\"Diaspora Komitəsi dostluq və qohumbazlıq üzərində qurulub\"

Xaricdə yaşayan quzeyli və güneyli azərbaycanlıları təşkilatlandırmaq və milli mənafeyimiz uğrunda bir araya gətirmək üçün Azərbaycan dövləti Diaspora komitəsi yaratdı.

Azərbaycan əleyhinə xaricdə hər hansısa bir qanun qəbul ediləndə bunu dərhal erməni lobbisinin üzərinə atırlar. Erməni lobbisi həqiqətən çox güclüdür, yoxsa bizim komitə çox zəif işləyir? Diaspora komitəsinə ayrılan pullar düzgün yönləndirilirmi? Diaspora təşkilatlarımızın zəifliyinin səbəbi nədir?

Bu məsələ ilə bağlı İsveçdə fəaliyyət göstərən "Bütöv Azərbaycan" təşkilatınınn sədri, DAK idarə heyətinin üzvü Teymur Eminbəyli Ölkə.Az-da cavablandırıb:

"Azərbaycan əleyhinə qanun qəbul olunmasının səbəbini erməni lobbisinin güclü olmasında deyil, Azərbaycan lobbisinin gücsüz olmasında və ya heç olmamasında axtarmaq lazımdır. Lobbi işinə görə Diaspora Komitəsi məsul deyil, bəlkə də bütün dövlət strukturları məsuliyyət daşımalıdır. Diaspora komitəsi dostluq və qohumbazlıq üzərində qurulmuş bir qurum olduğundan, ondan ölkəmizin xeyrinə nə isə gözləmək sadəlövhlük olardı. Əvvəllər Diaspora Komitəsinin işi diaspora təşkilatları arasında təfriqələr, intriqalar yaratmaqdan ibarət idi. İndi heç bu da yoxdur. Yəni belə bir Komitənin mövcudluğu daha görünmür. Ona görə də onun zəif və ya güclü işləməsi günün mövzusu ola bilməz.

Lobbiçilik bir dövlət siyasəti olmalıdır və bu siyasət şəxslərin deyil, ölkənin maraqlarına xidmət etməlidir. Bizdə isə dövlət və ölkə maraqları deyil, konkret şəxsin və onun ətrafının maraqları gündəmdədir.

Diaspora Komitəsinə ayrılan maliyyə vəsaitinin hara xərclənməsi barədə şəffaflıq olmadığı üçün onun düzgün xərclənməsi barədə danışmaq absurddur. Bir o məlumdur ki, həmin vəsait diaspora işinə xərclənmir. O pullar hara getsə də sonda qayıdıb komitə sədrinin cibinə girir.

Diasporamız zəif deyildir, sadəcə sistemsiz fəaliyyət göstərdiyi üçün fəaliyyəti görünmür. Diasporamızın işinə çox ciddi yardım lazımdır. Bu yardım təkcə maliyyə yardımı deyil, eyni zamanda ölkəmizin və dövlətimizin maraqlarına uyğun bir koordinasiya sisteminin qurulmasından ibarət olmalıdır".

Səxavət Məmməd
Ölkə.Az