Neftçilər xəstəxanası depozitlərin qaldırıldığını təkzib etdi
Bir neçə gün öncə bir sıra media qurumlarında Mərkəzi Neftçilər Xəstəxanasında depozit pullarının qaldırıldığı barədə məlumat yayılmışdı.
Məlumatda iddia olunurdu ki, ölkədəki devalvasiya ilə əlaqədar olaraq depozit pulları 1200 manatdan 1800 manata qaldırılıb.
Ötən gün “Yeni Zaman” qəzetinin sorğusunu cavablandıran xəstəxananın baş direktorunun birinci müavini və baş həkimi Həbib Yüzbaşov bu məlumatın həqiqəti əks etdirmədiyini söylədi. Onun sözlərinə görə, baxmayaraq ki, adıçəkilən xəstəxana təsərrüfat hesabı ilə işləyir və onlar qiymətləri tənzimləməkdə tam sərbəstdirlər, lakin ölkədəki sosial durumu, eləcə də vətəndaşlarımızın maddi vəziyyəti nəzərə alaraq devalvasiya ilə bağlı heç bir qiymət artımı aparmayıblar. Xəstəxana fəaliyyətini əvvəlki qaydada davam etdirir.
Baş həkim bir daha xüsusi olaraq vurğuladı ki, onlar əhalinin rifah halını nəzərə alaraq qiymətləri stabil saxlamağa qərar veriblər və nə qədər mümkündürsə, bu intervalı qoruyacaqlar. Xəstəxana devalvasiyadan dolayı yaranan əlavə xərcləri öz hesabına qarşılamaqla əhalinin sağlamlığına xidmətini davam etdirmək niyyətindədir.
