.
20 Yanvar faciəsindən 26 il ötür
20.01.2016
Azərbaycanda 1990-cı il yanvarın 20-də baş vermiş faciədən 26 il keçir.
Bununla bağlı Azərbaycanda Ümumxalq hüzn günü elan olunub.
Azərbaycanın hökumət və dövlət nümayəndələri, diplomatik korpusun təmsilçiləri, sıravi vətəndaşlar 20 Yanvar faciəsinin qurbanlarının dəfn olunduğu Şəhidlər Xiyabanını ziyarət edəcəklər. Vətəndaşlar 20 saylı orta məktəbin qarşısından Parlament prospekti ilə Şəhidlər Xiyabanı istiqamətində hərəkət edəcəklər.
Yanvarın 20-də Bakı Polis Qarnizonu gücləndirilmiş rejimdə işləyəcək. 20 Yanvar faciəsinin 24-cü ildönümü ilə əlaqədar Daxili İşlər Nazirliyində hazırlanmış tədbirlər planına əsasən, yanvarın 20-si səhər saat 8-dən axşam saat 18-dək Parlament prospekti və Mehdi Hüseyn küçəsində nəqliyyatın hərəkəti tam məhdudlaşdırılacaq.
Yeni nazirdən yeni təyinat
20.01.2016
Rabitə və yüksək texnologiyalar naziri Ramin Quluzadə kadr dəyişiklikərinə başlayıb.
Ölkə.Az APA-nın cənub bürosunun məlumatına istinadən xəbər verir ki, nazirin əmri ilə Lənkəran Rayon Telekommunikasiya Qovşağına ötən ilin sentyabrından rəhbərlik edən Gülağa Şıxəliyev vəzifəsindən azad olunub.
Onun yerinə isə Şahlar Vəlişah oğlu İsmayılov təyinat alıb.
İşsizliyə görə müavinətlər artırılacaq
20.01.2016
İşsizliyə görə müavinətlər 40 faiz artırılacaq
Bu barədə əmək və əhalinin sosial müdafiəsi naziri Səlim Müslümov deyib.
Onun sözlərinə görə, bütün işləyən insanlar öz əmək müqavilələrini qeydiyyatdan keçirməli və sosial sığorta haqları ödəməlidirlər: “Bu hallar varsa, həmin insanlar, demək olar ki, öz iş yerlərini itirməkdən sığortalanıblar. Dövlətin “Məcburi sosial sığorta haqqında” qanunu var. Bu qanuna görə, işsiz olma sosial sığorta hallarından biri sayılır. Düzdür, bu gün Azərbaycanda işsiz olmaq üçün ayrıca sosial sığorta tarifi yoxdur. Buna baxmayaraq, Əmək və Əhalinin Sosial Müdafiəsi Nazirliyinin büdcə vəsaitləri içərisində bu məqsəd üçün vəsait nəzərdə tutulub.
4 nazirlik və 6 dövlət komitəsi ləğv edilir — SİYAHI
20.01.2016
Prezident İlham Əliyevin son müşavirədə paralel fəaliyyət göstərən dövlət qurumlarının ləğvi ilə bağlı çıxışından sonra bir neçə nazirlik və dövlət komitəsinin ləğvi, bəzilərinin isə səlahiyyətlərinin məhdulaşdırılması üzrə təkliflər paketi hazırlanır.
Bu barədə istiqlal.az-a hakimiyyətdəki mənbələrdən məlumat daxil olub.
Mənbənin sözlərinə görə, ölkənin neft gəlirlərinin azalması və qlobal iqtisadi böhranın artıq Azərbaycanda hiss olunması hökuməti dövlət xərclərini azaltmağa və ixtisarlara məcbur edir: “Ümumiyyətlə, neft gəlirlərinin kəskin azalması yeni siyasi-iqtisadi situasiya yaradıb. Bu mərhələdə hökumətdə həm strukur, həm də hakimiyyət komandasının yeniləşməsini qaçılmaz edir. Mümkündür ki, hökumətin tərkibi 40-50 faiz yeniləşsin və oliqarxları texnkokratlar əvəzləsin”.
Məlumatra görə, struktur islahatı nəticəsində bir neçə nazirlik və dövlət komitəsi ləğv ediləcək: Kənd Təsərrüfatı Nazirliyinin ləğv edilməsi, səlahiyyətlərinin İqtisadiyyat Nazirliyi ilə Ekologiya vəTəbii Sərvətlər Nazirliyi arasında bölüşdürülməsi gözlənilir. Bundan başqa Səhiyyə Nazirliyinin Əmək və Əhalinin Sosial Müdafiəsi Nazirliyi ilə birləşdirilməsi, Standartlaşdırma, Metrologiya və Patent üzrə Dövlət Komitəsinin ləğvi, funksiyalarının İqtisadiyyat Nazirliyinə verilməsi, Qiymətli Kağızlar Üzrə Dövlət Komitəsinin ləğvi, səlahiyyətlərinin Maliyyə Nazirliyinə verilməsi versiyaları nəzərdən keçirilir.
Bundan başqa səlahiyyətləri məhdudlaşdırlan Energetika Nazirliyinin, Ailə, Qadın və Uşaq Problemləri üzrə Dövlət Komitəsinin, Dövlət Şəhərsalma və Arxitektura Komitəsinin, Statistika Kimitəsinin, Diasporla ilə iş üzrə Dövlət komitəsinin ləğvi, səlahiyyələrinin başqa qurumlara verilməsi nəzərdə tutulur.
Bir qədər əvvəl Dövlət Torpaq və Xəritəçəkmə Komitəsi və Satınalmalar üzrə Dövlət Agentliyi ləğv edilib.
Bütün avtobuslar kart sisteminə keçəcəklər
20.01.2016
İctimai nəqliyyatda gediş haqlarının kart sistemi ilə ödənilməsi bütün avtobuslara şamil olunacaq.
Ölkə.Az-ın xəbərinə görə, bunu nəqliyyat nazirinin müavini Musa Pənahov bildirib.
Yeni avtobusların hamısında kart sisteminin tətbiq olunduğunu deyən nazir müaviniqeyd edib ki, bu, insanlara xidmətin keyfiyyətini yüksəldir:
“Yeni sistem insanlara rahatlıq yaradır, eyni zamanda avtobuslara minib-düşmə sürətini artırır, bu da avtobusların dayanacaqlarda daha az dayanmasına səbəb olur”.
Əhalinin sayı 10 milyona yaxınlaşır
20.01.2016
Dövlət Statistika Komitəsi Azərbaycanda əhalinin sayı ilə bağlı ən son rəqəmi açıqlayıb.
Ölkə.Az Dövlət Statistika Komitəsinə istinadən xəbər verir ki, 2015-ci ilin sonuna olan məlumata görə, ölkə əhalisinin sayı 103,8 min nəfər və ya 1,1 faiz artıb. Son statistikaya görə, indi Azərbaycanda 9 milyon 696 min 800 nəfərə əhali yaşayır.
Əhalinin 53,1%-ni şəhər, 46,9%-ni kənd sakinləri, 49,8%-ni kişilər, 50,2%-ni isə qadınlar təşkil edir. Hazırda hər 1000 kişiyə orta hesabla 1009 qadın düşür.
Mərkəzi Bank "qara siyahı"nı yenilədi
21.01.2016
Azərbaycan Mərkəzi Bankı (AMB) yanında Maliyyə Monitorinqi Xidməti BMT Təhlükəsizlik Şurasının İŞİD və “əl-Qaidə” Sanksiya Komitəsinin qəbul edilmiş qərarına uyğun olaraq barələrində sanksiyalar tətbiq edilməli olan fiziki və ya hüquqi şəxslərin ümumi siyahısını yeniləyib.
Belə ki, daha bir nəfər - Əkrəm Türki Hişan əl-Mazidi (Akram Turki Hishan Al-Mazidih) siyahıya əlavə olunub. Ümumi Siyahının son versiyası Maliyyə Monitorinqi Xidmətinin rəsmi internet səhifəsində (www.fiu.az/aze/umumi-siyahi) yerləşdirilib, habelə aidiyyəti nəzarət orqanlarına, monitorinq iştirakçıları və monitorinqdə iştirak edən digər şəxslərə göndərilib.
Xarici diplomların tanınması qaydaları dəyişdiriləcək
21.01.2016
Xarici ali təhsil sənədlərinin (diplomların) tanınması (nostrifikasiya) qaydaları ilə bağlı Nazirlər Kabinetinə təkliflər paketi təqdim edilib.
Ölkə.Az APA-ya istinadən xəbər verir ki, təkliflər paketində xarici ali təhsil sənədlərinin tanınması zamanı əmək bazarına çıxış və elmi fəaliyyət hüquqlarının ayrılması təklif olunub.
Qeyd edək ki, mövcud qaydalara görə Təhsil Nazirliyinin verdiyi şəhadətnamə ilə xarici ali təhsil sənədlərinin tanınması zamanı həm elmi fəaliyyət (magistr, doktorant səviyyəsində fəaliyyət göstərmək hüququ), həm də əmək bazarına çıxış hüququ verilir. Lissabon Konvensiyasına görə, isə bu iki sənəd ayrı olmalıdır.
Tarif Şurasının işçilərinin sayı artırıldı
21.01.2016
Nazirlər Kabineti “Azərbaycan Respublikası Tarif (qiymət) Şurasının Katibliyi haqqında” qərarında dəyişiklik edib.
Ölkə.Az-ın məlumatına görə, dəyişiklik Tarif (qiymət) Şurası Katibliyinin işçilərinin sayı ilə bağlıdır.
Qərara əsasən Tarif (qiymət) Şurası Katibliyinin say həddi 30 vahiddən 33 vahidə qaldırılıb.
Avropa Olimpiya Komitəsi Mehriban Əliyevanı təltif etdi
21.01.2016
Birinci xanım “Nailiyyətlərə görə” ordeninə layiq görüldü.
Bu gün İsveçrənin Lozanna şəhərində Azərbaycanın birinci xanımı, Azərbaycan Gimnastika Federasiyasının prezidenti Mehriban Əliyeva fəxri mükafat alıb.
Ölkə.Az oxu.az-a istinadən xəbər verir ki, birinci xanım Avropa Olimpiya Komitəsinin “Nailiyyətlərə görə” ordeni ilə təltif edilib.
Keçən ilin iyun ayında Bakıda keçirilən Birinci Avropa Oyunlarının Təşkilat Komitəsinin rəhbərinin təltif edilməsi mərasimi Beynəlxalq Olimpiya Komitəsinin qərargahında keçirilib.
Azərbaycana ən çox investisiya qoyan ölkələrin — BEŞLİYİ
21.01.2016
2015-ci ildə xarici müəssisə və təşkilatlar tərəfindən əsas kapitala 7 milyard 20,1 milyon manat vəsait yönəldilib.
Bu barədə Dövlət Statistika Komitəsindən (DSK) Ölkə.Az-a bildirilib.
“Xarici ölkələr və beynəlxalq təşkilatların vəsaitlərihesabına əsas kapitala yönəldilmiş vəsaitin 6 milyard 184,3 milyon manatı (88,1%-i) Birləşmiş Krallıq, Türkiyə, Yaponiya, Norveç, İsveç, Rusiya, İran, Malayziya və ABŞ sərmayədarlarına məxsus olub”, - deyə komitədən qeyd edilib.
Daha bir universitet kəsrə görə ödənişi ləğv etdi
21.01.2016
Bakı Dövlət Universitetinin Elmi Şurasının bu gün keçirilən iclasında alt qruplarda təhsil alan tələbələrin ödənişdən azad olunması barədə yekdil qərar qəbul edilib.
BDU-nun mətbuat xidmətindən Ölkə.Az-a verilən məlumata görə, iclasda 2016-cı ilin fevral ayından başlayaraq normativ təhsil müddətində alt qruplarda (yay məktəbi istisna olmaqla) oturan tələbələrin əlavə kreditlər üzrə təhsil haqqının BDU-nun daxili imkanları hesabına ödənilməsi məsələsi geniş müzakirə edilib.
Müzakirələr zamanı çıxış edən alimlər Nazirlər Kabinetinin 2015-ci ilin sosial-iqtisadi yekunlarına və qarşıda duran vəzifələrə həsr olunmuş iclasında Prezident İlham Əliyevin bütün qurumların daha da səmərəli işləməsi, təşəbbüskarlığı, insanlar üçün bütün şəraiti yaratması haqda olan tapşırıqlarını əsas götürüblər.
Sonda isə Elmi Şura üzvləri alt qruplarda təhsil alan tələbələrin ödənişdən azad olunması barədə yekdil qərar qəbul ediblər.
Sülhməramlılarımız Əfqanıstandan qayıtdı
21.01.2016
NATO-nun 2015-ci ilin yanvar ayından Əfqanıstan İslam Respublikasında həyata keçirdiyi yeni “Qətiyyətli Dəstək” qeyri-döyüş missiyasının tərkibində fəaliyyət göstərən Azərbaycan Respublikası Silahlı Qüvvələrinin 42 nəfərdən ibarət qrupu plana uyğun olaraq rotasiya qaydasında Bakıya qayıdıb.
Bu barədə Ölkə.Az-a Müdafiə Nazirliyinin mətbuat xidmətindən məlumat verilib.
Azərbaycan Respublikası Silahlı Qüvvələrinin Əfqanıstandakı sülhməramlı missiyası 20 noyabr 2002-ci il tarixdən başlayıb.
Hazırda Azərbaycan Respublikası Silahlı Qüvvələrinin 94 nəfərdən ibarət hərbi qulluqçusu, 2 hərbi həkimi və 2 mühəndis-istehkam ixtisası üzrə zabiti Əfqanıstandakı missiyada iştirak edir.
Azərbaycanda 10 min nəfərə 35 həkim düşür
21.01.2016
Azərbaycanda əhalinin hər 10 min nəfərinə orta hesabla 35 həkim və 59 orta tibb işçisi düşür.
Bu barədə Ölkə.Az Dövlət Statistika Komitəsinə (DSK) istinadən xəbər verir.
İlkin məlumatlara əsasən, 2016-cı ilin əvvəlinə ölkədə 573 xəstəxana və 1753 ambulatoriya-poliklinika müəssisəsi fəaliyyət göstərir.
Bu müəssisələrdə 33,1 min həkim və 56,3 min orta tibb işçisi çalışır.
Mehriban Əliyeva “2015-ci ilin adamı” oldu
21.01.2016
Milli Qəhrəman Çingiz Mustafayev Fondu və ANS Şirkətlər Qrupu Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəikili, birinci xanım Mehriban Əliyevanı "2015-ci ilin adamı" elan edib.
Ölkə.Az-ın Trend-ə istinadən məlumatına görə, Azərbaycanın birinci xanımı Mehriban Əliyeva bu mükafata Birinci Avropa Oyüunlarının yüksək səviyyədə təşkili və keçirilməsində oynadığı müstəsna rola, Azərbaycanın müsbət imicinin dünyada tanınması istiqamətində göstərdiyi geniş miqyaslı fəaliyyətə Azərbaycan və Dünya mədəniyyətinin qarşılıqlı inteqrasiyası üçün gördüyü işlərə, ölkədə multikulturalizm mühitinin formalaşdırılmasına verdiyi töhfələrə və ardıcıl xeyriyyəçilik fəaliyyətinə görə layiq görülüb.
Milli Qəhrəman Çingiz Mustafayev Fondu və ANS Şirkətlər Qrupu 2005-ci ildə də Mehriban Əliyevaya "ilin adamı" mükafatını təqdim etmişdi.
Azərbaycan kəşfiyyatı Ermənistanı lərzəyə salıb
22.01.2016
Ermənistanda Azərbaycan kəşfiyyatının şəbəkəsi ilə mübarizə heç bir nəticə vermir.
Ölkə.az xəbər verir ki, son zamanlar Azərbaycanın döyüş xəttində əldə etdiyi üstünlük erməniləri bərk qorxuya salıb.
Erməni işğalçılarının cəbhə xəttindəki atəş nöqtələrinin, mühüm hərbi obyektlərinin, döyüş xəttinə yaxın yerləşən ərzaq və silah ambarlarının ordumuz tərəfindən sərrast zərbələrlə məhv edilməsi Ermənistan rəhbərliyini çıxılmaz vəziyyətə salıb.
Məlumata görə, ermənilər Rusiya hərbi kəşfiyyatının zabitlərinin köməyi ilə öz silahlı qruplaşmalarının daxilində təmizləmə əməliyyatına başlayıblar. Artıq ermənilər özlərinin ön xətdəki bütün komandirlərindən şübhələnməyə başlayıblar. Ermənistandakı hərbi qaynaqlara yaxın mənbənin məlumatına görə, erməni komandanlığı doyüş xəttindəki zabitlərinin yerini hər həftə dəyişir. Döyüş xəttindən qayıdan əsgər və zabitlər rusların da iştirakı ilə erməni kəşfiyyatının əməkdaşları tərəfindən çarpaz sorğu-suala tutulurlar. Onların əksəriyyətinə yaşadıqları şəhərdən çıxmaq qadağan edilib.
Hacıyev və Mahmudovun əmlakları satışa çıxarıldı — Milyardlarla ölçülür
22.01.2016
Prezident İlham Əliyevin sərəncamı ilə işdən çıxarılan sabiq milli təhlükəsizlik naziri və onun hazırda həbsdə olan qudası, Beynəlxalq Bankın idarə heyətinin keçmiş sədri Cahangir Hacıyevin əmlakları satışa çıxarılıb.
Ölkə.Az xəbər verir ki, bu barədə “Yeni Müsavat” qəzeti yazıb. Qəzetin iddiasına görə, xüsusi istintaq qrupu Eldar Mahmudovu və onun ailə üzvlərini bir neçə dəfə dindirib. Əsas məqsəd isə sabiq nazirin son 10 il ərzində sahibləndiyi mal-mülkün-bunların sırasında xarici bank hesabları da var-siyahısını müəyyənləşdirməkdir. İddia olunur ki, Eldar Mahmudovun oğlunun Londonda üzə çıxan 30 milyon funt-sterlinq (təxminən 48 milyon dollar) dəyərində mülkü, sadəcə, istintaq üçün bir “yem” kimi ortaya atılıbmış. Amma məlum olub ki, Mahmudovların daşınmaz əmlakının əsas hissəsi Avropanın digər ölkələrində, əsasən İspaniya və Çexiyadadır.
Çayların səviyyəsi aşağı düşür
22.01.2016
Hazırda Böyük Qafqazın Quba-Xaçmaz bölgəsi çaylarında sululuq ongünlük normanın 160-180, Kiçik Qafqazın çaylarında 100-190, Lənkəran-Astara bölgəsi çaylarında isə 50-90 faizini təşkil edir.
Ekologiya və Təbii Sərvətlər Nazirliyinin Milli Hidrometeorologiya Departamentindən Ölkə.Az-a verilən məlumata görə, yanvarın 22-də Kür çayının Qıraqkəsəmən məntəqəsində suyun səviyyəsində 1 sm azalma müşahidə olunub. Hazırda məntəqədə su sərfi 155 m3/s olmaqla ongünlük normanın 99 faizini təşkil edir. 2015-ci ildə isə bu rəqəm 95 m3/s olmaqla ongünlük normanın 61 faizini təşkil edib.
Qanıx çayının Əyriçay məntəqəsində suyun səviyyəsində 7 sm azalma müşahidə olunub. Hazırda məntəqədə su sərfi 85 m3/s olmaqla, ongünlük normanın 127 faizini təşkil edir. 2015-ci ildə isə bu göstərici 47 m3/s təşkil edərək ongünlük normanın 70 faizinə bərabər olub.
“Heydər məscid”inə imam və axund təyin olundu
22.01.2016
Bakıdakı “Heydər məscidinə” imam və axund təyinatı olub.
Ölkə.Az APA-ya istinadən xəbər verir ki, Qafqaz Müsəlmanları İdarəsinin (QMİ) sədr müavini, "Heydər məscidi" kompleksinin sədri Hacı Sabir Həsənli bildirib ki, müvəqqəti olaraq məscidə sünni təriqəti üzrə Hafiz Abbasov imam, şiə təriqəti üzrə isə Rüfət Qarayev axund təyin olunub.
QMİ sədri Şeyxülislam Hacı Allahşükür Paşazadə tərəfindən təyin olunan hər şəxs Bakı İslam Universitetinin məzunudur.
S. Həsənli qeyd edib ki, hər iki din xadiminə məsciddə gündəlik ibadətlərin edilməsi, moizələrin oxunması və digər işlərin müvəqqəti icrası tapşırılıb: “Hər cümə günü qılınacaq vəhdət namazlarına isə bölgələrdən qazıların cəlb olunması barədə qərar vermişik. Şeyxülislamla bu barədə söhbət apardıq və qərar verdik ki, hər cümə bir bölgədən vəhdət namazlara rəhbərlik etmək üçün bir qazı cəlb olunsun”.
Nardaranda "Bilik evi" yaradılır
22.01.2016
Bakının Nardaran qəsəbəsində Azərbaycan Respublikasının Prezidenti yanında Bilik Fondunun filialı açılacaq.
Bunu Azərbaycan Prezidentinin millətlərarası, multikulturalizm və dini məsələlər üzrə Dövlət müşaviri Kamal Abdulla bu gün keçirdiyi mətbuat konfransında deyib. K.Abdulla qeyd edib ki, Nardaran sakinləri buna mənən hazırdır:
"Nardaran sakinləri buna mənən hazırdır. Nardaranda, Bakının digər kəndlərində çox ağıllı ziyalılarımız olub, indi də var. Bizim əsas dayaq nöqtəmiz o insanlar olacaq. Azərbaycan dövlətçiliyini qəbul edən və dəstəkləyən insanlar. Nardaran camaatı bu insanların önündə getməyə hazır olan insanlardır".
Mirşahinin "Hesabat" verilişinə qadağa qoyuldu — MTRŞ-dan sərt qərar
22.01.2016
Bu gün Milli Televiziya və Radio Şurasının növbəti iclası keçirilib.
İclasda “ANS” televiziyası tərəfindən “Televiziya və radio yayımı haqqında” Azərbaycan Respublikası Qanununun tələblərinin pozulması ilə əlaqədar inzibati icraata dair işə baxılıb.
“ANS” televiziyasının efirində yayımlanan “Hesabat” analitik-informasiya proqramının 27 dekabr 2015-ci il və 17 yanvar 2016-cı il tarixli buraxılışlarında televiziya yayımının əsas prinsiplərinin və proqrama verilən tələblərin pozulması - proqramlarda informasiyanın tərəfsizliyi, qərəzsizliyi, əhatəliliyi, tam və doğru-dürüstlüyü prinsiplərinə əməl olunmadığını, işgüzar nüfuzun ləkələnməsinə yol verildiyini, faktlar və hadisələrin ədalətli şərh olunmadığını, birtərəfliliyə yol verildiyini nəzərə alnaraq, “Televiziya və radio yayımı haqqında” Azərbaycan Respublikası Qanununun 23.1-ci maddəsinə uyğun olaraq “ANS” televiziyasının efirində “Hesabat” analitik-informasiya proqramının yayımı 24 yanvar 2016-cı il tarixdən etibarən 1 (bir) ay müddətinə dayandırılıb.
Şengen vizası almaq asanlaşdı
22.01.2016
Yanvarın 25-dən etibarən Macarıstan Səfirliyinin Konsulluq şöbəsində viza sənədlərin təqdim edilməsi üçün İFR sistemi – ərizənin bron vaxtının onlayn verilməsi sitemi tətbiq olunacaq.
Şöbədən Ölkə.Az-a verilən məlumata görə, o vaxtdan bəri, nömrələrin verilməsi sistemi başa çatır, və vizə sənədlərin təqdim olunması üçün Səfirliyin Konsulluq şöbəsi Ərizəçilərin rezervasiyasını yalnız IFR System vasitəsilə qəbul edir.
IFR System saytında ərizəçilərin viza "C" üçün (Şenqen vizasının 90 gündən çox olmayaraq etibarlıq müddəti) və ya viza «D» üçün (yaşayış icazəsi almağa imkan verən viza) müraciət edərək vaxt sifarişi etmək imkanı var.
IFR System aşağıdakı web ünvanda yerləşir: ifr.mfa.gov.hu.
IFR System-i mobil telefonda istifadə etmək üçün, onu pulsuz olaraq AppStore-dan (iOS) və yaxud Google Play-dan (Android) yükləmək lazımdır.
Windows Mobile sistemindən istifadə edənlər, veb brauzerəsera aşağıdakı ünvanı daxil etməlidilər: ifr.mfa.gov.hu/ifrmobile.
IFR System-in tətbiqi ilə eyni zamanda Macarıstan Səfirliyinin Konsulluq şöbəsinin qəbul saatları aşağıdakı kimi dəyişir:
Bazar ertəsi, çərşənbə axşamı, çərşənbə: 9.30-13.00
Cümə: 9.30-12.00
Bir ildə patyaxt yollarında 202 nəfər ölüb
22.01.2016
Paytaxtda yol-nəqliyyat hadisələrinin sayı 20 faiz azalıb.
Daxili İşlər Nazirliyinin mətbuat xidmətindən Ölkə.Az-a verilən məlumata görə, bunu Bakı Şəhər Baş Polis İdarəsinin rəisi, polis general-mayoru Mirqafar Seyidov daxili işlər naziri Ramil Usubovun iştirakı ilə İdarədə 2015-ci ilin yekunlarına həsr olunmuş geniş əməliyyat müşavirəsində deyib.
M.Seyidov bildirib ki, paytaxt ərazisində baş vermiş 667 yol-nəqliyyat hadisəsində 202 nəfər həlak olub, 850 nəfər isə müxtəlif dərəcəli bədən xəsarətləri alıb. Əvvəlki dövrlə müqayisədə yol-nəqliyyat hadisələrinin sayı 19,7 faiz, həlak olanların sayı 30,8 faiz, xəsarət alanların sayı 4,9 faiz azalıb.
Azərbaycan sərhədində yararsız donuz əti tutuldu
23.01.2016
Ağstafada 120 kq yararsız donuz ət aşkarlanıb
Qonşu ölkələrdə donuz qripiin yayılması və Azərbaycana keçmə təhlükəsi ilə əlaqədar ehtiyat tədbirləri görülür.
Ağstafanın Poylu qəsəbəsində yerləşən Gürcüstan Azərbaycan arasındakı gömrük postunda reyd zamanı 120 kiloqramdan artıq mənşəyi bilinməyən ət aşkarlanıb. ANS PRESS-in bölgə müxbirinin verdiyi məlumata görə, yoxlamalar zamanı bəlli olub ki, naməlum ət donuz ətidir və onu Göygölün Topalhəsənli kənd sakini Şəmkir Abbasov öz yaşadığı rayona aparır.
